czwartek, 31 marca 2016

De cerebro non tam facile substituendo

Catharina, amica mea sociologiae perita, dicit non esse rem tam simplicem cerebrum transplantatione chirurgica substituere. Secundum, ut ait, professorem António Rosa Damásio, neurologum praeclarum Lustianum, functiones, quas putabamus usque nuper stricte cerebrales esse, quasi aliis quoque partibus corporis uti necnon fortasse non solo cerebro regi.
Disputationem de hac re tempore cenae apud Catharinam amicumque eius habuimus. Mihi in mentem venit substitutionem cerebri optimam solutionem fore alcoholicis - nam novo cerebro instructi fortasse morbo suo vetere non porro laborabunt. Aut, si recte putat Damásio, laborabunt.  

środa, 30 marca 2016

Nugae de domo mea (porro)

Hodie est mihi dies vero Wittgensteinianus: rogo ex. gr. meipsum, utrum haec dextera aut sinistra manus, quam ante oculos clare video, mea vero sit. Mea, certe, mea... At unde sciam? Num legi id aliquo in libro? Aliquis mihi dixit eam meam esse? Et si dixerit, aliquis credibilis?
Aut, si naturaliter sit mente accipere hanc (et alteram) manum meam/meas esse, ubi finis meipsi? Ante ungues digitorum an post? An fortasse iam in extremitatibus cerebri – tunc omnes ceterae corporis partes alienae sint ac removabiles (medicina hodierna omnes fere tales corporis partes substitui scit, sed mox quoque caput ipsum cum cerebro mutare medici valebunt).
Petrus, collega quem 30 annos non vidi, me per paginam Facebookianam invenit, scribit se in Canada vivere, mox terram patriam visurus, rogat utrum convenire eum velim. Certe velim, sed... 30 annos ante videtur mihi quasi altera quaedam vita (incarnatio praeterita), non ego hic homo sum, quem Petrus memoria tenet. An volo ego me Petrum novum amicum convenire/facere? Cur immo eum? Non est amicitia homini quinquagenario res tam facilis (spontanea, naturalis) quam erat vicenario...
Ceterum matrem de Sabina hic modo descripta rogavi. Et, patet, non recte scripsi. Non erat enim consanguinea mea. Sabina, secundum matrem meam, erat matertera Darcii, collegae mei, quocum in pueritia (4-9 annorum) arcta amicitia iungebar. Nos tres – ego, Darcius et Adam (puer uno anno nobis minor natu) – saepe una custodiebamur a parentibus aut iis consanguineis amicisve. Sabina ergo erat soror matris Darcii. Aut patris. Aut amica matris. Mater mea nescit eius (=Sabinae) postea sortem.
Darcius cum parentibus in tertia tabulatione nostrae insulae vixerunt, Adam in proxima nostrae insula; adhuc memini numerorum habitaculorum Darcii (40) et Adam (7); nam in Polonia habitacula numeros habent (in nonnullis terris, ut Croatia, mos omnino ignotus – ibi ianuae titulus cum nomine habitatoris affigitur, numerus tamen nullus).
Non facile sit mihi dominam K., matrem Darcii, de Sabina rogare, nam... Domina K. mulier catholice piissima facta in senectute est, omnes in conspectu signo crucis salutat. Nihil mali facit, sed... paululum timeo eam de qualibet re adloqui. Ipse Darcius iam diu schizophrenia gravi laborat, bis saltem vitae finem ponere conatus esse dicitur. Pater Darcii eos reliquit ante multos annos. Omnes nostri patres (fortasse non Adam?) nos reliquerunt, tot annos antea, ne id porro doleat. Ipsi idem pueris nostris facimus.
De Adam nihil scio. Sine dubio tamen, ut quisque nostrum, sua via suaque Minerva abyssum continuo petit.
---
Quantus dies! Quantus vesper! Quantae tandem tenebrae! Quasi Mortem ipsam in angulo aulae cachinnantem audires (sed cachinnatus iste mollis est, minime horribilis). Talibus diebus re vera vivere cupio. 

poniedziałek, 28 marca 2016

De morbis vi mentis simulandis

Ingenium(?) mihi inesse morbos simulare. Id est, non omnes morbos, sed grippam. In spatio plus minusve unius horae possum meipsum sola vi cogitationis in statum adducere, ubi omnes circum me putent me aegrotare: sternuo graviter, pituitae magnam copiam naribus produco, voce raucissima loquor, oculos rubentes habeo, faciem turgidam; solum febri (temperie scilicet corporis altiore quam 36,6 gradus Celsianos) non laboro – hanc solam artem imitari non valeo. Condicio tamen huius imitationis est una: manere debeo inter homines, in praesentia quibus male me sentiam (quod facile est, nam cum omnibus fere, si diutius una tempus tero, stomachor; homo enim minime sociabilis sum); si autem psychice bene me habeo, grippam simulare nullo modo possum.
Tempore ergo dierum festivorum, cum una cum familia manere debeo nulloque alio asylo mihi dato, "aegrotare" soleo. Ut heri. Ceterum, non est fortasse hoc meum "ingenium" tantopere egoisticum ut id modo descripsi: re vera (i.e. corporaliter) laborare talibus in momentis incipio, consilio mei non tam voluntario quam subconscientia ductus.  
Doleo me hanc artem possidere nescivi tempore pueritiae, cum schola saepe molestissima mihi adeunda erat. Primum enim expertus sum "morbum" meum modo post matrimonium, cum iuvenis 24 annos natus fui, cum scilicet intellexissem me non-mihi-destinatam mulierem uxorem duxisse. "Morbis" tunc permultis laborare coepi, quorum symptomata ceterum sat gravia viderentur (ut excessus sub cute, quasi fibromata). Nesciens quid mecum eveniret, medicum Americanum (nam in Ohio, uxoris patria, degebamus) adire coepi, qui me multoties investigavit nihil mali in corpore inveniens.
Tunc causam intellexi, uxorem reliqui (sex menses post matrimonium); dolores omnes spatio duarum septimanarum evanuerunt.
Tali ingenio volo instructum esse personam *detectoris* in fabula mea (futura) criminali. Licet aliter quam ego, detector/indagator ille sua arte semper ad libitum uti possit.

niedziela, 27 marca 2016

De superstitionibus nostratum (aut potius: mei)

Ad scriptum de superstitione spectante ad temperiem antepaschalem, ubi dico de superstitione "nonnullorum veterum Polonorum", adieci notam: "saltem in mea magna familia". Nam, cogitabam, fortasse iniuste nostratibus imputo res, quas re vera de domo mei tantum meminerim [ceterum, ver verum re vera coepit hodie, die Pachatis, saltem apud nos ruri prope Wengroviam: 14 gradus Celsianos habemus, Solem sine nubibus; exspectamus advolatum ex Africa ciconiarum]. Scripsi "magna familia", nam re vera de duobus talibus veteribus personis cogito, quarum una non est fortasse mihi consanguinea - fortasse nam habui ut puer haud parvum numerum "materterarum" aut "aviarum-materterarum" etc., quarum ad meipsum relationem numquam potui nec hodie possum facile enodare. In memoria mea remanent hodie ut personae obscurae, quasi sagae fabulas miras saepe mihi narrantes. Uni harum, memini, nomen fuisse Sabinae - rarissimum hodie in Polonia nomen; illa de larvis mortuorum narrabat, asseverans has re vera adesse, necnon de artibus magicis feminarum rusticarum (usque hodie nomen Sabina associat in memoria mea sagis maleficisque).
Interdum rogo meipsum utrum haec omnia re vera mihi accesserint an solum ludus imaginationis sint. Sed sine dubio Sabinam vixisse, mihi in pueritia prope adesse, deinde... evanuit illa, nescio quam ob rem.
Sine dubio quoque mater mea usque nuper stomachabatur, si ei labor exercendus esset die Solis, licet non tantopere pia catholica sit (aut saltem olim esset). Iam ut adulescens animadverti eam fugere, quin uteretur die Dominica machina lavatoria aut pulverihaustro (quod puto Latinum nomen esse pro Anglico vacuum cleaner - si fallor, ignoscat mihi lector: ruri sum, sine dictionario Neolatinitatis), nam aliter vicini nostri audirent nos "laborem" diei Dominicae a Sacra Scriptura prohibitum exercere. Mater scit me hunc morem risum movere, ergo, rogata de ea re, respondebat nihil obstare usui machinae lavatoriae etiam die Solis, sed... omnia faciebat, ut alio quodam die vestes etc. in machina lavarentur.
Sed res mirum in modum mutantur. Ante septimanam visitavi matrem die Dominica Florum (nos Poloni Dominica Palmarum dicimus) et rogavi, utrum eodem die lavationem lavandariorum perficeremus - nam ipsa iam nimis debilis est, ut machina uti possit. Tunc, contra meam opinionem, mater dixit:
- Certe faciemus. Peccatum esse non die Solis machina lavatoria uti, sed sordibus vestibus vestiri!
His auditis, aliquantulum obstupefactus, volui machinam in motum movere, sed... non potui. Timui aliquid horribile eventurum - aeronavim in aedem matris illidere, ictum tromocraticum ab Arabibus perfectum iri aut dentes meos omnes subito pessum ire atque ex ore in pavimentum decidere. Lavationem procrastinavi* in proximam matris visitationem, i.e. diem Martis.
* si 'procrastinare' sensu largiore non solum in 'crastinum' significare potest; id spero  

sobota, 26 marca 2016

De significatione signi Serum pro muliere

Non esse verum quod Karen Fowler scribit in libro - ceterum lectu cuique digno! - "Felicissimi sumus" (We Are All Completely Beside Ourselves), signum linguae Sinensis pro 'muliere':

pronuntiatum 'nu', monstrare marem ante mulierem genibus flexis supplicantem. Significat enim simpliciter mulierem coxis latis praeditam. Mens feministica semper mihi grata est, sed veritas gratior.

Superstio nostratum ad temperiem antepaschalem spectans

Dies Saturni antepaschalis Varsoviae caelum nubibus obductum spectamus, pluit, temperies vix 6 graduum Celsianorum tempore diei, nocte tamen modo praeterita 0 °C habuimus, gelu in aqua stagnorum apparente. Ver quasi adest et simul deest.
Nonnulli Poloni veteres - saltem in mea magna familia - dicunt ver fieri ver verum demum post Pascha. At dies Paschatis cadere potest in calendario Gregoriano inter 22 Martis et 25 Aprilis, intra spatium ergo 35 dierum, secundum regulam Pascha computandi: prima Domenica (=dies Solis) post primum plenilunium post aequinoctium vernum[1] (plenilunium modo ante 2 noctes habuimus). Ergo, dicunt hi homines veteres, si cadit Pacha fere in finem Aprilis, ver serum hoc anno fiet; si econtra in fine Martis, ver maturum. Sed nullo modo ante Pacha dies tepidi fient!
Fortasse vero ita est, nam scimus phases Lunae ad temperiem naturamque effectum habere. Cum annis meae iuventutis – ergo usque nuper – itineribus solitariis lintro Equimensi (Anglice kayak) factis fruebar, videbantur mihi noctes sub Iove (in tabernaculo scilicet) gestae ante Pascha frigidissimae. Deo gratia nunc, senex modo factus, itinera talia non porro facio ac in lectulo meo dormire malo.




[1] Eo modo 14 dies mensis Nisan, dies sc. Paschatis, a Iudaeis calculatur. Ceterum anno 1913, actore Pio X, ecclesia catholica conata est diem in calendario fixum Paschati invenire, sed maior pars de hac re rogatorum episcoporum huic consilio reclamaverunt.

piątek, 25 marca 2016

De magistris insanis

Ante septem abhinc annos privignus meus Gustavus, tunc puer 11 annorum, iussus est - ut et ceteri eiusdem ludi discipuli - a magistro scribere elaborationem ad thema: Utrum his, quos amamus, libertatem dare debeamus. Scripsit Gustavolus miser elaborationem incipientem plus minusve hoc modo: Mater mea nescit quid faciat - soror enim mea natu maior (17 annorum) valde velit in tabernam nocturnam una cum amicis ire, at omnes scimus ibi multa alcoholia bibuntur (etiam a pueris puellisve nondum 18 annos natis, ergo lege non adultis), nicotiana fumantur, narcotica sumuntur...
Scripsit ergo Gustavus noster elaborationem usque finem atque notam bonam pro ea accepit, nihilominus... puto hunc magistrum aut in carcerem, aut in asylum delirantium esse mittendum! Non sunt enim 11 annorum pueri, ut de talibus cogitent.
Simili modo meam magistram Sinicam (re vera Americano-Sinica fuit) vellem in Martis aut alium planetam a me alienissimum mittere pro elaboratione, quam apud me et mei constudentes a. 1996 poposcit: Si holus fierem, quod genus [holerum] et cur? Certe adultus iam eram, sed... ad bestias cum istis magistris! Iam non memini, quod holus meipsum fieri velle elegerim, fortasse malum granatum.


środa, 23 marca 2016

Nuntii Iconoclastae plus minusve praeteritae septimanae

Biocolytae Belgici negant nuntio diurnario Najim Laachraoui Anderlechiae apprehensum; machinatorem istum tromocratiae adhuc quaesitum esse a vigilibus publicis.

Musulmanos non satis facere ad tromocrates reperiendos dixit Donald Trump, qui verisimiliter candidatus republicanorum fiet in munus praesidis USA. Trump modo victor discessit in prae-electione in civitate Arizona habita; eadem electione suffragia democratarum sibi vicit Hillary Clinton. Antea Trump postulavit omnes cives terrarum islamicarum prohibitum iri Civitates Foederatas Americae intrare.

Najim Laachraoui, unus trium tromocratarum, qui duos ictus in aeriportum Zaventem heri perfecerunt, apprehensus est Anderlechiae in suburbio Bruxellensi a musulmanis magna e parte habitato. Alteri ambo, fratres Ibrahim et Khalid El Bakraoui, mortui sunt morte suicidario in ictibus.

Novissimum computum victimarum Bruxellis esse: 34 mortuos, plus quam 200 sauciatos.

Saltem 13 homines necati sunt Bruxellis in serie ictuum tromocraticorum contra aeriportum Zaventem necnon stationes traminis subterranei.

Barack Obama et dux Cubae Raul Castro convenerunt una Havanae. Iter Cubanum esse primum ab 88 annis visitationem huius insulae a praeside USA.

Aeronavis vectoria 62 homines Dubai Rostoviam (Russorum) vehens in terram decidit in aeriportu Rostoviensi. Nemo sospes nuntiatur.

Constantinopoli 4 aut 5 homines vitam amiserunt et plus quam 20 sauciati sunt in ictu tromocratico ab ignotis peracto. Ictus patratus est in tribu Istiklal nota plateis mercatoriis ac semper peregrinatoribus plena.

Biocolytae Bruxellenses apprehenderunt tres viros, quos suspicantur adfuisse ictibus tromocraticis 13 Novembris Lutetiae patratis. Inter prehensos adesse et ducem tromocratorum Salah Abdeslam.

Clade in praecomitiis Floridensibus accepta, Marcus Rubio decrevit se statum candidati factionis republicanorum in munus praesidis USA porro non petiturum. Rebus ita stantibus constat luctatores in electione praesidis fore Donaldum Trump (pro republicanis) et Hillariam Clinton, quae inter democratas facillime vicitrix discessit praecomitiorum in quattuor civitatibus modo habitorum.
Matriti fures rapuerunt e domo privata 5 picturas Francisci Bacon, valore summo 30 milionum euro. 
Novissimum computum victimarum ictus tromocratici Ancyrae Turcorum esse: 37 mortuos, plus quam 120 sauciatos. Ictum peractum esse displosione autoraedae, materia displosiva plenae.

wtorek, 22 marca 2016

Venenum in garo/liquamine

Fabulam criminalem scribere volo, quae agatur Romae caesarum (sed tempore cuius caesaris, nondum decrevi, fortasse Constantini Magni, modo antequam caput imperii Constantinopolim motum iri). Quattuor-quinque protagonistas plus minusve excogitatos mente teneo, crimen quoque (sc. quomodo et a quo patratus sit etc.), licet multo non totum. Una re tamen certus sum: necem – nam fabula unius tantum necis erit (si omnino erit) – effectam esse veneno in garo condito, nam acerrimus sapor odorque gari facile venenum celat.
Perscrutavi ergo librum "Crimina plantarum" auctricis Americanae Amy Stewart et inveni ibi venenum mihi optimum: Conium maculatum (ita Linneanice nuncupatum), saepissime pro Cicuta virosa, aut vice versa, in scriptis per errorem permutatum: ita e.gr. multi rerum botanicarum periti putant Socratem re vera non cicuta sed conio necatum esse, nam a Platone descripta symptomata – ut torpor membrorum e pedibus usque cor progrediens – potius ad conium spectent.
Quid tamen cum liquamine esse conio gerendum? Respondeo: folia conii iuvenis forma simillima sint foliolis petroselini. Petroselinum autem – praeter alia holera herbaeve, ut anethum, foeniculum, coriandrum, apium, satureia, salvia, ruta, mentha, ligustrum, thymum et amaracum – adhibebatur in garo faciendo.
Odore acerrimo conium statim ab hominibus cognoscitur, sed... in iure e piscibus fermentescentibus facto omnis alius odor foetorve evanescit. Ita saltem puto et tali modo volo victimam meam occidere. Dent Dii mihi otium ad scribendum necessarium!

Visitatio archaeologae iuvenis

Privigna mea, Susanna, archaeologiae studens, me subito visitavit et inter alia dixit haec:
- ope echopercontatrorum in sepulcro pharaonis Tutenchamonis reperta sunt duo adhuc omnino studiosis ignota conclavia; quis scit quid intus inveniatur???
- fieri potest ut nova conclavia (androne iis addito) ducant in sepulchrum reginae Nephertitis
- trepanationem cerebri adhibitam in Aegypto a medicis fuisse ad hemicraniam medendam
- ceterum Trinitatem Christianam originem habere – secundum theoriam professoris Andreae (Andrzej) Niwiński – in triade deorum Aegyptiorum: Maat, Atum et... [tertius dei nominis privigna oblita est]; hoc, si verum est, mihi maximi momenti, nam idea Trinitatis – Deus-Pater, Filius et Spiritus Sanctus – alienissima a mente mea remanet.
Utinam saepius Susanna me visitet! Malo tales nuntios quam quod in actis diurnis lego de rebus tristissimis temporis nostri.

czwartek, 17 marca 2016

Garum pro sale?

Vicipaedia (versio Polona) nuntiat, citans encyclopaediam culinariam Solomonis Katz: Garum apparet in maxima parte praescriptorum coquendi, quae servantur apud Apicium (De re coquinaria); simul in parvo harum praescriptionum numero apparet sal. Possumus ita coniectare garum pro sale adhibebatur. (Solomon H. Katz (redactor): Encyclopedia of Food and Culture. Tomus III, capitulum: Rome and the Roman Empire, auctore Andrew Dalby. Domus editoria Thomson-Gale, 2003, p. 212).

Coniecturam ego rectam puto. Quoque apud Sinenses sal vix umquam in culina apparet, adhibent autem eius loco ius glycineum (Anglice soya souce).  

środa, 16 marca 2016

Carmen patrium USA

Eduardus Casey misit sodalibus GLL suam versionem ("e variis versionibus compilatam et conflatam") carminis patrii sive hymni Civitatum Unitarum Americae Septentrionalis, vulgo "Star Spangled Banner", i.e. "Vexillum stellis tectum". En ea:
O, videre potestis per lucem aurorae
Quod vespere heri triumphantes salutabamus
Vexillum cuius clavi lati et stellae clarae
Per pugnam ad moenia fluitare videbamus
Et falaricae fulgor et globi ignei noctu in aere
Dirumpentes, vexillum adesse nobis monstrabant
O dicite maneatne usque vexillum stellis conspersum
Illud super terram liberorum et domum fortium.

wtorek, 15 marca 2016

De verbo-monstro trium litterarum

Num quislibet homo quinque errores facere potest scribendo verbum trium litterarum? Potest, si homo hic imperatrix Russiae Catharina Magna II (1729-1796) est. Nata Stetini, gente Germana, Catharina numquam lingua Russica callebat. At verbum 3-litterarum, de quo agitur, fuisse еще ('porro, ultra'), quod tribus litteris scribitur solum apud Russos; Latine id transscriberem (i)estio, Anglice yeshcho. Nimirum quinque errores continere id monstrum potest!
*** ***
(Latine autem 'verbum trium litterarum' furem significat. Sed hic de alia re.

niedziela, 13 marca 2016

Nuntii Iconoclastae plus minusve praeteritae septimanae

Saltem 27 homines vitam amiserunt et 75 sauciati sunt in ictu tromocratico prope forum Kizilay urbis capitalis Ancyrae patrato. Auctores facinoris ignoti manent, biocolytae Turcici suspicantur tamen Civitatem Islamicam aut Kurdos.

Europaea Argentaria Centralis (EBC) minuit iam diu negativam usuram depositariam ex -0,3% in -0,4%. Insuper annuntiavit EBC sibi abhinc licebit singulis mensibus usque 80 miliarda euronum "pecuniae vacuae" imprimere (adhuc limes fuit 60 mld EUR). Nuntiis allatis, nummus euro vilescit, fora autem Europaea crescunt.

Denuo crescit petrolei pretium: die Martis Londinio petroleum Brent plus quam 40 dolariis per dolium venum dabatur, dum Neoeboraci petroleum WTI fere 40$ constabat.

Russa Maria Sharapova, mulier teniludii in orbe terrarum peritissima, admisit se tempore certaminis Austrialian Open dopaminibus usam esse.

Obiit 74 annorum Ray Tomlison, programmator computatralis Americanus, qui notus est inventione epistularum electronicarum (1971). Ipse est etiam inventor symboli @ in inscriptionibus electronicis adhibiti.

Mortua est 94 annos nata Nancy Reagan, uxor praesidis USA annorum 1981-89 Ronald Reagan.

Saltem 60 homines vitam amiserunt et plus quam 70 sauciati sunt ob ictum tromocraticum Civitatis Islamicae (ISIS) contra milites Iraquienses custodientes portam viariam urbis al-Hilla. In stationem militum suicida-bellator ISIS invexit autoraedam onerariam materia displosiva plenam.

Remotissimum omnium adhuc repertorum galaxiam invenerunt astronomi ope telescopii Hubble. GN-z11 creditur factum esse "tantum" 400 milionibus annorum post Magnam Eruptionem. Lux autem eius ad Terram pervenit spatio 13,4 miliardorum annorum. Nova inventione astronomi putant se nunc observare 97% totius historiae Universi.

Ted Cruz victorem discessit prae-electionis in Cansia habitae; rebus ita stantibus periti nunc putant eum potius quam Donald Trump candidatum republicanorum in suffragiis preaesidis USA fore. 

piątek, 11 marca 2016

Cena cum Thoma Cunliffe

Dignatus hodie sum honore omni nautae haud parvo: cenavi una cum Thoma (Tom) Cunliffe, Britanno nauta preaeclaro scriptoreque librorum ad artem navgandi spectantium. Ut nauta minime peritus ausus sum de "omni re scibili et nonnullis aliis" Thomam rogare, ceteris nobiscum cenantibus, nautis valde peritis, ob audaciam meam paululum fortasse stomachantibus. Sed, cogitavi, fortasse solam in vita mihi nunc occasionem fore, ut de talibus rebus virum hunc rogarem.
Inter alia rogavi quod mare, qui sinus, quaeve insulae etc. ei personaliter ad navigandum gratissimae viderentur – nam aderat tot aquis in toto fere mundo! Respondit breviter, quasi Iulius Caesar in "Bello Gallico":
- Propter ventum: Mare Caribicum et nihil usquam ei comparabile. Propter litoris pulchritudinem: archipelagus Holmiensis. Propter iucunditatem navigandi: haec semper de nautis praesentibus pendet; in bona sodalitate omne iter bonum. 

Loco pecuniae... stuprum

Secundum renuntiationem agenturae Reuterianae, magistratus Sudaniae Meridionalis, cum pecunia iis deesset ad stipendia militibus solvenda - at terra haec ab anno 2013 bello civili infestatur cum nonnullis denis milium victimarum - siverunt militibus loco stipendii... licentia uti mulieres stuprare in vicis oppidisque ab inimico captis. Quod ceterum iam diu milites omnium huius belli partium facere solebant, adhuc tamen inofficialiter.
Regimen Sudaniae Meridionalis negat nuntium Reuterianum verum esse.  

De imperiis sempiternis

Symbolam mea sententia maximi historiam amantibus momenti, de voluntate scilicet hominum se ab imperatoribus regi, divulgavit in "Ephemeride" Marcus Cristini:
http://alcuinus.net/ephemeris/opiniones.php?id=1408

czwartek, 10 marca 2016

De 'matricis' origine

Ante tres dies, in colloquiis lunariis[1], locuti sumus, inter alias res, etiam de idea 'matricis' sive alterius (ficti, non veri) mundi[2]. Quis scilicet fuerit inventor 'matricis': fratres (nunc sorores[3]) Wachowski, Philippus K. Dick, an Plato?  
Fratres/sorores Wachowski:
Pelliculas Wachowskianas (prima pars divulgata a. 1999) omnes, puto, vidimus. 'Matricem' esse ibi mundum fictum a machinis (mundi veri dominis), ad usum hominum (in vero mundo servorum sui dominorum, i.e. machinarum), ut hi putent se in mundo quasi ideali vivere (dum re vera solus eorum, i.e. hominum, usus erat materia horum corporis, ex qua vim electricam machinae producerent). 'Matrix' exstat ergo tantum in imaginibus hominum, quorum cerebra visione falsa imbutae sunt. Adesse tamen – contra voluntatem machinarum – nonnullis hominibus facultatem verum mundum interdum visendi atque intellegendi se in ficto mundo vivere; secundum opinionem unius protagonistarum – machinae-agentis Smith – causam huius rei esse nimium apud homines amorem doloris.
Philippus K. Dick: ...
In fabula Dickiana "Dominus altae arcis" (a. 1962 divulgata) habemus homines credentes se vivere in orbe terrarum, ubi regnat Germania Hitleriana necnon socia ei Iaponia; ab his USA, Britannia et Unio Sovietica tempore alterius belli mundani superatae occupataeque sunt. Adesse tamen populo gratum (licet a magistratibus prohibitum) apocryphum, ubi vera historia mundi quasi fictio descripta sit. Ceterum, in rebus veris, quae sint, cognoscendi adiuvat protagonistis "Yijing" sive "Liber metamorphoseon" (popularis liber-oraculum Sericus); vident veritatem quoque nonnulli morbis laborantes ut Nobosuke Tagomi. Nemo tamen fere credit has res, quae vident/suspiciuntur, veras esse.
Plato:
Ut scimus, Platonem putasse adesse duos mundos: verum mundum idearum et falsum mundum materialem; hunc tantum imaginem (emanationem) illius esse, ceterum imaginem imperfectam, sicut umbra alicuius rei in pariete ad lucem candelae visa. Inde incompleta, mutans et imperfecta sit natura rerum mundi materialis. Quae conceptio Platonis originem habuit in theoremate metamorphosis Heracliti: huic mutatio quaelibet non placuit, nam res abigeret a prisca earum idea. Et Heraclitus et Plato ut optimum ens putabant esse stabilitatem/constantiam.
Sed ubi stabilitas in mundo temporis nostri? Omnia mutantur celerius quam sexus Wachowskianus.



[1] Sunt colloquia hebdomadalia latinistarum, unoquoque die Lunae hora 18:30 in bibliotheca Instituti Philologiae Classicae Universitatis Studiorum Varsoviensis habita.
[2] Est 'matrix', mea sententia, sub-genus 'historiae alternativae' (latinius fortasse: 'h. alterae'), ubi duo simul mundi exstent (nam typica historia alter[nativ]a pingit unum 'mundum qui exstaret, si...').
[3] Anno 2012 unus fratrum, Larry, sexum mutavit, nomine Lana abhinc utens; die autem 9 m. Martio huius (2016) anni sexum mutavit alter fratrum Wachowski, Andy, qui nunc Lilly Wachowski nominatur.

środa, 9 marca 2016

Lamentationes AD MMIV

In veteri fasciculo notarum, quem domum purgans subito repperi, inveni talia ante 12 fere annos a me scripta:
- Nolo hodie, neque ceteris quidem diebus, nimis festinare, nam ad meipsius sepulturam, quaeque interea ne fecerim, serius non adveniam.
- Cognovi mulierem perpulchram, sed sexualiter frigidissimam. Quod iam primum scivi, cum dixisset se odisse intestina, ut omassum, gustare.
- Iam me puero, cum Carolum Marx legere coepissem, timui unde "valor additus" produceretur, nam omnes circum me vita fessi non laborant, sed laborem simulantur; me non excepto. [Sed hic mentitus sum, nam numquam, neque in pueritia, nec postea, scripta Caroli Marx legi, praeter unam symbolam quam Latine composuit: http://www.thelatinlibrary.com/marx.html]
- Spero me in quadam altera, parallela vita (quae utinam aliquo in puncto universi exstet!) progressum facere, nam in hac, ista mei exsistentia iaceo.
Hodie risum mihi movent haec scripta, inepta et simul quasi arrogantiae(?) plena. Sed, dicunt studiosi, omni septimo anno vitae mutantur omnes cellae in corpore humano, ergo non sum porro hic homo qui tunc, ante abhinc XII annos, fui.

Europam pessimam partem mundi?

Adesse fabulam Arabicam, quae ex ore in aures audientium narrabatur a poetis vagantibus plus minusve 50 annos post mortem Prohhetae (tunc demum papyro inscripta est), docentem mundum esse forma similem permagnae avi.
Terra enim in quinque partes dividitur atque avis formam habet, cum capite, duabus alis, pectore ac cauda. Caput mundi esse Sinas, post id adest regio, ubi gens Wak-wak habitat. Deinde, post Wak-wak, tot gentes, ne aliquem praeter Deum eas nominare scire. Alam dexteram esse Indiam, post Indos tantum mare sine ullis animalibus. Alam laevam esse al-Chazar (regnum Chazarorum). Post al-Chazar duo sunt populi, unus Manssak, alter Massak, deinde Iaddud et Maddud (Gog et Magog), qui oriuntur e gentibus soli Deo notis. Pectus avis est Mecca, Hiddaz, Syria, Iraquia et Aegyptus. Cauda extenditur e Dhat al-Humama usque Maghreb (Morochium). Caudam esse pessimam avis partem.  
Etiam si nescimus qui locus sit Dhat al-Humama (hodierna Libya?), sine dubio caudam esse regionem Mediterraneam, quae serius in 'Europam' hodierno sensu evolvit, meridionalibus partibus Imperii Romani ab Arabibus occupatis. Nam mala opinio "caudae" minime prohibuit Prophetae filios quin eam consumerent usque Pictavium (Poitiers).

wtorek, 8 marca 2016

Dialogus tempori nostro aptatus

- Quid tecum? Malus mihi hodie videris...?
- Vero? Cur?
- Quasi meditans, aliquid considerans.
- Ita. Cogito...
- Noli! Peciculosum est.
- Sed dicunt...
- Dicant quid velint. Stulti sunt.
- Dicunt: cogito, ergo sum.
- Bene, esto. Sed noli cogitare.

Facetia (a Brenno Legrano praebita)

Uxor: Quid hodie facis, mi care?
Maritus: Nihil, deliciae meae.
U.: Sed hoc heri fecisti.
M.: Nondum finivi.

niedziela, 6 marca 2016

Rogationes in Plinium (2)

Num de poppyzantibus linguis Africae Plinius dicit, narrans (V, 1): Africam Graeci Libyam appellavere et mare ante eam Libycum; Aegyptio finitur... populorum eius oppidorumque nomina vel maxime sunt ineffabilia praeterquam ipsorum linguis...?
xxx
De flumine Nigre cum scribit Plinius (multis in locis partium V-VI), puto eum re vera de hodierno flumine eiusdem nominis dicere, sit illud remotissimum ab oris Libycis/Mediterraneis videaturque non posse a Romanis Graecisve attingi (memores simus tamen fabulae de circumnavigatione Africae a Poenis quasi facta!). Dictionarium Lewis & Short de eo fluvio caute: a river in Africa. Me tamen aliter sentire cogunt talia ut: ...et tota Gaetulia ad flumen Nigrim, qui Africam ab Aethiopia dirimit...; Nigri fluvio eadem natura quae Nilo. Calamum ac papyrum et easdem gignit animantes isdemque temporibus augescit [num inveniemus in Africae parte septentrionali alterum amnem qui Nilo similis nominari auderet? ceterum miscet fontes amborum Plinius, Nilo enim originem, auctoritate regis Iubae, in monte inferioris Mauretaniae non procul oceano adesse dicit; aliio in loco autem correctius (fortasse?): Quidem et Pygmaeorum gentem prodiderunt inter paludes ex quibus Nilus oriretur...]. Iuxta ripam Nigris nuntiat habitare fabulosos Aegipanas semiferos et Blemmyas et Gamphasantas et Satyros et Himantopodas, quos etiam brevissime examinare nimis est, ut nunc id faciam.
xxx
Quomodo fit ut cum montes Ripaeos (hodie Ural) nonnulla vice nuntiet, numquam memoret rivum ingentem Rha (Volham), qui in his montibus fontem habet, Caspianumque mare abinde petit? Nulla est quoque mentio rha barbarum (nomen indeclinabile?), quae planta, nota quoque ut radix Pontica, in ripis Rha/Volhae cresci putabatur.

sobota, 5 marca 2016

Proximitas maris in insaniam ducit?

(fons: American Psychological Association)

Sed eodem tempore scimus incolas amborum litorum maritimorum Americae Septentrionalis magis educatos esse quam cives regionum partis mediae. Necnon "oppida stultorum", ut sunt in populi fabulis Gotham (in Anglia), Spisska Bela (Slovacorum) aut Pacanów (in Polonia), semper loca a mari remota sunt.
Fortasse nimia scientia rerum insaniam inducit?

piątek, 4 marca 2016

Kukeri sive dionysiae hodiernorum Bulgarorum

Bulgari habent tempore carnelevarii – quod tempus apud eos serius nostro evenit, secundum calendarium Iulianum necnon calculationem diei Paschatis, qui dies exempli gratia hoc anno demum Kalendis Maiis in Oriente cadit (dum apud nos iam 27 d. m. Martii) – festum kukeri sive pompam celebrem "pilosorum" saltantium. Quos incolae putant morbos, strigas, malamque fortunam abigere. "Pilosi" visitant omnem urbem, oppidum sive vicum, ambulantes et saltantes – magna pars saltationum noctu fit, ut in mysteriis dionysiis Threiciis, ex quibus ceterum festum kukeri secundum anthropologos originem trahit.
Nomen autem kukeri e Latino cuculla provenisse putatur, ergo verisimiliter e tempore gubernationis in hodierna Bulgaria Romanorum. Alterum nomen festi esse dervishi – re vera praeter "pilosos" pompae adsunt saltatores cucullis altissimis quasi-dervishianis ornati: videlicet miscetur hic traditio vetus Threicia cum non-tam-veteri ritu Turcico. Dicunt similia festa adesse Italis (mamutones) et Hispanis (zaramacos).
Officialis causa kukeri celebrandi esse anniversarium pacti pacis in vico Sancti Stephani ad Constantinopolim 3 die m. Martii a. 1878 subscripti - tunc, post bellum Russiae cum Turcia, Bulgaria sui iuris terra facta est.  

środa, 2 marca 2016

Nuntii Iconoclastae praeteritae (plus minusve) septimanae

In terram post volatum cosmicum fere unius anni appulerunt astronauta Americanus Scott Kelly et cosmonauta Russus Mihkail Kornienko. Kelly in quattuor iam volatibus in spatio cosmico mansit omino per 520 dies.

Donald Trump inter republicanos et Hillary Clinton inter democratas victores facti sunt prae-suffragiorum heri – die Martis maximo [Super Tuesday] – in 11 US-civitatibus habitis. Ambo in 7 civitatibus suos collegas-candidatos superaverunt.
Primum post memoriam gentium hieme homini contigit culmen Himalaicum Nanga Parbat (8.126 metris super mare) ascendere. Nomina ascensorum, quibus id contigit: Alex Txikon, Ali Sadpara et Simone Moro. Nunc solus mons in regione Himalaiorum-Caracorum hieme nondum ab homine superatus remanet K2.
Donald Trump, politicus extremae partis republicanorum, victor discessit prae-suffragiorum habitorum in US-civitate Nevada, 45% suffragiis sibi datis. Iam fere certum esse Trump nominatum iri candidatum republicanorum in electione praesidis Civitatum Unitarum.
Burgimagister Londinensis Boris Johnson dixit se plebis scitu 23 Iunii suffragium daturum exitui Britanniae ex Unione Europaea, licet minister primarius et dux conservatistarum (quibus et Johnson favet) David Cameron aliter sentiat (vul Britannos in UE manere).
Mortua est 89 annorum Harper Lee, scriptrix US-Americana, nota imprimis libro "Necare turdum".
Diem ultimum obiit Umberto Eco, anno 1932 natus Italus semiologus, philosophus, historicus medii aevi, scriptor fabularum, quorum maxime nota fuit "Nomen rosae"

wtorek, 1 marca 2016

Denuo de lingua communi Europae esse curandum

Quae lingua fiet Europae principalis postquam, ut demoscopiis exspectatur, 23 Iunii plebis scitu Britanni decreverint se Unionem Europaeam relicturos?
Nunc habet Europa 24 linguas officiales, quarum tres – Anglica, Gallica et Theodisca – sint linguae "procedurales" (in quas scilicet omnia Commissionis Europaeae etc. documenta debeant verti). Re vera tamen lingua communicationis inter grapheocratas Bruxellenses Anglica est. Quid ergo post exitum Britanniae? Num sine Anglis porro Anglice loquemur? Ita puto, nam est illa vero Latina temporis nostri.
Ceterum, porro Unioni remanebunt Hibernia (=Irlandia) et Melita (=Malta), ubi lingua Anglica altera officialis est (in Hibernia insuper lingua patria plus quam 90% incolarum). Remanebit quoque in UE, etiam post exitum Britanniae, Rupes Calpe (=Gibraltar), si tantum Londinum voci huius rupis incolarum paruerit.

At fortasse bonum esse nunc tempus Bruxellenses de viva Latinitate denuo certiores facere?