środa, 16 lipca 2014

De furcula apud Europaeos et Americanos

Thomam, filium meum Americanum, qui modo mecum in insulis Graecis et in Polonia quinque septimanas degit, volui docere more Europaeo incisoriis (furcula et cultro) in mensa simul uti, Americani enim prius secant carnem totam, deinde demum comedunt, nescientes manu laeva furculam tenere (nisi casu scaeva es). Non quia superbia quadam morum Europaeorum laboram (ita saltem spero), sed quod puto hanc methodum multo utiliorem esse – hac enim utens carnem semper calidam in catillo tenes, parvas tantum frustulas ex ea (carne) modo nunc, modo tunc exsecando.
Noluit puer. Dixit eorum systema aequaliter bonum esse.
- Conare! – dixi. – Tunc, amba systemata sciens, melius eliges.
Noluit.
In mentem venit obstinatio mea ante septem abhinc annos, cum nolui me methodum "sine usu oculorum" claves computatri (denis sc. digitis) pulsare disciturum. Sed didici et valde hac re hodie gaudeo.

1 komentarz:

  1. Omnino mentiris: nemo enim nescit Americanos nullis fuscinulis aliisque instrumentis escariis, sed sordidis et nudis suis digitis ora sua cibo insaluberrimo farcire. Quid enim aliud apud barbaros fieri potest?

    OdpowiedzUsuń