poniedziałek, 28 grudnia 2015

Plinius monstrat inferos deesse, Gagarin superos

Scribit Plinius (II, 158): et tamen quae summa patitur atque extrema cute tolerabilia videantur: penetramus in viscera, auri argentique venas et aeris ac plumbi metalla fodientes, gemmas etiam et quosdam parvulos quaerimus lapides scrobibus in profundum actis. viscera eius extrahimus, ut digito gestetur gemma, quo petitur. quot manus atteruntur, ut unus niteat articulus! si ulli essent inferi, iam profecto illos avaritiae atque luxuriae cuniculi refodissent. et miramur, si eadem ad noxam genuit aliqua!
Simili modo Yuri Gagarin, postquam e volatu cosmico in terram reductus erat, exsistentiae superorum negaverit. Dixisse enim putatur: Intuitus sum caute, sed Deum non conspexi. Sed deest fons huius dictionis, ergo verisimiliter fictiva est. Sunt, qui dicunt dictum id ementitum esse ipsum ducem Unionis Sovieticae, Nikitam Khrushchev.

Ceterum placent mihi et Plinius, et Gagarin.

De speculo Twardoviano (porro)

Inscriptio speculi creditur facta esse ca. AD 1706 (sed fontem huius nuntii ignoro). Quod tamen paululum mirum mihi videtur, nam a. 1703 ipsa ecclesia incendio deleta at renovata est demum a. 1707, ut patet – vide supra – e tabula ecclesiae frontali (...ex cineribus velut Phaenicem excitavit). Fortasse speculum statim post incendium per paucos annos in vicina ecclesia franciscanorum reformatorum tenebatur. Prima nota "scientifica" de speculo facta est demum AD 1828.
Fractum (hodie) in partes tres speculum metallicum ex alaia bismuthi, antimonii et cupri factum est, fortasse cum particulis aliorum metallorum (nescimus, nam speculum numquam chimice investigatum sit). Putatur in Germania factum esse saec. XVI; fortasse ab ipso Twardovio ibi emptum, cum Virtembergae studebat – alii autem putant Twardovium re vera virum Theodiscum fuisse, nomine Laurentius Dhur, sive Durentius, quod cum 'duro' cognatum, mutatum esse in Polonicum 'twardy' (durus), ergo Twardowski, Twardovius. Omnino nescimus, quando atque quomodo speculi ludus in obsequium Dei – ut sibi vult hexameter - versus sit. 
Fabulae de speculo... Twardovium dicunt monstrasse, usu speculi magici (fortasse eiusdem, fortasse alii), umbram iuvenis uxoris Barbarae Radzivillovnae lugenti post mortem eius regi Poloniae Sigismundo Augusto (1520-72).
Incertum manet quo modo speculum magistri alchimiae Cracoviensis viam in Wengroviam fecerit; adsunt fabulae de ipso Twardovio – qui, sicut doctor Faustus in Germania, creditur diabolo animam sui vendidisse – in regionem Wengroviensem venisse, sed haec res sunt minime certae.
Fama duorum praeteritorum saeculorum fert speculum res futuras, imprimis malas, in se spectantibus monstrare. Ob hanc rem fortasse in pariete sacristiae alte fixa est, ne quis sine usu scalarum id intueatur ita, ut sui imaginem conspiciat. De Napoleone iam dixi. In numero aliorum spectatorum fuerit parochus quidam Wengroviensis, qui diabolum ipsum in speculo intuitus sit – tunc clavibus, quas manu tenebat, in bestiam infernalem proiecit, speculum in tres partes fregens.
Recentissima fortasse fabula spectat ad annum 1980 – tunc mulier quaedam iuvenis historiae artium studens scalis furtim utendo conspexit in speculo suam faciem cum perpendicularibus ferulis nigris. Quae ferulae quasi praedictum carceris ei essent: anno 1981 exeunte, postquam status necessitatis in Polonia a regimine communistico annuntiatum esset, mulier haec, ut multi tunc iuvenes rebus politicis studentes, in carcerem data est.

Sed quot veritatis in his fabulis, dicere non valeo.

niedziela, 27 grudnia 2015

Distichon Twardovianum

Adesse urbi cordi meo tam gratae – Wengroviae in historica fine Poloniae et Lituaniae – rem maximi momenti: speculum alchimistae Iohannis Twardovii (vulgo Jan Twardowski), quo saeculo XVI, ut creditur, ludebat ille praeclarus alchimista Cracoviensis; hodie autem speculum ornat sacristiam in ecclesia Wengroviae principali, quam olim regebant bartholomitae, noti quoque nomine fratrum communistarum (sic!). Bartholomitae verisimiliter – nisi Franciscani reformati, qui vicinam ecclesiam tenent – in intio XVIII saec. speculo distichon addiderunt:
LVSERAT HOC SPECVLO MAGICAS TWARDOVIUS ARTES
LVSVS AT ISTE DEI VERSVS IN OBSEQVIVM (E)ST.
(Non sum poeta, puto nihiIominus –us in 'Twardovius' longum esse; si ita, claudicat hexameter.)
De ipso speculo variae sunt fabulae, maxime nota autem de Napoleone Bonaparte, qui anno 1812, Moscoviam petendo atque in via Wengroviae moratus, speculum intuitus sit, ubi cladem suorum conspexerit.

piątek, 25 grudnia 2015

Nuntii Iconoclastae plus minusve praeteritae septimanae

Ob plures quam 20 ventos turbones, qui meridionalem partem USA praeterito die afflixerunt, saltem 14 homines vitam amiserunt. Maxime devastatae sunt civitates Missisipi, Tennessee et Arkansas.

Propter magnum numerum illegalium migratorum regimen Holmiense stitit motum traminum inter Sueciam et Daniam.

Conservativa Factio Popularis, quae regit Hispaniam ab anno 2011, victricem discessit electionis parlamentariae, ferens 27,2% punctorum. Verisimiliter tamen novo regimine potituri sunt cum sociis socialistae, quorum factio PSOE 23% tulit.

Peso, nummus Argentinorum, vilescit postquam regimen Bonaeropolitanum decrevit eum sine impedimentis mutatum aliis monetis iri.

Primum a mense Iunio 2006 anni Argentaria Statalis USA (Fed) auxit usuram principalem – incremento modico 25 punctis centesimis procenti, a 0-0,25 usque 0,25-0,5%.

In provincia Musanna Mezopotamiae meridionalis abducti sunt plus quam viginti cives vicinae Quatariae, qui venatione falconaria fruebantur. Inter abductos putantur esse propinqui phylarchae Quatariensis.

Propter minas tromocraticas omnes circter 1200 scholae conurbanitatis Angelopolitanae (vulgo Los Angeles) die Martis clausae manebant.

Praeses Yahya Abdul-Aziz Jemus Junkung Jammeh declaravit Gambiam rem publicam islamicam. Pollicitus est tamen non-musulmanis libertatem fidem sui confiteri.

Primum post memoriam gentium in Arabia Saudiana comitia (regionalia) habentur, quibus participes quoquoe mulieres sunt.

Pretium petrolei vilissimum est ab anno 2008 exeunte: stat ca. 37,60$ per dolium (WTI Americanorum) necnon 40-41$ (Brent, Londinii). Pretia petrolei nihilominus paululum cretura putantur proximis diebus, propter maiore opinatis emptiones Sinensium.

Xenophobica Acies Nationalis (FN) dominae Le Pen vicit in comitiis regionalibus Gallorum. Altera pars suffragii habenda est post duas septimanas. Prognosis dat factioni FN 30%, republicanis duce Sarkozy 27% et socialistis praesidis Hollande 23%. Sine dubio victoriae LePenistarum causam esse timorem advenarum post tromocraticos ictuus nuper Lutetiae patratos, cum ca. 130 homines perierunt.

Pretium ferri vilissimum est praeteritorum decem annorum – 39,40 dolarii per tonnam. In causa putantur esse minores emptiones metalli e parte conflatoriorum Sinensium. Secundum analyticum domus Investes, Hunter Hillcoat, viliora pretia detrimento fuerunt talibus negotiationibus ut Vale et Fortescue, dum magnae productrices, ut BHP Billion et Rio Tinto, lucrum sibi comparabunt etiam cum ferrum venundetur 20 $ per tonnam. 

Martinus urbi et orbi

MARTINVS ZYTHOPHILOS SODALIBVS
Natalis Domini pacem ut ferat omnibus, opto,
 noscere uti liceat maxima dona Dei.
Factus homo Deus est, sumpsit carnalia membra,
 diuinus tolerat faenum asinumque puer.

De duobus nominibus pomaranciarum in Europa meridionali


Res miranda: Arabes, qui pomarancias (mala Sinensia) in Europam primi adportaverunt, in Italiam meridionalem scilicet, quae sub ditione Arabum tunc manebat [iam saeculo XI nuntiatur hortos arancianos ibi haberi] - ipsi nomine huius fructus arborisque... obliti sunt. Nam ab ipsis tunc adhibitum nomen pomi fuerat naranj, e Persico narang, quod sua vice e Sancritico naranga-s. Et fructum et nomen eius ab Arabibus datum libenter nationes Europae meridionalis acceperunt: Italorum (n)arancia, Venetianorum naranza etc.; ipsi autem Arabes (et nunc domini ipsorum Turci, et gentes Europaeae sub ditione Turcica manentes) saeculis XV-XVI nomine novo uti coepurunt, pomaranciam appellantes '(fructum) Lusitanicum', id est a nautis mercatoribusque Lusitanicis (=Portugalicis) adportatum.
Controversiam pulchre explanat Douglas Harper – de duabus enim subgeneribus pomi agebatur: primo, sapore amaro, ergo facillime oblivioni dato, altero autem [ex aliis videlicet terris importato] suavissimo, pomo scilicet victore lexicali. Harper de hac re:
The tree's original range probably was northern India. The Persian orange, grown widely in southern Europe after its introduction in Italy 11c., was bitter; sweet oranges were brought to Europe 15c. from India by Portuguese traders and quickly displaced the bitter variety, but only Modern Greek still seems to distinguish the bitter (nerantzi) from the sweet (portokali "Portuguese") orange. Portuguese, Spanish, Arab, and Dutch sailors planted citrus trees along trade routes to prevent scurvy.

poniedziałek, 21 grudnia 2015

Signa temporis (3)

Fortasse de hac re olim iam scripsi, memoria mea his diebus non optima est. Si vero ita, veniam dat mihi lector...
Aliquis sodalis noster philathlos dixit ludum bascaudarium (Anglice basketball) necnon pilam volatilem (volleyball) magis magisque disciplinas spectatu taediosas fieri propter... altiorem proceritatem athletarum, quibus rete alte positum iam non tam altum videtur, quam lusoribus ante 30, 50 aut 70 abhinc annos ludentibus. Nam nova quaeque generatio paululum in summa intermedia altior sit prioribus comparata.

Mors Shakespeariana in summa intermedia...

... gladio/mucrone advenit, deinde detruncando, deinc e veneno.

Maxime tamen crudelis videtur sors horum, qui in crustum assantur (baked into pie).
Si similis aestimatio fabularum Ovidianarum comparetur, primum sine dubio locum teneat mutatio in nova corpora.  

niedziela, 20 grudnia 2015

Signa temporis (2)

Professio relatoris photographici in oblivionem it! Qui olim heroes praeclari fuerant - ut Josef Kudelka, Henri Cartier-Bresson, David Alan Harvey - hodie fortasse ne munus quidem salariumque sibi invenirent, nam ephemerides atque etiam ipsae agenturae photographicae magis magisque photographemata emunt facta ab hominibus minime arte photographica peritis. Quisque enim hodie civis, qui iussu Fortunae in medias res (ut bella, reclamationes politicae, calamitates naturales) missus sit, statim imagines luce factas ope telephonuli exprimere potest. At imagines hae, praeseertim cum sub Iove factae, ob progressum technologicum saepe eadem fere qualitate sunt ut photographemata peritorum.
Solum asylum adhuc photographicis professionalibus servatum esse imagines nocturnas aut intus (domi, in aedibus etc.) factas, ubi lucem moderari necesse est. Soli ergo photographici diurnarii, qui adhuc copiosam pecuniam sibi parant, sunt hi, quibus munus in actis adest ad architecturam, vestes aut rem coquinariam spectantibus.
Talia saltem docet K., rei diurnariae valde perita.

piątek, 18 grudnia 2015

Signum temporis

Gustavo, filio Catherinae, puero 17 annorum multis disciplinis scientificis peritissimo, necesse hodie erat epistulam chartaceam cursu publico ad domum quandam editoriam (ubi symbolam de quadam re divulgare velit) mittere.
Telephonavit ergo Gustavus aviae, nam matrem patremve rogare eum pudebat, rogans, ubi in involucro ponendum esset nomen destinatarii, ubi autem suum.  
In aetate electronica vivimus.

Cinaedus de strophiis

Cracoviae cum Nicolao collocuti sumus ab hoc et ab hac, etiam de strophiis muliebribus, quorum Nicolaus inopinate praebuit se peritum esse!
- Unde gentium – rogavi – tibi, cinaedo cinaedissimo, scientia strophiorum?!
Dixit tunc Nicolaus se olim, semel per totam vitam (vir 38 annorum est), cum femina dormisse, praesertim ob cupiditatem res sibi ignotas sciendi. Post coitum, cum mulier edormisset, vestes eius caute Nicolaus inspiciebat, inter alia ferulas ballaenaceas strophii digitis palpando. At digitos habet valde molles, nam munere horologiarii nonnullos annos fungebatur.  

wtorek, 15 grudnia 2015

Caffea hodierna

Heri (hodie enim nondum domum reliqui) caffeam Panamanam nota Esmeralda bibi. Sapit non bene, non male, ergo bene.
Placet imprimis pretium sat vile caffeae expressae - 5 aureis. Hipsteriana autem caffeae genera - in poculo magno, cum lacte aliisve "additamentis muliebribus" - 10 aut plus aureis.
Coelum Varsoviae nubibus obductum; temperies circiter zerum Celsianum - sicut hieme esse saepissime solet.
Nihil alicuius momenti evenit, praeter fortasse graviorem statum discopathiae Catherinae.

sobota, 12 grudnia 2015

Natalitas fortasse non bonum nomen Latinum est

'Natalitas' scripsi, dum debuerim 'Nativitas (Domini)' scribere. Sed quoque 'Natalicium' dicunt (item arbor natalicia, cantus natalicii) de tempore hoc anni non solum alcoholicis tristissimo; 'Natalitatem' autem in meis in promptu fontibus invenire non possum. Corrigere nihilominus nolo, nam... placet mihi nomen.
Ceterum ruri sum, in villa K., centum chiliometris Varsovia ad solem orientem posita. Caffeam bibo simplicissimam, pulveratam, titulo negotiationis Jacobs. Temperies +6 C, sed ligno igni addendo domum calefacimus.
Optima utatur Lector fine septimanae!

piątek, 11 grudnia 2015

De Zenatis equitibus

Scripsit Paulus, qui cognomine Quaedam Vox utitur in foro Gregis Latine Loquentium (licet mihi, spero, hic eum breviter citare):
Hispanice jinete dicitur qui equo vehitur, nec miles Aetatis Mediae, quod est "caballero". Nisi fallor, utrumque vertitur "eques" in latinam, sed caballero tantum lingua ex latina traditur (ex vulgari "caballo" nomine). "Zenati" sunt alius origo. Zenati erant Africani Septentrionales, qui Media Aetate egregii equites habebantur. Postquam Arabici Hispaniam pervicerunt, verbum linguam per arabicam hispanicis tradita est.
Cito Paulum ob hanc solam causam, quod mihi talia sunt maxime cordi.

Caffea diei Veneris

Caffea hodierna in caffearia "Relaks" est Limoncillo Nicaraguana. Limoneum tamen saporem minime sensi - fortasse calices gustatorii mihi non optimi sunt, ceterum nullus ego arbiter elegantiae.
Coelum Varsoviae serenum, temperies +5 C.
Paralysis Natalicia iam coepit: in tabernis mulieres (venditrices) cum mulieribus (emptricibus) loquuntur de obsonis antecessum necessarie faciendis, cibis coquendis etc. etc., vix alios (i.e. cotidianos, non-Natalicios) emptores (ut ego) animadvertentes.
Odi Natalitatem et arceo vulgus Natalitate demens, sed... in Polonia habito ac nimis senex sum ut in aliquam aliam terram migrem.
Interdum nihilominus ad meipsum suspiro: Sola spes in musulmanis... Cuius dicti postea valde paenito.

poniedziałek, 7 grudnia 2015

Caffea cotidiana

Hodie sumpsi caffeam Kenianam generis Kalatu. Paululum amara erat, quod mihi nihilominus valde placet.
Caelum hodie Varsoviae plerumque serenum, nonnullis nubibus hic et illic apparentibus. Temperies 10 graduum Celsianorum supra zerum, quod - i.e. hiems tam mitis - hoc anni tempore rarissime evenit.
Bonum diem lectoribus opto!

Dialogi Latini, tempori nostro apti (2)

- Salve! Quid novi apud te?
- Nihil.
- Nil vero?
- Nihil fere. Pater, ut semper die Lunae mane, manus sibi inferre conatus est.
- Manus inferre...?
- Se necare, scilicet.
- Quid? Vero? Nuntius ergo pessimus?
- Pessimus, nam non contigerit ei. Denuo.
- Non contigit? Cur?
- Novacula, qua se iugulare cupiebat, iam valde his conaminibus hebetata est.
- Cotem domi non habetis?
- Habemus, sed pater nimis piger est, ut ea utatur.
- Tibi ergo, filio pio, novacula est acuenda!
- Ita, puto, faciam.
- Aut... rasorium electricum emendum.
- Rasorium electricum? Ad quem usum?
- Electriductum mordendo fortasse patri facilius res continget.

Dialogi Latini, tempori nostro apti (1)

- Unde venis?
- E restiarii taberna.
- Quid ibi emisti?
- Nihil.
- Nihil?
- Emere cupiebam funiculum, quo me pendere possem, sed non habuerunt.
- Cur?
- Nescio. Fortasse ob crisin oeconomicam, quam regentes populares effecerunt.
- Ergo boni sunt populares?
- Vitae meae boni. Mihi odiosi.

sobota, 5 grudnia 2015

Caffea hodierna

Modo in caupona caffearia mihi proxima "Relax" caffeam expressam Columbicam nomine El Capullo (involucrum cocconicum) sumpsi. Optima est! Sicut optima sunt omnia genera quae caupones hi important; ut heri e.gr. Aethiopia naturalis, id est naturaliter, vi Solis, siccata.
Stat "expressa parva" in hoc loco solum quinque aureis (ca. 1,2 euronis), licet clientes cauponae imprimis hipsteriani divites sint. Ceterum caffea generaliter in Polonia haud vili pretio venundatur, nam ut res luxuriosa tractatur.

piątek, 4 grudnia 2015

Nuntii Iconoclastae plus minusve praeteritae septimanae (quae simul in "Ephemeride" divulgamus)

Biocolytae putant patratores caedis, qua sclopetando 14 veteres homines necati sunt in gerontocomio urbis Californianae Sancti Bernardini, ductos fuisse rationibus Civitatis Islamicae. Par patratorum, iuvenes maritus et uxor Seyd Farook et Tashfeen Malik, occisi sunt a biocolytis praeterito die Mercurii in pugna quae evenit paucis horis post caedem senum.

Cairo Magna saltem 16 homines perierunt in ictu pyrobolis igniferis peracto contra cenantes in caupona subterranea tribus Aguza urbis-capitis Aegypti.

Mons Niger fiet nova, undetricesima terra socia foederis NATO – die Mercurii Bruxellis decreverunt unanimiter 28 socii NATOenses. In ipso Monte Nigro contra foederationem reclamitant cives gentis Serbicae.

Conventus Unionis Europaeae et Turciae decrevit UE daturam 3 miliarda euronum ad conamina Turcorum migrationem Syrorum in Europam cohibere. UE promisit quoque abhinc celerius de futura adhesione Unioni Turciae cum regimine Ancyrensi negotiatum iri.

In comitiis localibus Mariupoli (in Ucraina orientali) victrices evaserunt factiones pro-Russicae; secundum ingagationem opinionum novus burgimagister fiet collaborator oligarchae Rinat Akhmetov.

Aeronaves Turcicae insectatoriae F-16 deiecerunt aeroplanum Russicum, cum caelum Turcicum – ut regimen Ancyrense asseverat, Russi autem negant – e Syria intrasset. Ambo aeronautae Russi, umbellis descensoriis utentes, ut vitam servarent, verisimiliter sclopetando necati sunt a rebellatoribus Turcmenicis in fine Syro-Turcico positis.

Primum post memoriam gentium plus civium Britanniae (52%) se pro exitu huius terrae ex Unione Europaea declaraverunt quam numerus horum, qui in UE manere vellent (48%), secundum indagationem opinionum ab ephemeride "The Independent" divulgatam.

Propter timorem tromocratiae a die Saturni Bruxellis clausa manent tramina subterranea ac multi loci publici. Biocolytae Belgae quaerunt nonnullos terroristas, in quorum numero nonus perpetrator ictuum Lutetiensium, Salah Abdeslam.

Novissimus computus mortuorum in pugna contra terroristas obsides tenentes in deversorio Radisson urbis Bamako dicit de circiter 20 hominibus. Duos tromocrates occisos esse a militibus Maliensibus.

Milites delecti regiminis Mali, post pugnam brevem cum tromocratis, liberaverunt circiter 80 deversores, imprimis peregrinos, in urbe Bamako. Tres homines occisos esse, in quorum numero Francogallus.

Tromocrates islamstici vi potiti sunt deversorio luxurioso catenae Radisson in urbe-capite Mali, Bamako. Circiter 125 deversorii hospites peregrini ut obsides tenentur.

In indagone terroristarum a biocolytis in suburbio Lutetiano Saint-Denis facta, inter duos occisos adesse Abdelhamid Abaaoud, machinatorem principalem ictuum tromocraticorum Lutetiae praeterito die Veneris patratorum.

De andrealibus (brevissime)

Ut caelibes (pueri) die sanctae Catherinae, ita puellae innuptae paucos dies postea, festa scilicet sancti Andreae, divinationes habere solent de futuro matrimonio. (Quem diem sancti Andreae modo hoc anno habuimus – videlicet semper sero scribo.)
Mos andrealium etiam hodie valet ac multis puellis pergratus manet; aliter quam catherinalia, quae hodie plerumque iam (nisi ruri) non observantur.

Prout sciam, puellae tempore "sacrorum" imprimis ceram per aurem clavis fundunt in aquam – formas cerae, quas hoc modo obtinent, credunt aliquid dicere de futuro marito (quasi figurae aut faciei eius similes). Si autem nulli rei similis sit cera, conantur eam sub luce lampadis modo hac modo illac ponere, ut saltem umbra cerae aliquas coniecturas det. Talis tamen maritus sub umbra natus non tam certior putatur ut "verus", qui scilicet iam in aqua speciem suam praebet.

niedziela, 29 listopada 2015

De catherinalibus apud Polonos

Ante nonnullos dies habuimus festum sanctae Catherinae, in vigilia cuius diei olim pueri adulescentes divinationem habere solebant ad futuram sui amatricem vel uxorem agnoscendam. Varii erant divinandi modi, exempli gratia – praeter preces ad sanctam Catherinam (quae patrona est puerorum-caelibum proborum), ut bonam formosamque mulierem sibi daret – ponere puer solebat sub pulvino aut crinem, aut partem saltem cuiusdam vestis muliebris, quae res sperabantur invocaturae somnia prophetica de futura uxore. Postero die mane sortiri puer solebat inter chartulas varia nomina feminina portantes, eo modo nomen uxoris "coniectando".

czwartek, 26 listopada 2015

Melius photographema lamae in capite BVM

Fortasse de una lama in hac fabula agebatur. Mihi videbatur duas esse. Error tamen - lama/flamma - idem est.
Marcus (Marek) Mąkosa fecit.

środa, 25 listopada 2015

BVM coronata... lamis

Marcus, vicinus noster, modo revertit ex itinere unius fere mensis per vias et (saepius) devia Peruviae. Narrat permulta, me tamen tetigit imprimis fabulā de statua Beatae Virginis Mariae in foro centrali Limae (ut supra in photographemate). Maria enim coronata est ibi... lamis; id est duae lamae (oves Latinoamericanae) in summo capite ei sedent. Causam esse dicunt errorem inter eodem modo pronuntiata a Peruvianis nomina pro lama (lama) et flammis (llama). Qui enim statuam erigi decreverunt (magistratus? sacerdotes?), flammas in capite Mariae habere volebant (nescitur tamen cur[1]), attamen propter errorem obtinuerunt lamas.
[1] Fortasse ut flamma amoris, sed haec semper ut radii circum cor monstratur.

niedziela, 22 listopada 2015

De libris Harry-Potterianis apud Polonos

Cum amico meo A., "ab hoc et ab hac", id est "de omnibus rebus et nonnullis aliis", ad pocula caffeae locuti hodie mane sumus in caupona "Relax" tribus Mokotoviensis Varsoviae, praeter nos plena imprimis hipsterorum. Primum ausus sum A. rogare de maximo, ut puto, eius errore ut rectoris satis magnae officinae poligraphicae. Assensit, subridendo, se pessimum iudicium ante viginti abhinc fere annos fecisse, cum domus quaedam editoria Anglica eum appropinquasset, rogando, utrum vellet Polonice edere seriem fabularum fantasianarum, quae series modo in mercatu Britannico apparuisset. Amicus meus citissime triginta vel quadraginta paginas primi librorum perlegit, fabulas pessimas esse decrevit, oblationi Britannorum negavit. Auctrix librorum mulier quaedam fuit nomine J. K. Rowling, protagonista fabularum autem puer Harry Potter.
- Sed omnes fere officinas editorias Polonas idem tunc fecisse! – defendit sui iudicium A. – Et adhuc puto has fabulas pessimas esse, totum mundum autem delirare!
Quod ad qualitatem fabularum Potterianarum spectat, ego (sc. Iconoclasta) item sentio. Monitu K. coactus "Lapidem philosophorum" legere coepi, sed post 40-50 paginas somno correptus nugas maximas pueris fortasse lectu dignas legere cessavi.
At sola officina editoria Polona (tunc sat parva, sine ullo eventu commerciali), quae iura libros Potterianos exprimendi emit, hodie divitissima est.
- Loco unius, quam habeo, navis veliferae, decem nunc haberem! – addidit, vultu tristi, A. qui navem suam in portu Kalamaki ad Athenas tenet. 

piątek, 20 listopada 2015

De theoria coniurativa orignis Civitatis Islamicae (denuo)

Ipse, utrum credat theoremati, secundum quod Civitatem Islamicam magna ex parte creaverint US-Americani et Israeliani, amicus meus nescit. Sed rogat:
- Si omnes fere maximas potestates mundi - ut USA, Russia, Britannia et Gallia - Civitiatem Islamicam ut hostem horribilem habent, dic mihi, quomodo fit, ut infrastructura petrolearia in Iraquia occidentali (prope captam ab islamistis urbem Mosul), qua Civitas Islamica pecuniam haud parvam cotidie accipit, nondum deleta ex aere sit? At sunt clare visibiles haec aedes turresque satellitibus, ne dicam de aeroplanis...  

Rumores coniurativi

Fabulae, quae ad theoriam coniurationis mundanae spectant (ut olim Protocolla senium peritorum montis Sion), sunt nobis odiosae, habemus eas pessimo sapore esse, ethice horribiles etc. Sed... omnes fere eas interdum auscultamus, nam adest nobis (mihi saltem) quaedam pars animae, quae mundum multo horribiliorem, quam iam sit, sibi pingere velit (eodem instinctu ductos cinemata catastrophica spectare multos nostrum iuvat). Huius generis duas fabulas "coniurativas" modo audivi:
- exodum Syriorum in Europam adiutam, necnon magna e parte ab initio machinatam, esse ab regimine USA, quod regimen speraret se hoc modo Unionem Europaeam ut sui aemulatorem (oeconomicum, politicum) debiliorem reddere; fons rumoris: M., psychotherapeuta
- Civitatem Islamicam creatam esse machinationibus speculatorum US-Americanorum et Israelianorum, qui cuperent mundum islamicum tam odiosum populis regiminibusque terrarum occidentalium fieri, ut hi probarent usum "instrumentorum specialium", ut exempli gratia necem etiam permagni numeri incolarum, si hoc modo terroristae nonnulli interficerentur; metam Israelianorum hic quoque esse Arabes e regionibus sibi proximis (Autonomia Palaestina et Syria) expellere, ut has regiones sui civitati adiungerent; fons rumoris: A., negotiator industriae poligraphicae, qui linguae Arabicae rebusque islamicis studet

czwartek, 19 listopada 2015

Lingua Arabica

Ignoscat mihi lector, quod rarissime nuper scribam. Causae sunt, si non multae, tunc saltem nonnullae, ex quibus una maximi mihi momenti: linguae Arabicae studere coepi, at lingua haec nullo modo facilis nominari potest! Iam diu volui id facere, sed neque satis otii, nec voluntatis mihi adfuisset, nunc autem, uno die sub caelo sereno, duos aut tres dies ante horrificos istos ictuus tromocraticos Civitatis Islamicae Lutetiae patratos, subito ac inopinate enchiridion vocabulariumque emi, statimque studere huic sermoni tam pulchre (si etiam paululum nimis singultante) sonanti coepi.
Linguam Arabicam studendo, periucunde mihi est hic et illic Latinica aut Graecica in sermone communi Araborum repperire. Ut exempli gratia imbira:tur aut qaysar pro caesare, qalam pro calamo (sphaerographico) et simul stylo plumbeo, qitta pro catto (sed hic sentio reciprocam originem: ex Arabica per Hispanicam in seram Latinam), ku:b pro cuppa, hari:ta pro charta (geographica), marsaba:n pro pane Martio, qa:nu:n pro canone (serae Latinitatis, "officialiter" e Graeco kanon pro pertica), nomen Oceani Atlantici – al-muhi:t l-atlasi:, id est Oceanum Atlantis. Iucunde est videre papam (catholicorum) nominari Arabice al ba:ba:, factionem autem politicam qism, quod fortasse e schismate (sed hoc tantum coniectura mea, nullis studiis lexicographicis probata). Usta:d pro professore rogare cogit, utrum usted Hispanorum (pro domino) re vera e Latino 'vestra dominatio'? Ut Polono, iucunde mihi est videre nomen ibri:q pro bulliculo theano, nam et nos formam imbryk pro eodem bulliculo habemus, sine dubio proxenetā Turco.  
Non omnia signa diacrytica in computatro meo invenire possum, ergo e.gr. differentiam inter tria '(c)h' necnon duo 't', duo 'd' et duo 's' (commune scilicet et emphaticum) nondum notare scio; noto nihilominus, litteris crassioribus, accentum ac puncto duplicato [:] longitudinem syllabarum, potius quam duplici littera, nam litterae duplices suo iure in Arabica saepe inveniuntur.
Talia interdum annuntiaturus sum lectoribus, simul pollicendo me Latinam abhinc non tantopere neglegere, praesertim quod sunt tot themata ambobus mundis communia.
Pergamus ergo opus nostrum, Deo adiuvante, sive... insha'Allah!

środa, 18 listopada 2015

Nuntii Iconoclastae plus minusve praeteritae septimanae

26 aeroplana portans, navis planigera "Charles de Gaulle" reliquit portum Telonense (Toulon), ut peteret oras Syriacas, ubi exercitus Gallicus vehementius loca Civitatis Islamicae ex aere aggrediretur, ulciscendo victimas ictuum tromocraticorum Lutetiae patratorum.

Diei Veneris vespero in sex ictibus igniferis tromocratarum Civitatis Islamicae Lutetiae Parisiorum necati sunt 129 homines, 352 sauciati, quorum 99 graviter.

Eodem fere tempore 37 cives Libani vitam amiserunt in similibus ictibus Beiriti, 181 vulnerati sunt.

Mortuus est André Glucksmann, anno 1937 natus scriptor Gallicus originis Iudaeae, defensor iuris hominis, qui inter alia Russorum caedibus in Tsetsenia patratis reclamabat.

Primum post memoriam gentium praesides communisticarum Sinarum, Xi Jinping, et Formosae (Taiwan), Ma Jingcu, una convenerunt, occasione visitationis amborum Singapurae.
Commissio Europaea dedit regimini Sloveniae 10 miliones euronum, ut illuvio migrantium in hanc terram cohibeatur.

Logica iucunditas (margaritae studiorum linguae Hungaricae)

Ha ott vagyok, nem vagyok itt. Si ibi sum, non sum hic.
(Eugeniusz Mroczko, Lingua Hungarica sibi studere incipientibus [liber editus Polonice])

wtorek, 10 listopada 2015

Margaritae studiorum linguae Hungaricae

Az edző mindig a sportolóval van. Exercitator semper una cum athleta manet.
A sportoló is folyton az edzővel van. Et athleta quoque semper manet una cum exercitatore.
(Eugeniusz Mroczko, Lingua Hungarica sibi studere incipientibus [Polonice])

sobota, 7 listopada 2015

Caupona meae pueritiae

Ecce, lectores carissimi, photographema annis sexagenariis praeteriti saeculi factum, portae ad cauponam "Sielanka" tribus Varsoviensis Czerniaków, cui tribui tanta fama olim Varsoviae aderat ut Romae Suburae.


Hic, memini, pater adduxit me anno 1969, cum quattuor annorum puer fui. Est ita "Sielanka" (Polonice idyllium) prima in vita mea caupona, prima saltem, cuius memor sum (nam pater meus, ventricola maximus, solebat me intruducere in novas cauponas una fere quaque septimana). Bibulorum aut sopore alcoholico in limine fruentium ego ipse non memini; memini tamen meipsum in isto loco, statim post exitum, in eodem limine cauponae cenam totam evomitasse - nam pater cogit me, tunc et multis aliis occasionibus, plus manducare quam potui (fortasse quia ipse, ut asseverabat, domi in pueritia fame laboraverat).
In eundem locum multos post annos reverti ut amator cauponarum plebeiarum, sed "Idyllium" iam diu non existebat - alia caupona in eodem loco iam non tam plebeiam escam offerebat.    
Adsunt fabulae temporis ante alterum bellum mundanum, cum in "Sielanka" suos semi-clandestinos conventus habuerunt praeclari latrones Czerniakowienses - quibus Varsoviae tanta fere fama aderat ut Chicagiae Al Capone.

czwartek, 5 listopada 2015

Lugentne animalia mortuos?

Percontatio professoris Boguslai (Bogusław) Pawłowski, antrophologi Universitatis Wratislaviensis, kalendis Novembribus, id est Die Mortuorum, in epmeride Polona "Gazeta Wyborcza" divulgata (fragmina).

"Gazeta Wyborcza": Lugentne animalia mortuos?
Bogusław Pawłowski: Sine dubio lugent suos nonnulli primates (simpanses, gorillae), delphini, orcae et elephantes. Ritus funebres observantur apud lupos. Hi nostrum, qui feles aut canes domi tenent, quoque de luctu eorum aliquid narrare possunt. (...) Multa mammalia maioris magnitudinis post mortem propinquorum apathia laborant ac gerunt se omnino aliter quam aliis temporibus. Item dici potest de avibus, ut pica, aphelocoma californica vel anser, quae e.gr. manent diu prope cadaver propinqui, escam sibi quaerere cessant (interdum spatio nonnullorum dierum) necnon vocibus specialibus de morte propinqui certiores faciunt alias aves, ut et hae ad cadaver intuendum advolent. (...) Jane Goodall, quae simpanses diu investigabat, scripsit de huius generis simio nomine Flint, qui post mortem matris (nomine Flo) escam edere cessavit, gregem suorum reliquit et in loco mansit, ubi mater mortua erat; qua re consumptus postea ipse vitam amisit.  
GW: Diu credebamus ritum luctus adesse solis hominibus...
BP: Ita, sed hoc non est verum. Validae commotiones animi, ut maeror, non spectant ad neocorticem (cerebralem), sed ad vetustius systema commotionale, id est systema limbicum. Nonnulla mammalia quoque id systema possident, ergo similes nostris commotiones animi experiuntur; sola differentia spectat ad intentionem et formas expressionis. Quod videri potest apud elephantes, qui sedent circum mortuos, mulcent cadaver proboscidibus. Nonnulli studiosi dicunt se conspexisse elephantes aliter tractare ossa suorum (elephantium), aliter autem ceterorum animalium, ossa elephantina quasi specialiter aestimantes, interdum colligentes ea in uno loco; sunt qui viderent elephantes talia ossa fruticibus ornare, sed hoc fortasse erat res fortuita.
GW: Lupi sua vice luctus causa magna voce ululant...
BP: Quod monstrat animalia non esse entia commotionibus animi privata. Nam mechanismi biologici, qui sunt eventus dopaminae, noradrenalinae aut oxytocinae, quique apud nos moderantur nonnullas commotiones aut status animi, funguntur quoque apud bestias.
GW: Quando apparuerunt prima vestigia luctus funebris apud homines?

BP: Si de homine sapienti agitur, vetustissimae sepulturae nobis notae, quarum vestigia inventa sunt in spelunca Israeliana Qafzeh, spectant ad tempus ante abhinc 100 milia annorum. Nitentes tamen scientia de "ritibus" funebribus simpansium necnon hominum neandertalium, possumus credere luctum adfuisse hominibus ab ipso initio generis nostri.

Nuntii Iconoclastae plus minusve praeteritae septimanae

Secundum speculatores US-Americanos, causam calamitatis aeriae, ob quam praeterita septimana 224 homines, imprimis peregrinatores Russi, occisi sunt super paeninsula Sinai, fuisse displosionem pyroboli. Verisimiliter, machinatores displosionis fuisse actuosos Civitatis Islamicae, ulciscentes ictus aerios Russorum contra suos milites in Syria.

Saltem 25 homines perierunt ob displosionem pyroboli in taberna nocturna Bucarestini Rumunorum. 88 sauciati sunt.

Post 40 fere annos, cum licebat alicui pari Sinensium unum tantum puerum habere, abhinc familiis licebit duos gignire.

Austria structura est saepem in limite sui cum Slovenia, ut inusio migrantium illegalium cohibeatur – nuntiavit Iohanna Mikl-Leiter, ministra rerum externarum Austriaca.

Regimen Sloveniense rogat alias terras socias UE, ut milites sibi suppeditent ad fines Sloveniae contra migratores protegendas.

Victricem comitiorum regionalium in Ucraina habitorum evasit factio praesidentis Petro Poroshenko – Solidaritas.

In comitiis parlamentariis Polonorum vicit factio dextrae partis – Lex et Iustitia (PiS).

In infortunio viario prope Burdigalum (in Gallia), cum laophorum senium peregrinatorum plenum in autoplaustrum illisisset, 42 homines mortui sunt. 

środa, 4 listopada 2015

De invidia psittacorum

De invidia psittacorum
Pater Darius est pastor alcoholicorum Tarnoviae Polonorum necnon cultor avium tropicalium, praesertim psittacorum. Quorum circiter 50 tenet in aviario prope aedes, ubi sacerdotes ecclesiae Tarnoviensis habitacula habent – hac re parochus, qui sine dubio amator avium non est, non valde gaudet. Domi autem pater Darius par parvorum psittacorum tenet, quorum unus mecum iucunde ludebat, e.gr. subito volatum in capite meo finiens.
Sed narravit pater Darius historiam horribilem de amore sui domini atque invidia maxima psittacorum. Agebatur de maioribus psittacis, e familia cacatuinarum aut subfamiliae arinarum, pater iam huius rei oblitus erat. Vir quidam iuvenis solitarius tenebat unum, vel rectius unam, nam femina esset talium avium. Omnia bene se habebant, donec vir ille vero solitarius vixit. Uno die tamen puellam cognovit et mox, amore mutuo capti, par iuvenum decreverunt una habitare, scilicet in habitaculo viri. Sed prima, plena amoris nox communis amantium in calamitatem mane mutata est, cum iuvenis ille, e somno experrectus, iuxta se invenisset cadaver amatae, faucibus rostro secatis, oculis effosis.  
Ita pater Darius, psittacorum peritus, vir minime mentiens.

czwartek, 29 października 2015

De arboribus diis singularibus consecratis (secundum Meursium)

In suo opere "Arboretum sacrum sive de arborum, fruticum & herbarum consecratione, proprietate, usu ac qualitate libri III" Ioannes Meursius tales coniunctiones inter arbores et deos Graeco-Romanos facit:
Abies sacra est Baccho; quercus Baccho & Cereri necnon Iovi & Rheae; fagus Iovi; laurus Apollini; palma Apollini et musis (Apollo quarum praeses)[1]; populus Herculi; cedrus Eumenidibus; aesculus Herculi & Iovi; cupressus Apollini et Diti; ficus Mercurio; fraxinus Marti; ilex Iovi; oleaster Iovi & Minervae; pinus Pani & Cybeli; platanus Genio[2]; smilax Baccho & Cereri; iuniperus Apollini.
Explanat autem suas coniunctiones ita (cito electas partes operis supradicti):
Abies. Qui obirent sacra Bacchi ramos abiegnos gestabant, siquidem illi in corona abies sacrata esset, uti testis est Xenophanes... Nam hederea, & smilax, & abies, & quercus erant arbores Baccho sacrae, quibus Thyades utebantur in sacris...
Quercus. Constat ex variis authoribus, quod in Cerealibus quercu coronabantur... Neque Baccho tantum & Cereri, sed & Iovi, ac Rheae, sacra existimata [quercus] fuit. Et Iuppiter quidem interdum coronabatur quercu, aut olea... Rheae vero etiam sacrata fuit... Araque eius frondibus ornabatur, ut testatur Apollonius in "Argonauticorum" libro primo.
Fagus Iovi sacra erat. Unde etiam fagutal, sacellum Iovis, cognomento fagutalis... (Festus: Fagutal, sacellum Iovis, in quo fuit fagus arbor, quae Iovi sacra habebatur).
Laurus est sacra Apollini, quod testatur Virgilius in Ecloga VII: Populus Alcidae gratissima, vitis Iaccho / Formosae Veneri myrtus, sua laurea Phoebo. Dicitur laurus Apollini sacra non solum quia fabula extat, quod Ladonis filia, quam amore Apollo prosequeretur, in illam arborem transmutata sit... Notum illud est, laurum Apollinis insigne perhiberi, eiusque fronde, palma iam posthabita, eius simulachra coronari. Et non propter ea tantum, quod laurus in rostro palumbi vim medicinalem indicet, quae plerisque volucribus praesentaneum praebet remedium, quantum quia sit, ut Eusebius ait, ignea, ideoque daemonibus infesta est. Quando uritur, sonum reddat, quod quandam praedicendi vim habet... Ferunt vero Empedoclem, qui animam esse igneam statuebat, lauri natura considerata, dicere solitum, si homini sit in animalium quodpiam transmigrandum, optandum maxime, ut in leonem transiret (...), sin vero arbor esset subeunda, in nullam commodius, quam in laurum, fieri transmigrationem.
Populus. Fama est, Herculem Cerberum per Acherontem fluvium in lucem eduxisse... Huius fluminis aquam insuavissimam fuisse, sicut etiam Cocyti, scripsit Pausanias in "Atticis", cuius alumna est alba populus, ut oleaster Alphei, populus nigra Eridani; quare cum ad Cerberum Hercules per eam portam accessisset, dicitur fuisse alba populo coronatus, cum ob caliginem tamen inferorum facta sit postea nigra illa corona, de qua apud Padum defossa, nata est nigra populus ut fabulantur.
Cedrus. [Multa de Eumenidibus narrat Meursius, licet iunctionem cum cedro nullo modo explanet; talia tamen de arbore dicit:] Cedro dignum dicere solemus quicquid iudicare volumus immortalitem mereri. Huius arboris ea natura est, ut cariem non sentiat; quare oleum cedrinum, authore Vitruvio, libros a tineis conservat.
Cupressus. Cyparissus Telephi filius fuit, amatus ab Apollline, vel, ut alii, a Sylvano. Qui cum lassatus aestu, sub quadam arbore somnum caperet, subito strepitu excitatus, cervum, quem in delitiis habebat, feram credens, per ignorantiam, emisso telo occidisset & fletu nimio & abstinentia cibi ac potus tabesceret. Misericordia deorum in arborem cupressum conversus est, aptam & consecratam lachrymis & luctibus. Alii hunc Cyparissum Cretensem puerum pulcherrimum & castissimum fuisse, quem quidam ab Apolline, nonnulli Zephyro amatum volunt; qui cum castitatem suam incorruptam tenere cuperet, relicta Creta, ad Orontem fluvium & montem Cassum dicitur pervenisse, atque in cypressum arborem commutatus. Quae arbor ideo mortuis consecratur, quod semel caesa nescit renasci... Virgilius ponit cupressum, quae est sacra Diti & funebri signo ad domos ponitur. Nam moris Romani fuit ramum cupressi domui funestae praeponi, ne quis pontifex per ignorantiam ingressus pollueretur.
Ficus. Sykon ephe' Herme, id est ficum Mercurio. De prompto & quibuslibet exposito beneficio dicebatur. Nam antiquus mos erat, sicubi ficus repertus fuisset, eum veluti Mercurio sacrum suspendere. Liberum autem erat tollere ficum Mercurialem, cuicunque libitum fuisset; vel quod is deus furibus favere creditus est, velu iuxta paroemiam illam koinos Hermes, communis Mercurius.
Fraxinus. In sacris Martis nulla ligna, nisi fraxinorum urebantur. Fraxinus vocari fertur, quod magis in asperis locis montanisque fragis nascatur.
Ilex Iovi sacra. Arbor de amplissimis, ut robur , materie spissa et robusta, sed quae frangatur ac dissiliat sponte sua; ob id Perciles Boeotios ilicibus dixit esse similes, ut est apud Aristotelem, quoniam ipsi se conficerent intestinis discordiis... Instar etenim laetissimi ominis id habuit Augustus: quemadmodum aliis olim fuit inter tristia omina, cornicem ex ilice argutantem audire, iuxta vulgare illud: Saepe sinistra cava praedixit ab ilice cornix.  
Oleaster. Terra initio fuit aquis adobruta, emersitque primum Attica; cuius amore ducti Neptunus & Minerva de civitatis constituendae nomine litem intenderunt. Ideo Iovi complacitum, eius esse urbis pontificium, qui pulcherrimum excogitasset munus, tunc portubus & navibus ab Neptuno urbem excultam, Minerva oleam producente in Acropoli – quo argumento evasit superiorem.
Pinus. Constantinus in libro XI "Geoponicon" dicit: Pinus puella prius erat & mutattionem naturae exacte duplicis assumpsit. Amabat enim puellam Pan. Amabat eandem etiam Boreas. Quum autem puellam alliceret, ipsa Panis amore magis afficiebatur & ob hanc rem Boreas, aemulatione motus, puellam in petras impulit ac neci tradidit. Terra porro miserta cladem, plantam puellae cognominem reddidit ac produxit. Et permutata vita erga eosdem plures affectus servat & Pana quidem germine suo coronat. Flet autem & lamentatur arbor, ubi Boream afflantem percipit. Hermesianax [autem] elegorum scriptor Atten Calai Phrygis filium ad suscipiendam sobolem inutilem factum ab ipsa Dea scripsit; qui cum adolevisset, Magnae Matris ceremonias in Lydia monstravit. Quare tanto in honore fuisse apud Deam dicitur, ut Iuppiter illud graviter ferens immanem aprum in segetes Lydorum immiserit, a quo & alii Lydorum complures, & ipse Attes fuerit interemptus. Fama est praeterea Atten in arborem pinum ab ipsa Dea conversum fuisse, quare pinus matri Deum fuit consecrata.
Smilax. Utebantur in Sicilia in sacrificiis Cereris non floreis quidem coronis, neque in aliis eius sacrificiis, quia ob memoriam raptae filiae colligentis flores, illi fuerunt vetiti. At myrteis coronis & e smilace utebantur... Et smilax Baccho quoque sacra est.
Iuniperus. Memoriae proditum est a Musaeo in libro III iuniperum arborem Apollini consecratam fuisse.




[1] Ceterum, omnibus fere diis et laurus et palma gratae, ut signa gloriae (laurus) ac victoriae (palma).
[2] Non dicit cur.

środa, 28 października 2015

De arboribus – porro

E.G., amicus meus herbarius, quem cum de opinione sententiae sacerdotis Klimuszko de "malis" arboribus rogassem, respondit: Noli mirari sacerdotem id dixisse – ecclesia catholica persectatur omnia vestigia paganitatis. At berberis, tremula, populus, alnus et sambucus nigra erant Slavis arbores (fruticesve) sacrae; sicut et aliis gentibus. Hem, credidi patrem Klimuszko maioribus virtutibus duci... Non ego tamen sum, qui de hac re iudicet.
Ceterum, de sambuco nigra disputantes, meminisse debemus secundum populi sapientiam ex hac arbore crucem passionis Christi factam esse (licet sint, qui aliter sentiant, pinum nigram, cypressum, ulmum, buxum, abietem aut etiam iuniperum ea honore dignas putantes[1]). Omnes fere[2] autem in eo consentiunt de ramo sambuceo se pependisse Iudam Iscariotam. Rebus ita stantibus, facilius intellegi potest, cur fungus quidam arborealis nominetur – lingua taxonomica Linnaeana - Auricularia auricula-judae (in aliis linguis similiter, ut ucho Judaszowe Polonice, licet nonnullae terrae mutaverint nuper id nomen ob causas "rectitudinis politicae"). Scimus enim auriculariam hanc praesertim in trunco sambuci nigrae nasci.
Ceterum flos sambuci adiuvat bronchitem similesque morbos mederi.
De alno autem – altera arbore "mala" secundum divisionem Klimuszkianam – scimus eam sacram apud Graecos fuisse Phoroneo, conditori urbis Argos, qui scilicet quasi proxeneta Promethei fungeretur, homines docens usum ignis.
Patri Klimuszko quoque odiosa populus tremula eo claret, quod ex ligno eius factus sit paxillus, adhibitus a Cain ad Abel necandum. Paxilli tremulani credebantur quoque optimi – apud Slavicas gentes Paeninsulae Balcanicae – esse ad interficiendos vampyros, si tantum cor vampyri ferias (aliter enim nullo modo morietur). In Polonia gomphis e tremula factis utebantur homines ut operculum arcae funebris clauderent – aliter mortuus, alias arbores minime timens, tumulum noctu reliquerit et ut lar sui propinquos terrebit.


[1] Apud Romanos autem lugubrem arborem fuisse piceam. Ut ait Plinius (Nat. Hist. XVI): Picea montes amat atque frigora, feralis arbor et funebri indicio ad fores posita ac rogis virens.
[2] Fere, nam nonnulli tremulam monstrant, de qua arbore infra.

wtorek, 27 października 2015

De arboribus homini bonis et malis

Dendrotherapiae studebat quoque sacerdos Polonus ordinis sancti Francisci, Czeslaus (Czesław) Klimuszko (1905-1980), qui ceterum claruisse dicitur facultate res futuras praedicendi.
Post studia multorum annorum pater Klimuszko divisit arbores in tres classes:
a) arbores homini secundae: larix, pinus, picea, abies, juniperus, taxus, betula, tilia, quercus, aesculus hippocastanum, acer, morus, acacia
b) arbores homini neutrales
c) arbores homini adversae: berberis, populus, populus tremula, alnus, sambucus nigra.
Cui sententiae tamen e parte saltem contradicit scientia fatidicae Carminis (de qua scripsimus ante nonnullos dies), quae dicit talia:
Sambucus nigra – accelerat sanationem vulnerum, reddit meliorem condicionem animi; potio ex floribus facta curat perfrictionem, corroborat systema immunologicum.
Alnus – contra energias negativas protegit, iuvat cernere bonum e malo; iucunda dat somnia (et nocturna, et diurna).
Populus – corroborat "affectus nobiliores" (ut amor, misericordia, amicitia) necnon "internalem evolutionem" hominis; ad virtutes animi ducit, novas in vita semitas monstrans; solitarios in tristitia adiuvat.
Quot homines, ergo, tot sententiae. Etiam inter dendrotherapeutas.

Verba viri sapientis

Homo, qui scit cum arbore loqui, non eget auxiliis psychiatrae. Pro dolor, multi aliter sentiunt.
Phil Bosmans (1922-2012), sacerdos catholicus Belga, inter alia etiam dendrotherapiae peritus

poniedziałek, 26 października 2015

Alcohol in crine cometae

Cometa C/2014 Q2 Lovejoy, repertus anno 2014 ab astronomo Australiano Terry Lovejoy, photographematis ipsius cautius a studiosis investigatis, praebet se plenam alcoholis esse. Praeter alcoholem ethylenicum necnon simplicem compositum saccharicum (glycoaldehydium) crinis eius continet 21 alia composita chemica. Secundum astrophysicos observatorii Lutetiensis duce Nicolas Biever, cometa hic producit unaquaque secunda horae parte copiam alcoholis, quae satis esset ad faciendum 500 lagoenas vini. 

niedziela, 25 października 2015

De carne humana, cibo hominibus optimo

Matthias, 32-annorum puer eternus ac philosophaster incredibilis, dixit se scire (non dixit tamen unde) Americanos studiosos iam ante longum abhinc tempus invenisse bovinam pessimam inter carnes esse – hanc veritatem Iudaeos Americanos adhuc ut enigma sanctissimum procul ab oculis humanis custodisse, sed nuper diurnariis quibusdam rem reperire contigerit.

Ad hoc M., noster hospes, dixit se meminisse percontationis diurnariae professoris Georgii (Jerzy) Vetulani, neurobiologi Cracoviensis, qui dixerit optimam esse homibus carnem humanam, quam nihilominus non comedimus propter odium anthropophagiae – rebus ita stantibus optimam esse porcinam, nam sus, sicut homo, manducat omnia (est nobis ergo quasi animal moribus proximum). Per interrete paululum quaesivi et inveni professorem Vetulani – cuius verba ceterum legere iucundum mih est – re vera dixisse ista!

piątek, 23 października 2015

Nuntii Iconoclastae plus minusve praeteritae septimanae

Vitam in terra adfuisse iam ante 4,1 miliarda annorum, longius quam adhuc putabatur (3,8 mld), patet ex investigatione zirconiorum facta a geochemicis Univesitatis Californianae duce Mark Harrison.

Comitiis a se victis, post fere decem annos factio liberalis denuo rectura est Canadam. Novus dux gubernationis erit 44 annorum Justin Trudeau, cuius pater iam munere ministri primarii Canadae fungebatur annis 1968-84.

5 milia migrantium e Proximo Oriente oriundorum intraverunt Sloveniam die Lunae – nuntiaverunt magistratus Labaci (Ljubljanae).

Tertio trimestri huius anni productus domesticus Sinarum crevit passu 6,9 centesimarum, i.e. 0,1% lentius quam mensibus IV-VI, sed 0,1% citius quam a peritis oeconomiae exspectabatur – nuntiavit Officium Statisticum Sinense.

Regimen Hungaricum clausit loca trangressus limitis sui cum Croatia, postquam ultimis tribus diebus decem milia migratorum e terris Proximi Orientis oriundorum intraverant Hungariam, Germianiam et Austriam postea petentes. Permulti migrantes conantur nunc, limite Hungaro-Croatico clauso, per Sloveniam iter facere.

Numerus hominum miliardariorum Sinensium iam maior est quam US-Americanorum. Secundum calculationem Serici periodici "Hurun", Sinis adesse nunc 596 miliardarios (ante annum, tantum 354), dum US-Americae – 537. Una cum divitissimis Hongkongiae, Taiwaniae et Macao, "Magnae Sinae" habent 715 miliardarios.

Praemio Nobeliano oeconomiae donatus est prof. Angus Deaton, Caledonus hodie in USA docens, pro studiis pertinentibus ad consumptionem, paupertatem et opulentiam.

97 homines necati sunt Ancyrae, in urbe capitali Turciae, ob duos ictus tromocraticos, verisimiliter suicidiales. Circiter 180 vulnerati sunt.

De urbe mea

Mutat faciem urbs mea celerrime.
Ecce photographema anni 1954, monstrans viam urbis principalem, Mareschalcinam (Marszałkowska):


Atque idem locus hodie:



środa, 21 października 2015

De dendrotherapia, arte adhuc mihi ignota

Per silvam heri vagando, fessus, paululum requiescere decrevi, dorsum ad truncum arboris cuiusdam applicans. Ita, putavi, post duas tresve minutas, semi-stans, semi-sedens, vires recuperabo. Sed sub arbore hac mansi saltem viginti minutas, in quodam incredbibili, meditativo statu mentis, quasi effascinatus. Curae omnes cotidianae me subito reliquerunt et bono cum animo ad vitam meam resque futuras spectabam, quasi privatus "metu exsistentiali", quo aliter laboro fere umquam. Obiter notavi, folia arboris intuendo, arborem me nitentem genere fraxini (Fraxinus excelsior) esse, nam, gratia patris mei, viri vero "silvestris", nonnulla arborum genera cognoscere scio.

Domum reductus, de dendrotherapia aliquid in interreti quaesivi, scilicet arte ex arboribus energiam ad vitam sustentandam "haurire". Inveni paginam dicentem: fraxinum optimum esse omnibus nimio labore fessis, tristibus atque animo demisso laborantibus (pessimistis); animum hilariorem fraxinus reddit necnon instigat hominem ad nova incepta suscipienda sive vetera (etiam cum difficilima videantur) pergenda (paginam redigit fatidica Carmen). Ceterum inveni foliis fraxini in Gallia et Belgica uti ad comparationem potionis alcoholicae nomine frênette (nam le frêne fraxinus apud Gallos nominatur). Scimus hastas optimas e ligno fraxineo Romanos Graecosque fecisse, sicut hasta Achillis, qua Hectorem necavit (si bene memini, fraxinea erat). Ob hanc rem (et fortasse alias) fraxinus maximi momenti arbor apud Germanos habebatur. 

sobota, 17 października 2015

Lapidem in "calvarias" ferre

Adesse Polonis morem – qui saltem hic, in meridionali patriae parte, scilicet in montibus Carpathicis, observatur – certo die peregrinari in montes sacros, quos "calvariae" nuncupamus. Ibi saepissime magnae ecclesiae et monasteria adsunt, necnon Via Crucis spatio nonnullorum chiliometrorum, qua peregrinatores adveniunt, montem ascendentes eti in omni statione passionis Christi preces dicentes. Tarnovienses, id est incolae mihi nunc fere proximae urbis Tarnoviae, in iter tale proficiscuntur cras (die 18 Oct.), sed ignoro quem montem petant – aut clarissimam in Polonia Calvariam Zebrzydowiensem, aut quandam aliam. Ut tamen Tarnoviae heri degens didici, peregrinatoribus masculini sexūs obligatio est lapidem secum aut in manibus aut perā dorsualiā ferre, quasi pondus peccati sui, quod in summa monte in quodam lapidario relinquunt, peccatis symbolice se liberantes. Magnitudinem lapidis quisque peregrinator debet secundum sui conscientiam eligere.
Primum volui et ego una cum Tarnoviensibus, lapide oneratus, montem sacrum petere – licet parva mihi sit iunctio cum Christianis; tales, nihilominus, mores "paganici" valde mihi placent. Sed nonnullae res extraneae me in hoc incepto perficiendo prohibuerunt. 

Plures divitissimos Seres habent quam America

Seres habent plures miliardarios – id est homines cum re familiari maiore quam 1 miliardum dolariorum –  quam USA! Tempore, cum index divitissimorum hominum mundi 2015 anni a diurnariis periodici "Forbes" factus sit (i.e. mense Martio), miliardarii Sinenses alterum locum in indice occupabant – postea tamen, postquam incredibiliter ingens animus altus in foris Sericis prima parte huius anni regnasset, numerus miliardariorum citissime crevit.
Secundum calculationem novissimam Serici periodici "Hurun", Sinis adesse nunc 596 miliardarios (ante annum, tantum 354), dum US-Americae – 537. Una cum divitissimis Hongkongiae, Formosae (insulae Taiwan) et Macao, "Magnae Sinae" habent 715 miliardarios.
Sed cavete, Seres – a mense Iunio fora vestra bursaria stagnant et nonnulli hesterni milliardarii hodie iam miliardarii fortasse porro non sunt. In spatio unius totius anni – id est a die 17 Oct. 2014 usque diem 17 Oct. 2015 – praevalent tamen incrementa: +44 centesimarum.   
Divitissimus Ser, Wang Jianlin (negotiatio Dalian Wanda Group), qui domus struit venditque ac catenam cinematographeorum tenet, possidet rem familiarem magnitudine 34,4 mld dolariorum. Alterum in indice miliardariorum Sinensium esse Jack Ma, praesidem negotiationis internetialis Alibaba. Non sunt hi ambo adhuc pares talibus ut US-Americanus Bill Gates (79,2 mld $), Mexicanus Carlos Slim (77,1 mld $) aut US-Americanus Warren Buffett (72,7 mld $), sed... exspectemus numeros 2016 anni; usque tunc omnia fieri possunt.
Ceterum, maiorem iam esse quoque numerum Serum quam US-Americanorum, qui statum habeant "classis mediae" (middle class): hos esse 92 miliones, illos 109 mln.

De horologiis ac modis praenuntiandi horam mortis

Adalbertus, amicus meus nauticus, monstravit mihi nuper horologium, quod magno pretio emerat, omnibus novitatibus technicis instructum. Ita, exempli gratia, mechanismum excitatorium horologium habet, qui mechanismus e somno hominem excitet in optimo ad sanitatem puncto temporis, sc. in phasi REM, quam novit pulsum hominis dormientis continuo indagans. Ceterum nuntiat horologium de adventu epistularum electronicarum et partem initialem epistualae monstrat.
- Restat, ut tibi horam mortis dicat! – iocose locutus sum. Adalbertus et alii ibi praesentes in risum eruperunt.
Certe desunt modi horam mortis in longo antecessu praenuntiare, conantur id facere nihilominus nonnulli. Ut exempli gratia meretrix Bohemica, de qua legi in periodico "Playboy", cui adesset facultas e gustatu spermatis horam mortis sui fututoris dicere, e.gr.:
- Morieris, domine, post duos abhinc annos.
Nam sperma viri veteris mortem appropinquantis aliter sapiat quam semen iuvenum. Ita saltem "Playboy" docet.    

środa, 14 października 2015

Vanitas vanitatutum et omnia vanitas

In scriptiis professoris philosophiae Jan Trąbka (1931-2012) inveni tale:
Secundum H. Putnam, lacunae in argumentationibus reddunt comprehensionem earum faciliorem. Discontinuitas et pausae pertinent ad naturam numerandi, quam rem optime monstrant structurae fractalicae, quae minime integrantur. Multi philosophi advenerunt in cogitationem lacunas, pausas caesurasque esse integralem atque irrefutabilem componentem realitatis. Harum metaphysicam esse vacuum.
Fons: Jan Trąbka, Człowiek wobec naturalnej pustki (Homo coram vacuo naturali), in: Człowiek i pustka. Problemy wakuumologii (Homo et vacuum. Problemata vacuumologiae), Allenstenii 2000.