Cerevisiae undis rapti

Scrutando ephemerides Varsovienses saeculi XIX invenio sat frequentes notatiunculas de operariis bracinarum (Angl. brewery workers), qui diem supremum infortune obierunt in cupam cerevsiae fermentescentis lapsi.

Ut amica mihi dixit, cuius marito munus est in bracina prope Varsoviam (necnon scientia quaedam historica huius professionis), in veteribus technologiis cerevisia fermentebatur in cupis magnis apertis. Tunc ipsa cerevisia erat gustu melior quam hodierna, sed breviori usus (debebatur mox post fabricationem bibi). Operarii ita portiunculas cerevisiae ferventis ad gustandum capiebant trullis perlongis, ipsi per ponticulos, qui super cupas extendebantur, ambulantes. Id faciendo interdum, propter magnam copiam dioxydi carbonici (CO2) e cupis emissam, mentem amittebant et in cupam decidebant.

Similia infortunia in bracinis usque hodie eveniunt, sed, Deo gratia, non tam saepe – maritus amicae meae testis erat semel operarii mortis, qui quoddam elementum cupae sarcire conabatur: nimis sero cum collegis auxiliis misero operario adcucurrerunt.