piątek, 28 marca 2014

Pulcherrima somnia sub luna plena

A studiosis psychologiae Britannicis, duce Richardo Wiseman, repertum esse mirissima, sed simul pulcherrima, somnia ab hominibus videri tempore plenilunii. Quod repertum est plus quam mille hominum somniis investigatis.
Prof. Wiseman notus est investigationibus variarum rerum "mirissimarum", ut phaenomena paranormalia, fraudes, gaudia etc. Qui vir librum inter psychologos insignem scripsit, titulatum "Mysteriologia" (Quirkology).

Ut ego autem, amator atque indagator (privatus) somniorum, multoties observavi, pulcherrima ac certe maxime conspicua somnia haberi tempore sero-matutino, circa scilicet horas nonam decimamve, cum licet, ut diebus Saturni et Solis, tam longe in lecto manere. Ita saltem mecum res somniosae se habent.

niedziela, 23 marca 2014

De desiderio rerum naturalium

Memini temporis - usque sc. finem (anno 1989) dictaturae communisticae - cum vicenos (20) dolarios US-Americanos in summa intermedia civis Polonus per mensem laborando merebat; nunc, puto, plus quam mille dolariorum  uno quoque mense domum adportat. Quod licet minus adhuc sit quam salarium vicinorum nostrum occidentalium, nihilominius sole clarius patet nos diviotiores divitioresque in dies fieri.
Mutamur ergo et mores nostri mutantur. Unus horum est mos se optime nutriendi. Plerique concives mei, qui Varsoviae aut in aliis metropolibus habitant, maiorem solito pecuniam ad escam emendam solvunt, cum sciant eam "salubrem", "oecologicam", "naturalem", ruri educatam esse. Si est planta, stercore naturali boum adiutum in crescendo esse debeat, nullo laetamine chemico adhibito, si autem caro est, caro esse debet iumentorum, quae vitam fere liberam in pratis agunt, nullo autem modo bestiarum, quae in "praediis industrialibus" teneantur, ubi permulta milia horum uno in loco per totum vitae spatium vivant, cibatu artificiali pastae, gramine viridi a se numquam viso.
Ita exempli gratia, ova gallinacea Poloni in urbibus habitantes nunc magna ex parte emere solent cum sciant ea venisse e praediis non sat magnis, ubi liceat gallinis per pratum hortumve libere ambulare, ova scilicet ruri a gallina ipsa, non in incubatro, "educata". Pretium talium ovorum interdum bis tantum est ut ovorum "industrialium".

Sed nonnulli viri callidi ob hoc desiderium rerum naturalium pecuniam facile faciunt, ut mihi noti duo fratres, qui ova magno in numero e praedio "industriali" emunt, deinde... stercore gallinaceo (quod apud agricolas parvissimo pretio emunt) ea circumlinunt. Et talia ova, quasi recenter e gallinario agricolae manu suscepta, duplicato pretio emptoribus metropolitanis preabent. Nam pecunia non olet, etiamsi oleant ova. 

wtorek, 18 marca 2014

Inventum confirmat theoriam Einsteinianam

Ut nuntiatur, studiosis Harvardianis (duce John M. Kovac) contigit reperire undas gravitationales, quae sint quasi "sulci" in "superficie" spatiotemporis. Harum undarum exsistentiam ante fere centum abhinc annos theoretice prospexit – ut partem theoriae relativitatis - Albertus Einstein.
A multis studiosis undae gravitationales credebantur esse ultimum secretum originis universi. Kovac cum collaboratoribus conspexerunt eas tempore indagationis irradiationis cosmicae, id est relicti Displosionis Priscae.
Inventio undarum gravitationalium confirmat theoriam inaequalis distributionis materiae universi – secundum hanc stellas, galaxias, planetas et omnes creaturas, homine non excepto, esse effectum "inflationis cosmologicae", quae disturbasset priscum aequilibrium. Tunc, in fractione secundae vitae, universum duplicavit spatium suum. Cuius rei vestigia repperimus 13,7 miliarda annorum postea.  


poniedziałek, 17 marca 2014

Nonnullae nugae e cerebro fatigato recenter productae – cogitationes, somnia etc.:

Cum denuo fumam, maiore quam antea timore mortis laboro.
- Quid times? - meipsum rogavi.
- Timeo mortem – respondit "meipsus" – privaturam me omnino possibilitate vitam meam mutare.
- Quam vim utique iam diu non habes!

Licet iam desierim credere Deum adesse, nihilominus porro eum timebam - rabbinus David Aaron, "Vita intima Dei" (The Secret Life of God)

Cum viro quodam in caupona locutus sum, qui sat diu in Insulis Hawaiensibus degebat. Dixit se in mari natando bis os ad os convenisse permagnum (nonnullorum metrorum) squalum anthropophagum. Dixit mentem suam plus minusve tranquillum in eo momento fuisse, sed ductus analis sua sponte contentum ventris deoneravit.

Anus quaedam narravit se non posse bene precari in ecclesia Beatae Virginis Mariae (Varsoviae, in via Solidaritatis), nam licet haec ecclesia anno 1962 magno ope architectorum 21 metris mota sit, ut via hodierna Solidaritatis (tunc ei aliud nomen fuit) latior redderetur, minime huius ecclesiae axis sacralis movere architectis contigisse, quod punctum sanctissimum non, ut solet, in altari, sed plus minusve in media parte aedis ecclesiae remansisse.

Hora 4:37 matutina experrectus sum subita cura condicionis generis humani. At nescivi quam partem corporis fricarem.

Interdum fit in cauponis portuensibus ut aliquis solitarius potator compotatores sibi benevolentes inveniat, qui sermocinentur cum eo iucunde pocula nova gratis adferrentes. Postero die expergiscitur miserus potator cum crapula in... navi undas rostro scindente. Iam nauta est! Contractum suo nomine firmavit, quamvis nihil huius rei nunc meminerit. At navis petit Acroteriopolim (Capetown) in Republica Africae Australis...

In somnio vocem audivi annuntiantem hoc anno pascha – decreto Sedis Apostolicae - non futurum.

Dixit quisdam: "Ceterum vivimus non cum vivimus, sed in intervallis ".



sobota, 15 marca 2014

Plus ultra seu de fine mundi

"Ne plus ultra" rupi Calpe manibus Herculi inscriptum significabat nullam esse terram ultra fretum Gaditanum. Quod falsum esse monstravit Christophorus Columbus necnon alii huius temporis navigatores Hispani aut Lusitani; inde abhinc in insigni regali Hispaniae inscriptio "Plus ultra".
Mihi tamen maxime placent casus "plus ultra" iocose-linguistici. Quorum duos hic citabo:
- De omnibus rebus et de quibusdam aliis (Ioannis Pici Mirandulae)
- Quisque homo materque sua (Everybody and his mother, locutio Americana)
In mentem venit quoque lectio physices in schola elementaria, ubi professori docenti universum finem habere discipulus respondet:

- Bene. Sed quid est ultra hunc finem?

De colore ungium feminarum (theoria aliquantulum sexistica Vladimiri)

Cauponae "Gustatoriae" olim adfui cum amico me vetustiore, Vladimiro. Qui animam meam advertit in id, quod omnes fere mulieres huic cauponae praesentes (at multae aderant) habebant ungues aut rubro aut caeruleo colore pictas. Quod explanavit, dicens: "Hae, quae aut in statu ovulationis aut prope sunt, caeruleo colore ungues pingunt, nam sciunt se in animo tam biologice pulchras his diebus esse, ne necesse iis sit aliis modis viros ad se illicere. Illae tamen, quae in alio puncto cycli menstrui sunt, cum scilicet concipere non possint, colore rubro, ergo vividissimo, viros in se attrahere conantur, quasi tauromacha tauros hodie muleta rubra, olim autem mappa sanquine madida".

Circumspexi mulieres, quae cauponae aderant, atque inveni mihi maxime placere has cum unguibus caeruleis. Fortasse recte ita docebat Vladimirus?

sobota, 8 marca 2014

De impactu stellarum ad fata nostra (pars altera)

Lego porro in supradicta (ante nonnullos scilicet dies a me citata) symbola Veronicae Śliwa: diem (aut rectius: mensem) natalem re vera impactum habere ad ingenium hominis. Qui scilicet mensibus vernalibus nati sint, multo rarius morbis nonnullis mentalibus laborent quam hi, qui mensibus autumnalibus primam in sui vita lucem viderint, nam illi Sole splendente (vernali et aestivali) neonati fruebantur, hi enim diebus brevissimis auraque brumali. Haec ratio valere a domina Śliwa putatur non solum ad depressionem animi, sed etiam ad probabilitatem exempli gratia ossis in vita adulta fracti necnon ipsam longaevitatem: calido tempore nati vivant in summa intermedia uno mense longius quam nati in frigidis mensibus.
Hanc rem quasi obstupefactus legi. In mentem venit memoria unius viri bibuli, quocum olim in caupona Varsoviensi "Azalea" cerevisias cotidie sorbere solebam. Habuit ille, ut multi nostratum, theoremata quasi-scientifica ad pervarias disciplinas pertinentia, quorum ipse auctor esset. Dixit ita se credere homines primis mensibus anni natos multo saepius quam alii in vita adulta schizophrenicos fieri, dum exeuntibus mensibus anni nati ad alcoholismum magis proni essent. Hi enim primis diebus (septimanis, mensibus) sui vitae Solem in dies decrescentem conspiciunt et eo facto magis magisque tristiores fiant ac tenebras quasi infernales timent; illi autem cotidie crescentem vident Solem, quod incrementum semper mansurum sperant ergo postea maxima frustratione laborant, cum dies breviores fiant. At Sol est lux, lux autem vita, absentia eius –mors.  
Tam commotus hoc theoremate olim fui, ut investigationem statisticam perficerem, scrutando diem natalem circiter quadraginta notorum schizophrenicorum eiusdemque numeri alcoholicorum. Comperi circa 60% illorum re vera natos esse in primo dimidio anni, circa autem 60% alcoholicorum inter Iulium et Decembrem. Sed ratio 60 ad 40 non satis est, ut theorema bonum a me putetur.

Impactum Solis ita credit domina Śliwa ad vitam nostram valere. Luna quoque, cum motum maris regat, ei alicuius momenti hic esse videtur, sed significationem aliarum stellarum errantium (=planetarum) omnino spernit – nimis procul a nobis sunt, dicit. 

Mihi autem placet sententia Latina, verisimiliter mediaevalis: Astra inclinant, sed non obligant. 

wtorek, 4 marca 2014

De constellationibus commutatis

Natus vel nata es Ianuario ineunte, ergo putas fatum tuum in potestate Capricorni manere? Erras. Initium anni Capricornus tenebat ante circiter tria milia annorum, sed ab illinc – propter paululum irregularem motum terrae circa Solem, motum, ut dicitur, vacillantem – res in caelo valde mutatae sunt et nunc primis diebus anni Sol spectat non ad Capricornum, sed ad Sagittarium. Similiter, initium veris olim in signo Arietis fuerat (inde punctum Arietis, sive aequinoctium vernale); hodie punctum Arietis in potestate Piscium remanet. At desinchronizatio constellationum pergit, ergo post quingentos vel sescentos abhinc novos annos inveniemus punctum Arietis in Aquario.
Ita docet Veronica Śliwa, astronoma, rectrix planetarii Varsoviensis "Coelum Copernicanum". Ceterum, narrat, Sol in suo cursu annuo visitat non duodecim sed tredecim constellationes – inter enim 29 Novembris et 17 Decembris currit per regionem Ophiuchi. Cuius rei scientiam possidebat iam Ptolemaeus. Astrologi tamen tantopere numerum 12 amant, ut simulent se hanc rem numquam conspexisse. Sicut et ipsam commutationem coeli.
Nos autem, harum rerum scientes, possumus putare omnia horoscopia hodierna (quae scilicet ad commutationem Zodiaci nullum respectum habent) nihil veritatis habere (si omnino credendum sit astra aliqua "scientia" donari).
Infra monstramus tabellam hodiernorum temporum dominationis constellationum Zodiaci:
·         Capricornus – 20 Ian.-16 Feb.
·         Aquarius – 17 Feb.-11 Mar.
·         Pisces – 12 Mar.-18 Apr.
·         Aries – 19 Apr.-13 Mai.
·         Taurus – 14 Mai.-21 Iun.
·         Gemini – 22 Iun.-20 Iul.
·         Cancer – 21 Iul.-10 Aug.
·         Leo – 11 Aug.-16 Sept.
·         Virgo – 17 Sept.-30 Oct.
·         Libra – 31 Oct.-23 Nov.
·         Scorpio – 24 Nov.-29 Nov.
·         Opiuchus – 29 Nov.-17 Dec.
·         Sagittarius – 18 Dec.-19 Ian.