wtorek, 26 czerwca 2018

De Syris Ruthenisque

De Syris dicit Plautus: Syrorum, genus quod patientissimumst hominum...
Nos, Poloni, item de Ruthenis Albis (Belorussis) putare solebamus. Iocus fert Ruthenum patibulo extentem pendere unum, alterum tertiumque diem neque mori velle. Aliquis praetereuns rogat: "Cur non moriris, Ruthene?" Ille respondet: "Placet mihi hic. Pendere assuetus sum".

sobota, 23 czerwca 2018

Speculator interretialis Google?

Nonnulli mei amici queruntur se clam indagari sentire a societate Google. Ita, ex. gr., dicunt se, cum ad computatrum interrreti iunctum sedent ac simul, in orbe reali, verba ad amicos vel familiares faciunt, mox in albo computati spectant praeconia rerum, de quibus modo locuti sunt. Aliquis mihi quoque dixit Fratrem Magnum per oculos camerarum, quibus laptopia instructa sunt, scribentes clam inspicere atque omnia, quae vident, analyzare. 
Ego nescio quid de hac re sentiam. Sucpicor Google nonnullas meas epistulas electronicas legere, nam postea in albo computatri re vera video praeconia rerum venalium, quae quadamtenus spectant ad res, de quibus scripserim. "Quadamtenus" dico, certitudinem enim centum centesimarum (100%) huius suspicionis non habeo.
Deo gratia mentem meam Google nondum legit. Si legeret, iam in carcere essem. 
Ceterum, si Latine circum nos communicabimus, non intellexit Google - non facile saltem - sermonem nostrum. 

środa, 20 czerwca 2018

Polonia - Senegalia 1:2, gratia magorum

Amisimus, nos Poloni, ludum primum Certaminis Mundani Pedifolii, quod Moscoviae aliisque in urbibus Russiae decertatur. Senegalenss nos proportione portarum 2:1 superaverunt.
Hodie in situ interretiali radiophoniae Polonorum Radio Zet inveni nuntium: "Senegalenss vicisse, nam regimen istorum pecuniam magis dedit, ut arte magica pedilusores adiuvarent". At Poloni magos non habent?

sobota, 16 czerwca 2018

De nominibus negotiaturarum

Quid significant nomina magnarum societatum negotiatoriarum? Etymologiam nominum septem in re mercatoria gigantum investigaverunt modo diurnariae actorum "Business Insider" Mary Handbury & Emily Cohn.
1. Google. Nomen hoc fructus est longae ac procellosae disputationis inter conditorem negotiationis, Larry Page, et gregem studentium, quos ad nomen aptum inveniendum adhortatus est. Unus horum proposuit vocabulum "googolplex", denotans in sermone mathematico numerum incredibiliter ingentem; discipulus hic tamen pronuntiare id vocbabulum recte non potuit - produxit ore aliquid sonans plus minusve 'google'. Quod nomen Larry Page statim placuit.
2. McDonald's. Raymond Kroc, conditor negotiationis McDonalds's, fuerat primum venditor machinarum gallicaudis lacteis (Anglice milkshake) faciendis. Hic fratres McDonald convenit, isicia Hamburgensia (Anglice burgers) in sui caupona, titulata McDonald's, parvo pretio praebentes. Tres viri decreverunt una rem coquinariam pergere: praebentes praeter hamburgensia etiam gallicaudas lacteas. Kroc postea omnia iura negotiationis a fratribus emit, consilium tamen cepit nomen cauponae (deinde catenae cauponarum) non mutandum.    
3. J. Crew. Societas vestiaria, aemulatrix principalis negotiationis Polo domini Ralph Lauren. Conditor, Arthur Cinader, putavit vocem 'Crew' bene pugnaturam contra 'Polo'. 'J' tamen in fronte additum est, ut elegantior nomen videretur.
4. Rolex.Hans Wilsdorf, creator notae Rolex, voluit nomen negotiationi invenire, quod ab omni incola mundi facile pronuntiaretur. Numerosis crucigrammatis (Anglice crossword), combinationisque litterarum sorte factarum usus est, ullo tamen sine effectu, qui sibi placeret. Deinde, equitans, "vocem divinam" audivit sibi in aurem susurrantem: Rolex!
5. Lululemon. Chip Wilson, conditor huius mercaturae, Iapones non valde amavit, nomen ergo sui societati eligit ab his minime prountiandum, carent enim Iapones phonemate simili Europaeo 'l'.
6. ASOS. Haec mercatura interretialis vestiaria primum (anno 1999) nomine pleno AsSeenOnScreen (UtVideturInAlbo) utebatur. Sed mox omnes acronymo potius uti coeperunt.  
7. Amazon. Conditor huius tabernae librariae interretialis, Jeff Bezos, varia proposita nominis investigabat. Placuebat sibi maxime 'cadabra' (certe ab abracadabra), sed nimis simile sonabat 'cadaver', ergo alterum nomen quaerebat. Placuebat quoque 'relentless' (immisericors), quod tamen quoque a studiosis relationum publicarum (Anglice PR people) sibi dissuasum est. In fine nomen elegit a fluvio sibi valde amato - Rio Amazonas (ita Lusitanice, nostra autem lingua: Flumen Amazonum).

piątek, 15 czerwca 2018

Democratia USA in periculo! (opinio T. Friedmanis)

Amicus noster Eduardus Minnesotianus Latine reddidit symbolam diurnarii Thomae Friedman, qui praemonet res US-Americanas in pessum gubernatione Trumpiana ituras. Ecce symbola:

Quidquid Trump celet iam nobis omnibus nocet

Democratia nostra in periculo gravissimo versatur.

Praeses Trump aut omnino Russis implicatus est aut fatuus infamis vel simul ambo sed utut res se habeat se monstravit invitum aut impotentem ad Americam defendendam contra ambitionem Russicam dividendi democratiam nostram et laedendi.

Aliis verbis, Trumpi imperium rerum immobilium ab nequam oligarchis ad Kremlin annectis accepit magnam pecuniam adeo ut re vera eum corpore et animo possideant; aut fama illa vera est de indecora tractatione sexuali Moscuae patrata dum certamen pulchritudinis Domicellae Universalis moderatus est, quae omnia speculatores Russi in taenia magnetica habent, quaeque vulgo edi non vult ; vel reapse Praesidi Russo Vladimiro Putin credit dicenti se esse insontem criminis intercedendi in suffragia nostra,  contra comperta explicata ipsius Trumpi praefectorum variis agenturis (CIA, NSA, FBI).

Ad summam, Trump aut occultat aliquid tam sibi nocens aut adeo socors est ut ducis principis munere fungi non valet. Nondum possibile est pro certo habere utra harum rationum eius habitus mentis sit vera sed verosimilius una ex his duabus causis explanat Trumpi detrectationem respondendi Russiae incursui in vitam nostram politicam — quiescentiam plane inauditam cuipiam praesidi per historiam Statuum Unitorum. Russia nobis non amica est. Se gessit modo hostili. Trump vero haec omnia neglegere pergit.

Usque adhuc contemnit Trump normas praesidiales. Nunc Trumpi mores efficiunt ad  iusiurandum officii repudiandum — nempe ut protegat defendatque Constitutionem. Ecce similitudo non exacta sed satis
propinqua: Est quasi Georgius W. Bush post cladem diei undecimo Septembris dixisset: "Negotium non magnumst. Pilamalleo lusum ibo in Florida septimana exeunte et in diurno telari meo scribam de culpa factionis Democraticae — opus non est concilium habere de securitate patriae.

Impraesentiarum cum accusator specialis Robertus Mueller — exploratione speculatoria per annos collecta et ad maximum commodum adhibita ab agentibus FBI, CIA, et NSA — detulisset accusationes contra 13 Russos et tres coetus Russicos — omnes quodammodo ad Kremlin annectos — propter interventionem in suffragiis Americanis , opus est praesidem habere qui patriae munimentum ducat contra hunc incursum adversus probitatem suffragiorum nostrorum.

Cui rei simile esset? Populum certiorem faceret de natura mensuraque problematis; omnes participes rei studiosi — civitatis et urbium praefecti suffragiorum, rei publicae magistratus ambarum factionum una cum omnibus dominis retium socialium quibus Russi usi sunt ad vexationem suam perficiendam — ut defensio efficax instituatur; ceterum peritos rerum militarium ac speculatoriarum conferrent ad oppugnationem efficacem instituendam contra Putin — omnium optimam defensionem.

Loco illius ducis probi praesidem habemus qui inepte texticulos electronicos divulgat Russos albis natibus Moscuae deridere de modo quo nos interventum suum  investigamus — necnon sclopetatione terribili in Florida inique utitur — cui accedit defectus agentium ministerii FBI rite certiores faciendi agentes Miamienses apud officinam filialem de indicio homicidio futuro — totum ministerium FBI pessum dat sacrificatque commodi causa ut novum praetextum afferat investigationem Roberti Mueller claudendi.

Cogitadum quantopere mente captus sit auctor textilli nocte Saturni missi:
"Tristissimum illud quod agentes illius FBI multa indicia a sclopetatore Floridano prodita non animadverterint. Hoc nobis omnino non accipiendumst. Nimium temporis insumunt dum collusionem Russorum cum Trumpi certamine suffragiorum demonstrare conarentur — nulla collusio datur. Denuo elementis rerum operam date  et nobis omnibus speciem honestorum praebete!"

Immo vero, ministeria nostra FBI, CIA, et NSA, una cum iurisconsulto speciali collaborantia nobis mirum in modum satisfecerunt. Consilium Russicum detegerunt quo Americanos in dissidium ducerent necnon inclinavit suffragia in comitiis proximis erga Trumpum — hoc est fundamentum ipsum democratiae nostrae everterent — cui accusationi respondet Trump opus esse rebus gravioribus incumbere tamquam vestigiis in antecessum sequi eorum qui fortasse apud scholas homicidia perpetrent. Ita vero concedendum est FBI in Florida erravisse. Sed more Heracleo se gessit contra Russiam. Quidnam maioris momenti quam democratiam Americanam protegere?

Adeo evidens est id quod iste Trump moliri cupit: Aut est homuncio ineptulus illi Putin sed utilis, aut verosimilius aliquid celare vult quod suspicatur Russos de se scire nescio quid pravum. Quare timet Muelleri investigationem quae eo diutius continuetur quo verisimilius id reperiet ac deteget.

Donalde, si tam innocens sis, cur tam strenue conaris Dominum Mueller reprimere? Et si revera sis praeses neque solummodo ipsimus societatis tuae aedificatoriae qui ludit partes agendo praesidis, lusus quo saepenumero ludere soles, cur tandem non re nos ducas, non solum suffragia defendendo contra insidias interretiales sed etiam oppugnando contra Putin.

Putin tela informatica (programmata venenosa) adhibuit ut processus politicos Americanos pessum daret, ut nuntia falsa diffunderet, ut candidatus rerum turbator eligi adiuvaret, haec omnia ut democratiam nostram frangeret. Nos oportet sollertia nostra de systematis computatralibus uti ad veritatem vulgandam de Putin — quantam modo pecuniam furatus sit, quot modo mendacia narraverit, quot tandem aemulos in carcere incluserit vel interemerit — quo facto istius autocratia enervaretur. Praeses verus id ipsum nunciam faceret.

Conicerem de pecunia agi id quod Trump occultare temptat. Agitur de necessitudine eum inter et negotiatores magnarios qui una cum Kremlin conspirant. Fieri potest ut istis Russis praeses aes alienum contraxerit. Quis oblivisci potest verba quae D. Trumpi filii anno 2008 non exacto renuntiavit: "Russorum sunt maiores partes multorum creditorum nostrorum." Fortasse est dux noster Russorum mediastinus.

Sed quidquid sit istud arcanum,  aut strenue conatur Trump id celare aut de Russia tam simplici mente utitur ut sit paratus non solum obstare coeptis quibus democratia nostra defendatur sed etiam nonnulla instituta nostra maximi momenti libenter evertere cupit, ut puta Foederale Mininsterium Investigationis et Praefecturam Iustitiae ut lateat condicio sua anceps bene occulta.

Illud quidem non tolerandum. Tempus maximum est ad signa canenda.

Gravissimae minae integritati democratiae nostrae in Officina Ovali sunt.


środa, 13 czerwca 2018

Cristallum magicum Varangorum

Studiosi Hungari duce doctore Gabor Horvath putant Varangos (Anglice Vikings) tam optime per plagas semptentronalis partis Oceani Atlantici navigasse propter "cristallum magicum", cuius usu potuerint locum Solis semper fere invenire etiam in caelo nubibus obducto. Cristallum tale - Scandinavice solarstein, sive lapis solaris - verisimiliter erat calcita Islandica, quae se penetrantem lucem bis frangit producendo duos radios varia vi lucis. Si tamen caelum per tale cristallum inspiciamus, Solem pone nubes latentem cum casu invenerimus, videbimus tantum unum radium una vi lucis.
Tale cristallum inventum esse in Britannica navi fracta, quae mersa est in fretu Gallico anno 1592, prope insulam Alderney - nescimus pro certo id ad navigationem vero ibi usum esse, meminisse tamen debemus Britannos quasi nepotes Varangorum fuisse ergo fortasse nonnullas technas horum ad artem navigandi spectantes apud illos sevatas esse.
Simulatione computatrali a Hungaris peracta patet usu solarstein nautas ex Scandia aut Anglia Grenlandiam petentes - mensibus inter Aprilem usque Septembrem, cum navigatio in Atlantico septentrionali habebatur - potuisse in oras Insulae Viridis incidere probabilitate 92 centesimarum (92%). Ceteris octo centesimis errarent Varangi ad plagam occidentalem - fortasse ita Vinlandiam (Americam, sc. Novam Funlandiam vel Labrador) casu nacti sunt.      

wtorek, 12 czerwca 2018

Mater mea nonagenaria (2)

Memoravimus quoque aliam nostram consobrinam, Hannam, octogenariam, Gedaniae degentem, ubi amatricem suum 92 annos natum oculis aegrotantem curat. (Hanna ceterum telephonavit ut matrem ob diem natalem salutaret.) Memini Hannae, cum iuvenis (aut fere) esset, dixi ergo eam mulierem pulcherrimam atque mobilem semper fuisse. Mobilem dixi, sensu: vitae plenam, actuosam, loquacem, semper aliquid hic et illic agentem... At Adam aliter dictionem intellexit, aut potius consulto lusu verborum usus est, dicens:
- Memini trium eius maritorum, mobilis ergo certe est!
Sed ipse Adam (vir 78 annorum) bis uxorem duxit. Cum prima cito rixabantur ac divortium fecerunt. Alteram tamen adamavit valde - liberos duos habebant necnon domum magnam, quam Adam ipsius manibus familiae sui struxit (est enim architecturae peritus). Post tamen matrimonium felicissimum 18 annorum uxor eum reliquit, morbum psychicum simulans. Nescio quid postea cum ea factum sit, scio tantum Adam post hanc rem hominem fractum mansisse (de hac re in familia, Adam praesente, numquam disputamus). Est Adam ioculator maximus, sed ioci eius velant maerorem calamitatis.  

Mater mea nonagenaria

Genethliaca scribere nescio, sed... Mater mea heri nonagesimum vitae annum bono in animo complevit. Ad parvam celebrationem advenimus: ego, consobrini mei Adam et Christina, necnon amici matris A., E.. et M. Loquela nobis erat de... moriendo molestaque senectute, non ita propter ipsam matrem, quam potius nos, qui magis magisque senescere nos sentimus (Adam &  Christina mox octogenarii fient, M., nostrum iuvenissimus, cancris multis laborat). Loquebamur, quasi mortem minime timentes (- Audistine? X. in nosocomio mortuus est, post longas excruciationes. Y. autem, felix, cito in infortunio viario necatus, etc). Mater eodoem modo narravit se diu inquietudine laborasse propter ignotam sortem amicae cuiusdam sibi coaequalem, quae in suburbio Varsoviensi degere solebat. Rogavi, ait mater, filium [me scilicet], nam ipsa interrete uti nescio, ut sortem amicae quaereret. Sollicita iam valde sum, nam ad telephona amica per annum non respondebat. Sed, deo gratia, sollicitudine mox liberata sum: filius per interrete invenit amicam mortuam esse.
Hilaribus animis domum matris nonagenariae reliquimus.

Poeta Arrabonae (vulgo Győr) moratur

Poeta Martinus Zythophilos (Martin Freundorfer) nimis sero, si bene intellexi, in portam musei dicati zoologo Hungarico Iohanno Xanto (Xantus Janos) advenit - propter cerevisiam huius loci nimis diu gustatam?:-)
Grande tibi, sapiens, museum, Xante, dicarunt,
sed sera nos cogit firma manere foris.

Genethliacon Gerardo Alesio dedicatum - Anne-Ilse Radke

Poetrix Anna-Ilsa Radke genethliacon Gerardo Alesio dedicatum modo per rete divulgavit:
"Eius sub alas confugies, suis
pennis benigne te Deus obteget."
Psalmista ut appellit fideles:
sorte datum accipe tale signum!
An te minister surripiet Iovis
ales, ministres ut cyathis suis?
Gerarde, mensa digne opima,
ingerere et calices deorum!
An te volatu Pegasus auferet,
qui fodit altum fontem Aganippidos,
quem tu, vagabunde o poeta,
faece tenus bibe sobriusque!
Illum, o Cupido, protege pinnulis,
collum dabit qui sponte iugo tuo.
adduc puellas et venustas:
nil nisi amorem amat atque amabit.

sobota, 9 czerwca 2018

De butyro arachidico (correctio)

Dixi omnes fere linguas hodiernas occidentales in nomine butyri arachidici (Anglice peanut butter) elementum butyreum habere - cuius rei ignota videlicet Commissio Euroapaea manet, quae postulat instatque 'butyrum' de nomine deletum iri (nam re vera, butyrum sensu stricto, i.e. lacteum, non est).
Erravi: certe sunt linguae, quae aliter ad hunc cibum spectent. Nederlandice enim pindakaas dicitur - "caseus arachidicus" (item dialectu Coloniensi Germanorum; mirum in modum tamen sermone Boerorum caseus denuo butyrum fit: grondboontjiebotter), Russice Ucrainiceve arachisova pasta - "pasta arachidica".
Ceterum legi butyrum arachidicum invenit primumque fabricatus est saeculo XIX medicus Americanus John Harvey Kellogg, qui ceterum, contra masturbationem puerorum vehementer pugnans (nam timebat Satanam in hac praxi latere), invenit pultem maizii (corn flakes) atque introduxit apud US-Americanos morem Semitarum pueros neonatos circumscribere. Qui mos usque hodie valet, licet minor in annos minorque numerus puerorum hac mutilatione horribili - quae privat pueros voluptate tam suavi ac facili! - afflictetur (hodie ca. dimidia pars).  
Meo in casu dominus Kellogg parum effecit: libenter et butyrum arachidicum et pultem maizii cotidie fere sumo, sed... Onanem biblicum simul porro colo.

środa, 6 czerwca 2018

De arte mingendi apud Aegyptios (porro)

Thomas Ihnken Coloniensis explanat sodalibus Gregis Latine Loquentium:
Quoniam de mingendo rursus fit sermo, addere velim haec pauca de Aegyptiorum moribus:
Herodotus narrat (2,35) apud Aegyptios mingere mulieres stantes, viros sedentes.
Non semper est credendum Herodoti narrationibus, sed vera multa refert. In capitulis 35 et 36 libri secundi historiarum Herodotus vult ostendere, quod mores Aegyptiorum sunt contrarii atque mores ceterorum hominum. Quod demonstrat primum in operibus virorum et mulierum: apud Aegyptios -ait Herodotus- mercantur in foro mulieres, viri domi sedent et texunt; viri onera portant supra caput posita, mulieres in umero. In hoc contextu Herodotus refert mulieres mingere stantes, viros sedentes. Multi scholiastae moderni omnes has narrationes taciti praetereunt, sed inest eis quaedam veritas. Quod autem attinet ad levandum vesicam et alvum, videte quaeso signa illa hieroglyphica A81 et A81b in hoc situ:
https://es.scribd.com/doc/122303312/complete-list-of-hieroglyphs
Videbitis ibi virum, non feminam, se levantem.
Et narrat Herodotus (2,35):
εὐμαρείῃ χρέωνται ἐν τοῖσι οἴκοισι, ἐσθίουσι δὲ ἔξω ἐν τῇσι ὁδοῖσι ἐπιλέγοντες ὡς τὰ μὲν αἰσχρὰ, ἀναγκαῖα δὲ, ἐν ἀποκρύφῳ ἐστὶ ποιέειν χρεόν, τὰ δὲ μὴ αἰσχρὰ ἀναφανδόν. (Alvum solvunt [Aegyptii] in domibus, cibum sumunt in viis; dicunt enim, quod decet facere ea quae sunt turpia, sed necessaria, in secreto, ea autem, quae non sunt turpia, publice)
Me interrogo: Ubi licebat viro Aegyptio facere, quod facit in hieroglyphis?
Obiter: non apparet mulier se levans in hieroglyphis.

piątek, 1 czerwca 2018

IA in manu Sinensium

Martha J., amica mea, modo Sinis, ubi 14 annos degebat, revertit. Narrat fabulas incredibiles, in quarum numero etiam de usu practicali a Seribus technarum intellegentiae artificialis (IA). Ita exempli gratia in urbe Kunming Martha testis ocularis erat usus in grapheo (Anglice office) alicuius negotiationis (Anglice company) galeris encephalographicis, quae scilicet statum cerebri tui continuo monstrent. Rebus ita stantibus rector graphei in albo sui computatri semper videre potest, quid eo temporis momento "censeant" operarii - aut saltem quo cerebri animo imbuantur. Officialiter, haec scientia praeditus rector melius sciat ad quae destinata adhibendus sit hodie hic aut ille operarius, si ex. gr. magis pronus sit ad problemata difficilia solvenda (nam mens ei clarissima est), an potius ad actiones "suetas" (nam fessus, fortasse crapula dolens, cogitat eo die lentius solito). De facto tamen rector talis dominus cerebrorum (animarum) sui operariorum fit & scit horum nonnulla intima, quae operarii ipsi certe aperiri noluerint.
In terris occidentalibus - ubi tot de respectu personae privatae (Anglice privacy?) disputatur - usus talium machinarum semper, ut spero, prohibitus erit. Sed, addi debet, similibus technematis instructi Seres citius technologice superiores nobis fiunt (nisi iam sunt). Qui progrediuntur ad "entia suprahumana" creanda.