czwartek, 30 czerwca 2016

Nuntii Iconoclastae praeteritae septimanae

Agentura aestimatoria Standard & Poor's minuit notam credibilitatis Unionis Europaeae uno puncto, ex AA+ in AA.

Denuo infra limen 50 USD per dolium praebetur petroleum. Hora 13:42 dolium petrolei Brent venundabatur 49,02 dolariis.

Aliquantulum carior fit libra Britannorum, postquam erga franco Helvetorum amisit 10,97% pretii (nunc vilior est franco "tantum" 9,34%, pretio ante Brexitum comparata)

Altero die, post duos dies casuum gravissimorum, crescunt denuo tituli negotiationum in foris mundanis. Hora 13:30 (zonae temporis Europae mediae) index maximi momenti 50 negotiationum Europae (Eurostoxx 50) crevit passu 2,57%.

Computus victimarum in aeriportu Constantinopoli crevit usque 41 mortuos ac 239 sauciatos. Secundum ministrum primarium Turciae, ream huius actus tromocratiae esse Civitatem Islamicam.

Saltem 10 homines vitam amiserunt, 40 sauciati sunt in binis ictibus tromocratarum contra aeriportum Constantinopolitanum. Aeriportus ad tempus clausus est. (Postea de 28 occisis ac saltem 60 sauciatis annuntiatum est.)

Agentura aestimatoria credibilitatis fiscalis S&P minuit duobus punctis – ex AAA in AA - notam Britanniae. Causam esse praedictiones difficultatum oeconomicarum propter Brexitum. Agentura Fitch minuit suam Britanniae notam uno puncto - ex AA+ in AA – cum prospectu negativo.

Exercitui Iraquiensi contigit urbem Faludja – quae distat 60 chm a Bagdato – a bellatoribus Civitatis Islamicae expugnare.

Praesidens Columbiae et dux bellatorum clandestinorum factionis sinistrae FARC firmaverunt pactum de fine belli civilis, in quo bello, spatio plus quam 50 annorum, vitam amiserunt plus quam 220 milia incolarum Columbiae.

Casanova Latine de mentula cunnoque

Multi vestrum id sciunt, sed fortasse non omnes. Adesse diariis Jacobi Casanovae Gallice scriptis mentionem colloquii, quod cum aliquibus Latine habebat. Memoria id caliginosa tenebam per 30 fere annos, nam tunc, adulescens, super Gallicam sudando, diaria huius viri ingeniosi legi. At colloquium ipsum hodie facile in interreti inveni, nam aliquis internauta Anglice poscebat significationem.
Casanova ita collocutores suos rogavit:
"Dicite, grammatici, cur mascula nomina cunnus, 
Et cur femineum mentula nomen habet?" 
At cum respondere nequissent, explanavit: 
"Disce quod a domino nomina servus habet"
Ceterum... nonne disticha haec sunt? (Rogo minime rei metricae peritus.)

Minime antiquus homo sum...

Minime antiquus homo sum, mores mihi omnino non Graeco-Romani. Hi enim epulari in lectis iacentes solebant, in comitatu 2-8 amicorum, ego autem libentius cibum sumam solus ac stans: nam stantem puto citius concoquere (digerere per intestina) escam. [Aliquis ante me id dixit, nonne mendax iste iactatorque Seneca? Sed in hoc casu fortasse recte opinatus est.]
Amo fastfood, i.e. cibum citissimum, odi cauponas plus minusve luxuriosas, cum ministris circum te "saltantibus" ac gerentibus se quasi servi dominum glubere parati. Puto eos munus suum odisse et ob hanc rem spuere in cibum, quem ad mensam adportaturi sunt. In cauponis fastfoodianis operarii fortasse quoque munus suum oderunt, sed saltem magna ex parte in visu cenantium manent, ergo non spuunt, saltem non facile. Certe Romani cauponas luxuriosas non habuerunt ac quae iis aderant, a plebe frequentabantur. Sed si hodie viverent, sine dubio, si tantum plus minusve pecuniosi essent, apud Ritz Lutetiae aut Nomam Hafniae libentius cenarent. Ego autem talibus in locis nescirem quo me verterem. Ceterum, dant ibi saepe portiunculas civi minimas...
Semper festino, rarissime me iuvat in uno loco sedentem/iacentem circumiectibus delectari. Fortasse ob hanc rem meditari numquam cum successu potui - ut iam hic olim dixi, oculis clausis statim feminas nudas mente pingo - neque monachus lamaicus factus sum.
Ergo non Graeco-Romanus, non buddhista, neque vero Polono-catholicus, neque (pro dolor fortasse) Iudaeus. Sed... vita mihi placet, magis quam umquam antea. Mori nunc coactus valde hac re stomacharer.  

środa, 29 czerwca 2016

Aegyptiaca: notatiunculae chaotice scriptae

Homo creatus est ex oculo Dei, sed tempore cum oculus hic plorabat. Hanc ob rem homo minime perfectus factus est.
xxxx
Aegyptii credebant se scire tantum dimidiam partem veritiatis (=mundi, cotidianae viae Solis per orbem). Et hanc et alteram partem (=nocturnam viam Solis), ergo totam veritatem, sciunt tantum mortui. Condicionem mortuorum ita quasi meliorem esse condicione viventium.
xxxx
Sol et Luna - duo oculi Dei, quibus semper intuetur ille mundum. Semper, praeter tempus interlunii necnon defectum aut Solis aut Lunae. Ergo cum malae res (perturbationes) in terra eorum evenirent, rogabant Aegyptii: Num Deus dormit?

De sorte futura Caledoniae

Effectu plebis scitu Britannorum male (nimis pacifice) proviso, nunc de Caledonia (Scotia) disputantes analytici argentarii aliquantulum audactius agunt. Ecce Malcolm Barr, peritus domus argentariae JP Morgan, scribit in notula cotidiana hodie clientibus missa: Putamus Caledones pro independentia suffragaturos, Caledoniam autem novum nummum [=euronem] apud se introducturam. Pronuntiatio sui iuris Scotiae fiet, secundum Barr, anno 2019, eodem anno cum Britanni Unionem Europaeam, negotiationibus de divortio ad finem perductis, relicturi sint.  

wtorek, 28 czerwca 2016

De Brexitu (porro)

Cur tantopere attoniti sumus effectu suffragiorum Britannorum (an potius Anglorum, nam aliae Britanniae gentes dicuntur aliter, id est pro Unione Europaea, suffragatas esse)?
Indagationes opinionum ante plebis scitum factae monstrabant victores modo fautores in Unione manendi, modo ex UE abeundi. Fontem (falsam) optimismi analyticis praebuerunt sponsiones (Anglice bets) - nam Angli sunt natio sponsionum, ergo certe etiam Britanniae sortem futuram ludo isto dedere iis lubebat. Analytici animadverterunt maiorem pecuniam sponsionibus datam esse ad optionem in Unione manendi; nonnulli tantum in suis operibus adiecerunt... maiorem partem hominum sponsiones facientium elegisse abitum, i.e. pauperes cives (numerosiores) pro abitu sponsionatos esse, divites autem (pauciores) pro Europa. At in suffragandi actu pauper et dives eandem vim habent...
Diurnarii annuntiant quoque modo ante referendum fundi collocatorii generis hedge funds se contra praevalentem opinionem (=Britannos in UE mansuros) per fas et nefas protexisse contra viliorem libram Britannicam. Quasi hedge funds ut solos res futuras scivisse. Post effectum suffragandi annuntiatum, libra re vera plus quam decem centesimis partibus vilior facta est erga francum Helvetorum (qui putatur tutissima moneta Europae esse); hodie demum - i.e. die Martis - casus incredibilis valoris librae stitus est (sicut et animus bassus in foris, hodie bursis totius mundi primum post Brexitum crescentibus).
Si ergo nuntios de sponsionibus cautius legissemus, minus attoniti effectu suffragiorum fuissemus, minor tunc verisimiliter esset ipse timor Panicus necnon casus titulorum in foris ac valoris librae.

poniedziałek, 27 czerwca 2016

Aegyptiaca: de ludo significationum in nominibus deorum

Nomen dei Atum, mundi creatoris, significat et nihil et omnia*. Quomodo id fieri potest? Certe, fuerat Atum nihil antequam mundum - autofellatione, respuendo sperma haustum - creavit, fuerat quasi punctum displosionis initialis (=Big Bang). Ex se autem creavit omnia...
Deus Solis Ra/Re nominatur quoque periphrastice invisibilis in visibili. Nam si spectemus recte Solem, statim quasi occaecati fiamus nihilque conspicere in ipso Sole possimus.  
* aut potius: Is, qui in nihilo fuit omnis; nomen substantivum commune tem significat 'nihil' et 'omnia'

Certamen Europaeum pedifolii (IV)

Cum amica-Latinistria hodie de hysteria pedifolli collocutus sum. Speravi eam, ut hominem gravem, a hoc morbo liberam esse. Sed frustra: dixit se primum nostratum ludum non spectasse, alterum item non spectasse, sed cum audivisset nostros sat bene se in campo gerere - quod omnino inopinatum est, nam per multos annos pessimi pedilusores fuimus - tertium ludum (contra Helvetos, quos ictibus poenariis superavimus) sua sponte spectabat.
Male hunc nuntium ferebam, quod videns adiecit puella:
- Tantopere gaudeo nostros denuo, post tot annos, vincere! Et facies lusorum non tam tristes hodie videntur ut olim. Et viri hi sunt quasi... sexualiter illecebrosiores quam ante quinque decemve annos.
Confessione amicae attonitus, domum reductus inspexi in interreti photographemata undecim lusorum, qui contra Helvetos pugnabant. Hem... fortasse aliter ego et amica de pulchritudine marum sentimus.

Caffea matutina

Neuropsychologi Italici, quibus munus in nosocomio oppidi Summa Longobardiae (Somma Lombardo), nuntiant de sui patiente, initialibus J.C. noto, viro Italo 50 annorum, qui post laesionem cerebri [rectius: arteriae basilaris] coepit... Francogallice loqui (quam linquam ut iuvenis in schola didicerat, sed abhinc omnino fere oblitus est nullasque iunctiones cum civibus aut rebus Gallicis tenebat).
Nunc autem, post cerebri laesionem, J.C. ut Francophilus maximus Galliam quasi sui patriam colit. Loquitur solum Gallice (Italicam porro intellegit, sed spernat), menda interdum grammatica faciens, sed loquitur cito ac intellegibile. Ceterum mores Gallorum sibi adoptavit: panem Napoleonicum (baguette) in taberna emit, ephemerides Gallicas legit. Cotidie mane cum fenestram domus aperit, homines via praeterambulantes salutat exlamatione: Bonjour!

Canis fidellima

Canis nostra me amat, sed uxorem magis: sentit fortasse eam hominem bonum esse, me autem sub stella acida natum.
Ecce heri, cum procella Varsoviam vastavit, uxor domi deerat. Canis autem de ea valde timens, totum tempus ante portam dominam domum revertentem ita exspectabat [imago non bonae est qualitatis; ignoscite]:

Serrae ubique audiuntur

Ordo regnat Varsoviae, sed... ordo quasi post bellum: heri enim procella urbem nostram, aut saltem hanc eius regionem ubi habito, vastavit, multas arbores caedens. In via mihi proxima caudex crassus longitudine ca. 10 metrorum iacebat - motus autoraedarum omnino stitus est. Totam fere noctem plaustra siphonariorum huc et illuc currebant, cornu Martiniano boatum edentes lumineque caeruleo gliscentes. Nunc autem, postero die, serrae aut electricae aut (saepius, puto) naphtham haurientes, ubique operantes audiuntur.
Mane autem in horto nostro inveni arborem - non magnam, Deo gratia - caesam in gramine iacentem; cadendo evertit arbor funes quibus vestes modo lavatas esiccandasque interdum sub Iove ponabamus, nam in balneo locus vestium essicandarum parvulus tantum nobis adest (heri ex. gr. vestimenta non omnino sicca ante ipsam procellam domum adportavi).
Habuimus ergo calamitatem localem, sane, non tantam ut Brexitus. [At Brexitus nihil, mea saltem sententia, Britannis profuit: ut nesciverunt, qui essent, ita porro nesciunt.]

sobota, 25 czerwca 2016

Certamen nondum finitum

E boatu horribili per vias Varsoviae manante reperio onanismum gregalem nostratum nondum finitum esse...
Utinam in inferno 24 horas per diem continuo folle stupidissimo ludant!

Certamen Europaeorum pedifolii (III)/Aegyptiaca

Quid adesse communitatis Veteri Aegypto atque ludo pedifolii Europaeorum? Nihil - respondebis forsan, lector care. Erras! Hodie enim particeps primum fui sessionis annualis (Polonicae) Associationis Amatorum Veteris Aegyptii "Herhor" [a nomine sacerdotis regisque-usurpatoris, qui XI saec. a.Ch.n. Aegyptum Superiorem regebat]. Ca. 30 participes - praeter me, soli, puto, doctores professoresve - advenerunt, ut acroasim prof. Andreae Niwiński [qui credit se sepulchrum Herhoris invenisse] audirent. Sed, di boni!, sessio duabus horis brevior solito annuntiata est propter... certamen Polonorum contra Helvetos, quod hodie hora tertia pomeridiana incipuit.
Nunc sine dubio finitum est certamen, at mihi nullam cupiditatem adesse victorem quis evaserit sciendi. Scio tantum propter ludum istum [quo morbo solum plebem vilissimam laborare adhuc putavi] me minus de rebus Aegyptiacis hodie didicisse quam sperabam.  

piątek, 24 czerwca 2016

Nuntii Iconoclatae scripti spatio plus minusve praeteritae septimanae

Britanni plebis scitu consilia ceperunt se Unionem Euroapeam relicturos. 51,9% civium pro Brexitu suffragia dederunt, dum tantum 48,1% in Unione manere voluerunt.

Effectibus suffragandi annuntiatis, moderatores Caledoniae (Scotiae) declaraverunt apud se novum plebis scitum de sui (independente a Londinio) iure mox habitum iri. Item fortasse facere cigitant magistratius Hiberniae Septentrionalis (Ulster), nam ambae hae regiones – Caledoani et Hibernia Septentrionalis - in plebis scitu maxima e parte contra Brexitum suffragatos esse.

Brexitu a civibus probato, simile apud se referendum volunt habitum iri politici euro-seditiosi Italiae, Francogalliae et Bataviae.  

Praeterito anno 65,3 miliones hominum coacti sunt domus relinquere propter bella, nuntiat UNHCR. Numquam adhuc numerus profugorum tam magnus fuit; anno ex. gr. 2014 -59,5 mln. 21,3 mln praeteriti anni profugorum asylum in terris alienis invenerunt, 40,8 mln in alias regiones suae civitatis migraverunt. 3,2 mln peregre exspectant ut officialiter statu profugarum donentur.

14 pueri et unus adultus mersi sunt postquam ob procellam navis eos vehens eversa est in lacu Siamozero regionis Careliensis Russorum.
 US-Americana negotiatio cosmetica Revlon Inc. emptura est 419 milionibus dolarium sui aemulatricem Elizabeth Arden.
 Secundum indagationem opinonum peractam ab operariis instituti Ipsos MORI, Unionem Europaeam relinquere volunt 48% civium Italiae et 41% Francogallorum. 
 E novissimis demoscopiis patet fautores exitus Britanniae ex Unione Europaea plures esse quam volentes in UE manere. Indgatio opinionum situs YouGov montrat fautores Brexitus 7% superare "Europaeos", dum in investigatione societatis ORB superatio haec est tantum 1%.
 In Philippinis detruncando necaverunt obsidem Canadiensem Robert Hall tromocrates islamisticae gregis Abu Saiif (quae grex socia est Al-Qaidae ac Civitatis Islamicae) – nuntiavit locutor regiminis praesidentis Philippinarum Herminio Coloma.
 29 annos natus civis USA gentis Afghanicae Omar Mateen sclopetando necavit plus minusve 50 homines in thermopolio cinaedorum urbis Orlando civitatis Florida, antequam ipse a biocolytis occisus est.

Vale, Britannia!

Hoc die historico non possum, quominus citem poetam Vindobonensem Martinum Zythophilum:
"Heus, Europa, uale!" clamant gaudentque Britanni,
libertate frui se quia posse putant.
necnon opinionem ante multos annos prolatam prof. Noam Chomsky, qui praeter artem linguisticam politologiam quoque colit ac notus est praesertim sua castigatione Americanorum; de Britannia autem dixit, tempore tunc adhuc belli frigidi, plus minusve talia:
Britanniam esse maximam navem planigeram (i.e. quae aeronaves vehit), quam USA in litoribus Europae tenent. (...) Independentiam Britannorum a regimine Vasintotniense esse plus minusve eius generis ut independentia Ucrainae ab Unione Sovietica.
Num Americani gaudiunt hodie hanc navim planigeram aliquantulum sibi propius adduxisse? Dubio. Licet theoriae coniurationis mundanae fautores credant USA gaudere omni damno Europaeorum, ne aemula sibi par UE creascat.  
At in ianuam post Britannos iam pulsant plebis scitum apud se habendi cupidi: Caledones, Hiberni Septentrionales, Francogalli, Itali et Batavi.
Cave Europa, ne in continente quoque aliquid tibi voluntate populi eripiatur.

środa, 22 czerwca 2016

Caffea matutina: vinum felinum

Mox emere poterimus vinum felibus aptatum. Negotiatio enim Apollo Peak praebet cattis vinum atrum (rubrum) nomine Pinot Meow necnon album - Moscato. Pretium lagoenae - 12 dolaria.
Nolite tamen timere, felum domini dominaeque: potionibus Apollinis deest alcohol. Nam Pinot Meow ex. gr. e suco betae fabricatur. At adest "vino" felino elementum excitativum: extractio herbae nepetae (Nepeta L.), quae maxime felibus placet. Saltem tria sub-genera nepetae (N. catariaN. grandiflora i N. faassenii) putantur feromona felina continere, quibus efficitur, ut 2/3 cattorum in praesentia huius herbae quasi ebrii se gerant.
Polonice nepeta kocimiętka nominatur, i.e. 'mentha felina'.



wtorek, 21 czerwca 2016

Nugae matutinae (2)

Regimen populisticum dextrae partis potitus est anno 2015 potestate in Polonia pollicendo omnibus parentibus pro secundo, tertio etc. in familia puero puellave unoquoque mense 500 aureos (ca. 125 dolaria Americana) solutum iri [ut sc. homines citius consilila capiant ad liberos producendos, nam crisi demographica, ut omnes nationes Occidentales, laboramus].
Mense Maio re vera magistratus coeperunt hanc pecuniam parentibus solvere. Nunc, secundum amicum meum, qui munere diurnarii-analytici rerum oeconomicarum in actis quibusdam fungitur, primos effectus pecuniae infusionis esse: 1) maior consumptio aquae vitae (quod exspectavi, nam plurimos liberos habent imprimis familiae "pathologicae") necnon 2) venditio autoraedarum (nam hae creditis argentariis saepe emuntur, summa solvendi menstrua plerumque non magis 500 aureis). Ergo aut temetum, aut raeda; dilemma difficile...
----
50 annos nunc natus Romario, pedilusor olim praeclarus Brasilianus, burgimagister vult fieri Urbis Fluminis Januarii (Rio de Janeiro). Nuntio audito primum exhorrui. Deinde tamen putavi: Ut fiat! E ratione statistica enim patet eum verisimiliter meliorem fore viris politicis professionalibus.  
----
Frater me rogavit: Quis deorum paganorum maxime in orbe catholico "clam" colitur?
Respondi: Bacchus Venusque.

Nugae matutinae

"Crapula" hodie mane laboravi, licet nihil heri alcoholis bibissem. Iniucunde esse crapula laborare, iniucundius autem sine bibendo.
----
Caffeam expressam ("Mixtura Sicula") modo in os sumpsi, cogitans de etymologia verbi hodierni 'express', sensu sc.: citissime factum. Originem verbi certe scivi ['exprimere'], incertum tamen manebat, ubi sensus festinandi ei additus esset. Quaesivi in vocabulario Harperiano: a nuntio/cursore [Ang. special messanger], qui eo nomine [=express] nuncupari solet ab anno circiter 1615. Ab anno 1841 in USA quoque sensu 'tramen citatum', quod sc. non in omnibus stationibus sistatur.
Quaesivi ceterum in dictionario etymologico Gallico, ubi admittunt se sumpsisse verbum ab Anglophonis. Quod rarissime evenit. Id est, raro Galli verbum Anglicum important, saepius Angli Gallicum. Etiam rarius Galli fatentur se in qualibet re "inferiores" esse.  
----
Puellula Singapurana coepit linguae Russicae studere scripsitque in diario suo:
(Ridendum: Tolstoy, nomen scriptoris egregii, deductum est de verbo significante 'crassus'. Nomen huius viri scriptum est толстoй adjectivus vero толстый; ut bene videtis, vocabula similia sunt.)
Re vera, ridendum, considerans eum, in fine saltem vitae, propagatorem fuisse diaetae modicae/rusticanae/vegetarianae(?).

niedziela, 19 czerwca 2016

Num vero numquam eandem amnem intramus?

Uxor mea hodie mane ruri (in nostro praedio "Lithuaniensi") legit acta hebdomadalia localia, ubi de historia potionum Coca-Cola et Pepsi-Cola scribebatur. Animadvertit uxor me de eadem re scripsisse ante nonnullos menses in actis gastronomicis Varsoviensibus "Culina" (ubi pseudonymo utens de historia ciborum etc. unoquoque mense scribo). Animadvertit id cum oculus suus in verbum 'vinum Marianum' incidisset, de quo locuti olim ambo sumus. Legit mihi tunc uxor voce magna totam symbolam. Inveni scriptorem (actorum localium) generaliter recte - mea sententia - scripsisse, licet in nonnullis punctis eum libenter correxerim. Tunc, in fine symbolae, vidimus... nomen meum (i.e. pseudonymum) ut nomen auctoris - re cautius inspecta vidi symbolam citationem plenam fuisse symbolae meae, sine ullis mutationibus. Quod lege fecerunt diurnarii locales, nam "Culina", non ego, est possessor iuris divulgandi et sine scientia & consensu auctoris licet ei symbolas meas alibi divulgare. Huic rei minime reclamo. Doleo tamen me meipsius verba primo visu omnino non recognasse atque... corrigere voluisse!

sobota, 18 czerwca 2016

De superstitione nautarum ad diem Veneris spectante

Nota est usque hodie superstitio nautarum, qui nolunt in mare proficisci die Veneris, ne dicamus die Veneris, qui 13. die cuiuslibet mensis incidat! Fontem superstitionis verisimiliter fuisse deam Nordicam Frigg, quae, sicut apud Romanos Venus, res ad amores spectantes curabat. Primi in Scandinavia (ergo per tempus quoddam quoque Britannia, quae sub dicione Danorum/Normanorum manebat) Christiani oderunt Frigg necnon diem eius.
Adest apud nautas Britannos fabula de XIX saeculi navi longa Classis Regalis (Royal Navy) nomine HMS Friday, quam thalassiarchi Angli ita nominaverunt, ut vim superstitionis omnino vanam esse classiariis monstraret. Navis in aquam deducta est (in navalibus) die Veneris. Praefectus navis factus est nauta peritus quidam nomine James Friday. In mare profecta est ea navis postremo die Veneris. Eodem die evanuit.
Certe, vestigia huius rei in documentis sunt nulla. 
Secundum librum Nici Comptonis "Cur nautae natare nesciant et similia collectanea maritima" (Why Sailors Can't Swim. And other marvellous maritime curiosities)

piątek, 17 czerwca 2016

Inopinate

Ante nonnullos annos decrevi me, ne nimis cito senex fiam, quam saepissime facturum res mihi ipsi inopinatas. Tunc ex. gr. computatro scribere "oculis clausis" didici, quod mei conaequales maxima e parte facere nesciunt; nonnulli, ut uxor mea (8 annis me minor natu), duobus digitis claves premunt.
Et, eadem regula ductus, hodie primum in vita mea (at quinquagenarius iam sum) usus sum filo dentali ad rimas inter dentes purgandas. Res minus iniucunda esse se praebuit, quam opinatus eram.
Normaliter, similibus inventionibus insanorum Americanorum non confido, hodie tamen decrevi me contra meipsius opinionem acturum. Eo magis, quia stomatologa mea dixit mihi nuper nos sine filo - dentifricio sc. cum peniculo tantum utentes - purgare solas sexaginta centesimas (60%) dentium sediminis.
Quid porro? Fortasse certamen pedifolii est mihi spectandum? Aut concentus musicae rockianae adeundus?

De exclusione electronica (2): Google cum humana facie

Nepos 85 annos natae May Ashworth invenit eam, cum per machinam quaesitoriam Google aliquid quaerebat, uti verbis "potestisne?" et "gratias vobis ago". Re cautius inspecta, invenit nepos aviam in fenestra quaesitionis scripsisse: Potestisne mihi translationem praebere numeri Romani MCMXCVIII? Gratias vobis in antecessum ago.
Putavit enim avia ad rogationes machinae Googleanae missas aliquem hominem vivum respondere. Dicunt quoque nonnulli internautae cum casus May Ashworth per rete ubique notus esset, societatem Google ad hanc aviae quaesitionem primum in sui historia manu humana respondisse. Sed quibus verbis responderint, ignoro.

Reparatio habitaculi

Reficit habitaculum vicina nostra insularis: machinae parietes terebrant, coaxationem veterem deripiunt; strepitus est horribilis. Uxor miratur me – qui domi totum diem maneo – id minime nocere.
Uxor: At cum ego mane radiophoniam ausculto, tibi id nocet!
Ego: Nam verba lectorum animam meam in sese alliciunt – nihil tunc operis facere possum.
U.: Musicam quoque mihi auscultare non licet!
E.: Licet, donec verbis non utuntur symphoniaci.
U.: Quid id significat?
E.: Musica ex. gr. classica, si deest ei cantus verbalis, mihi non nocet; ut terebratio parietum. Si autem adsunt verba, nocet.
U.: Quid de cantilenis popularibus?
E.: Immo peius. Cum "Aquilas" (Eagles) vice deciemilesima audio cantantes: Te invitamus in deversorium "California", puto eos mihi velle verbatim quasdam res nuntiare. Quasi aliquid novi in hoc deversorio modo esse factum. Puella cum candela confessa est se re vera speculatricem Civitatis Islamicae esse, Capitaneus in draconem se mutavit aut alia talia. Sed pro dolor nihil simile fit – illae (=Aquilae) de eadem re iam quadraginta annos cantant!  
U.: Tu insanus es! Cantilenas non propter nuntios auscultamus.
E.: Propter quid ergo?
U.: Beatitudinem.
E.: Aha...
U.: Non possum ergo, te praesente, cantilenas auscultare?
E.: Certe potes. Sed non omnia.
U.: Quas ergo licet mihi audire?
E.: Quae lingua mihi ignota cantantur. Finnice verbi gratia.

czwartek, 16 czerwca 2016

Certamen Europaeum pedifolii (3)

Ut nuntiant agenturae diurnariae, ad ludos pedifollis spectandos in Galliam advenerunt 40 milia Islandorum. Id est quinta pars incolarum huius insulae!
At dicunt insulanos homines acrioris mentis esse, gentibus terrestribus comparatos...

Poena tromocratiae

Agentura diurnaria Associated Press nuntiat 25-annorum Arabo-Gallum Larossi Abbala, qui ante nonnullos dies biocolytam Gallum et uxorem eius domi ipsorum necavit – filio amborum 3 annos nato id spectante – iam anno 2013 apprehensum a biocolytis et a iudicibus propter conspirationem tromocraticam [cuius rei indicia fuissent clara] damnatum esse poena horribili trium carceris annorum in probationem (i.e. suspensionem) spatio sex mensium (numquam scilicet Abbala in vincula datus est!).
Cum duos supradictos homines necavit ac puerum obsidem tenebat, Larossi Abbala a vigilibus publicis sclopetantibus occisus est. At ego puto, si talibus poenis legalibus (i.e. carcere sine carcere) Francogallia contra tromocratiam pugnatura sit, iam nunc potest sibi sepulchrum fodire.  

Plica Polonica: suicidium sensu nullo

Ante tres abhinc septimanas 31 annos natus gubernator autoplaustri TIR vehiculum suum stitit in area stativa viae stratae A4 - quae quasi Poloniam secans a Germania usque Ucrainam ducit - prope urbem Silesiacam Glivitium (vulgo Gliwice, olim, tempore Germanorum, Gleiwitz). Deinde autoplaustrarius intravit propinquum thermopolium, ubi aliquid alcoholis bibit – incertum esse, utrum velit postea porro plaustrum ducere, an usque diem posterum ibi manere, more gubernatorum TIR-ensium pernoctando in cella gubernatoria ipsius autoplaustri. Scimus quoque eum iam in autoplaustro (sed fortasse demum in area stativa?) aquam vitae bibisse, nam lagoenam semi-emptam in cella gubernatoria reliquit, una cum plaustri clavibus. Verisimiliter vir ille morbo alcoholico laborabat; utrum ebrius vehiculum regere soleret, incertum manet.
In thermopolio modice alcohili usus est – nemo operariorum animadvertit eum ebrium esse. Calamitas evenit demum, cum thermopolium reliquit. Sub-ebriatus in aream stativam – sat magnam quidem superficie – revenit atque... autoplaustrum suum invenire nequivit. Putans, fures id furatos esse, rogavit quemquam huius loci operariorum, ut appelleret biocolytas. Operarius vigilibus publicis telephonavit deinde telephonulum autoplaustrario porrexit. Hic a biocolytis rogatus dixit se in autoplaustro habuisse mercimonia valoris circiter 500 milium dolariorum, ergo putat fures quosdam id scientes autoplaustrum consulto furatos esse.
Biocolytae post non sat longum tempus in aream stativam advenerunt. Nimis tamen sero, nam interea gubernator autoplaustri miser in latrina resti se pependit et animam efflavit.

Vigiles in eadem area stativa autoplaustrum cum omnibus mercimoniis intactis statim fere invenerunt. Ut patet, vir ebrius oblitus est loci, ubi vehiculum suum reliquisset.  

środa, 15 czerwca 2016

De pedifolii certamine (2)

Amica nostra clam tesseras emit sibi maritoque sui ad drama quoddam classicum in theatro spectandum. Nam scit maritum theatromaniacum esse. Pro dolor spectaculum spectandum erat praeterito die Solis, cum Poloni primo sibi ludo in certamine Europae pedifolii lusituri erant. At est maritus amicae nostrae theatromaniacus, sed fautor pediludii est quoque.
Rem solvere ita decreverunt: in theatrum ire, nam ludus pedifolii bis in televisione datur - altera vice iis qui tempore primae emissionis televisoriis adesse non potuerunt. Ergo media in nocte spectabit maritus certamen quasi id tempore vero haberetur. Sola una diffiicultas erat prohibere, ne quis marito effectum lusus primum diceret. Ne id fieret, disiunxit maritus telephonulum. Sed frustra: ecce tempore intercapedinis dramatis spectatorum quisdam scaenam ascendit et: Volo vos scire, concives amatissimi - in microphonium ait - nostros portam Hibernorum violasse!

De exclusione electronica (seu digitali) meipsius?

Cum uxore de exclusione electronica (ut dicitur) nostrorum nonnullorum familiarium provectioris aetatis loquebamur. Tunc subito...
Uxor: Tu quoque paululum mihi exclusus videris...
Ego: Ego??? Totum diem ante computatrum dego!
U.: Sed, exempli gratia, magnetoscopio nostro vix uti scis.
E.: Ita, sed... Tot claves sunt ibi premendae! Cur non possumus habere televisorium uno cum premendi loco, ut res erant ante 30 annos? Ceterum scis me cinemata odisse. Libros legere malo.
U.: Neque applicationes ullas in sophophonum tuum ex interreti importas...
E.: Sed cui usui mihi hae applicationes? Ceterum, cui usui mihi sophophonum ipsum? Nemo mihi telephonat...
U.: Sophophonum plus quam telephonulum est, computatrum parvum...
E.: Sed ego per totum diem ante magnum computatrum sedeo.
U.: Nescis, verbi gratia, telephonulo utens confirmare tesseras aerias (Anglice check-in). Quod in itineribus impedimenti haud parvi est.
E.: Ita, sed... scis me tantopere itinerari timere: morbos extraneos, furta, tabernarios dolosos, taxiraedarios philargyros... Ut verum dicam, non opinor electronicam exclusionem me in qualibet re impedientem!

De certaminis pedifolii ignorantibus

Certamen pedifolli Europaeum in urbibus Galiae nunc fit. Cives Europaei orgasmo pedifillico laborant. Non omnes tamen.
Ante tres dies Poloni primo sibi ludo in certamine ludebant. Viae Varsoviae vanae tunc manebant - omnes boni homines ante televisoria sedebant. Ego televisorium non habens e singulo boatu vicinorum scivi nostros portam hostium semel violasse. At, cum ululatum lugubrem audivi nullum, scivi quoque nostros verisimiliter effectu 1:0 vicisse. Nescivi tamen quem superaverimus. 
Uxor mea - quae lusum pedifolii plus minusve ita ut ego colit, i.e. omnino non colit - eo tempore apud matrem suam cenae familiari, ut mos iis est una cenare uno quoque Solis die, aderat. Ubi omnes convivae - praeter ipsam atque ipsius matrem - televisorium cautissime spectabant. 
Postea, eodem sc. die vespero, nos ambo - uxor et ego - de die modo praeterito locuti sumus. Certe etiam de ludo pedifolii.
Ego: Spectastine ludum?
Uxor: Spectabam aliios spectantes. 
E.: Scisne contra quem pugraremus?
U.: Nescio. Puto contra Gallos.
E.: Cur?
U.: Nam certamen in quadam urbe Gallica habitum est. 
Sed postea - cum ei explanassem omnes certaminis lusus in Gallia haberi - uxor mea, sapientiae sine dubio plus quam ego plena, addidit se nunc opinari Polonos contra Hibernos pugnasse. Cur? Nam virides camisias habebantur, dum nostri albo-rubras. 
Recte coniectavit: contra Hibernos Septentrionales (Ulster) pugnavimus.   

wtorek, 14 czerwca 2016

Deum timere...

Percontatio Pinchae Goldschmidt, rabbini principalis Moscoviae, a diurnariis Austriacorum actorum hebdomadalium "Profil" peracta:
Profil: Quem Iudaei debent timere magis: fautores ultradextrarum partium Europae an islamistas?
Goldschmidt: Iudaei Deum timere debent.
P.: Et quid Deus de hac re?
G.: Ipsum rogate.
P.: Sed tu propius Eum sedes...
G.: Liber Torae docet: Tene verbum Dei, amorem exerce, sis coram Deo tuo humilis.

Plica Polonica: Iudaei isti bellicosi

Vicinus, vir magnae staturae, plus minusve 60 annos natus, sonora voce - quam facile parietem transgredientem excipio - docet uxorem familiaresque alterum bellum mundanum a Iudaeis instigatum esse. Nam, dicit, Hitlerianos ad arma sibi emenda fabricandave primum usos esse pecunia iis credita a quodam argentario Iudaeae originis. Dixit nomen, quod tamen non bene audivi (fortasse debeo fores vicini pulsare rogareque nomen Iudaei philargyri?).
Mecum hanc rem in balneo (barbam radens) volvo ac meipsum rogo utrum mundus hodie aliter videatur, si iste argentarius non Iudaeus sed ex. gr. Esquimensis fuisset.

Cogitatio diei Martis apta

In vita nostra interdum advenimus in punctum, ubi cum quibusdam rebus nihil facere possumus, etiam si vires maxime exerceamus (ut ego et uxor nunc cum habitaculo nostro in maius mutando; omnia enim in manibus aut magistratuum aut Fati manent, licet pecunia ad hanc rem perficiendam nobis adsit).
Rebus ita stantibus, possumus aut eiulare: O, me miserum! Nihil facere possum...
aut gratias Diis agere, dicens: Quam felicem me puto nihil facere debentem.
(Uxori tamen talis cogitatio non placet.)
Tempore Romanorum si liber vixissem, maxime verisimiliter voluissem me servum fieri. Nam malo alios pro me consilia capere (ego enim saepissime consilia aliis peiora capio). Pro dolor, nunc desunt tales homines in conspectu (praeter, interdum, uxorem).

poniedziałek, 13 czerwca 2016

Plica Polonica: Orlando

Caede Orlandensi multi mei concives sine dubio gaudent. Nam sint cinaedi tribadesve eorum sententia depravata gens extirpatione digna. Non dicunt id publice - prater nonnullos audacissimos - sed dicunt alibi: domi, inter amicos, in tabernis potoriis. Dicunt sat saepe.
Sed hoc in casu iis difficultas: patrator, qui, sicut Archangelus gladio, sclopetando progeniem Sodomae delevit, ipsius animam eodem facto efflans, ipse... Musulmanus est, Civitatis Islamicae fautor. Num Musulmanus esse potest martyr piorum Christianorum? Ecce aenigma "veris Polonis" solvendum.

niedziela, 12 czerwca 2016

De circumcisione aliter sive... aut Zuban, aut praeputium

Scimus circumcisionem - id est desecationem praeputii apud infantes, qui mos stupidus semper valebat apud gentes Semiticas necnon, propter hysteriam Christianorum-puritanorum, ducibus fratribus Kellogg, usque hodie valet apud US-Americanos - tempore alterius belli mundani causam interdum fuisse mortis virorum puerorumque Iudaeorum, qui simulare conabantur se non Iudaeos, sed Christianos esse.
Nonnullis annis ante id bellum circumcisio tamen vitam alicuius viri servavit, collega autem eius non circumcisus morti datus est. Agitur de patre scriptoris fabularum Bohemici Otta Pavel (re vera Popper nomen gentilicium ei erat), qui, ut Iudaeus, nono die vitae rite praeputio privatus est. Ut adulescentulus autem Leo Popper conatus est vitam modo Milesiaco agere, ergo sua sponte miles factus est famosae Legionis Extraneae, quae gubernationem Gallorum in terris Africanis cruente sustentabat. Difficultatibus nihilominus vitae militariae cito fessus, Leo una cum collega e Iugoslavia oriundo e castris fugerunt. Deinde per terram feram vadentes a gente qudam Arabica [Pavel dicit Arabica, sed fieri potest, ut de Berberis aut alia gente nomadica potius ageretur] capti, a duce huius gentis iussi sunt bracas deponere. Tunc Iudoslavus-Christianus statim iugulatus est, Leoni autem parcitum esse. Videlicet nomades putaverunt eum Musulmanum esse. Leo ipse autem valde itinere fessus febrique aegrotans simulabat se vocem ore emittere non posse, ne loquendo invenirent raptores eum minime asseclam Mahometi esse.
Sed fortasse fabula haec magis mythus est (ut saepe sunt similes fabulae "heroicae" a patribus filiis dictae) quam veritas. Nam, in narratione Leonis Popper collegae sui misero nomen fuisse Zuban. At Zuban esse in Bosnia/Iugoslavia nomen solum apud Musulmanos ahibitum. Si ergo fuisset Zuban, non habuisset (verisimiliter) praeputium.
      

Caffea (sero)matutina

Secundum indagationem opinionum organisationis Linking Environment and Farming (LEAF), omnis tertius iuvenis Britannus nescit lardum esse productum suillum, lac quod saepius bibitur -  bovinum, ova - gallinacea.
xxx xxx
Hobbitos re vera adfuisse! Novis ossibus repertis patet Hominem floresiensem (nominatur ab insula Indonesiana Flores, ubi primum ossa eius reperta sunt) fuisse genus proprium nanorum hominidarum. Adhuc enim nonnulli putabant "Floresienses" re vera fuisse nonnullos Homines sapientes parvae propter morbum quendam staturae.
xxx xxx
Studiosi Australianae Catholicae Univesitatis Studiorum investigationibus a se multis peractis in opinionem pervenerunt homines nimis autoraeda utentes saepius quam alii laborare morbis cardiacis, saepiusque obesos fieri. [Commentarium Iconoclastae: At dicunt motum sanitati prodesse???]   

Nuntii Iconoclastae ad praeteritam septimanam spectantes

Secundum novissimam demoscopiam ephemeridis "The Independent", fautores Brexitus decem centesimis partibus crebriores esse quam volentes Britanniam in Unione Europaea mansuram (illi enim 55% indagatorum constituunt, hi 45%). Alia autem eodem tempore divulgata demoscopia (actorum hebdomadalium "Observer") monstrat fautores Unionis inter cives Britannos plures (44%) esse quam osores (42%).

Praestantia tantum 40 milium suffragiorum superavit candidatus factionis liberalis Pedro Pablo Kuczynski filiam pristini praesidis Peruviae Keiko Fujimori in electione praesidiali.

Carissima a mense Octobri praeteriti anni sunt pretia petrolei, quae hodie plus quam 2% creverunt. Petroleum generis "Brent" e fundo Maris Septentrionalis exhaustum venum it 52,70 USD per dolium.

Post ictum terroristicum Vernicolli (Tel Aviv) in foro holitorio patratum, quo quattuor homines mortui sunt, magistratus Israeliani prohibuerunt civibus Autonomiae Palaestinae Israeliam intrare spatio mensis ramadan.

Tenilusori Russae Mariae Szarapova duos proximos annos non licebit certaminibus teniludii adesse propter usum ab ea substantiae stimulatoriae nomine meldonium.

Saltem 11 homines (inter quos 7 biocolytae) mortui sunt, 36 autem sauciati, ob tromocraticam displosionem pyroboli in veteri parte Constantinopolis.

Coloniae Agrippinae fures furati sunt reliquia sacra Iohannis Pauli II, i.e. pannum gutta sanguinis sancti papae madidum. Qui pannus in capsula positus tenebatur ab anno 2013 adfixus uni parietum ecclesiae cathedralis.

Morbo Parkinsoniano mortuus est 74 annorum Muhammad Ali, clarissimus pugil temporis nostri. 

piątek, 10 czerwca 2016

De alio libro inopinate inscripto

In urbe Rumanica* Oradea (ceterum aedibus styli secessionis plena) vidi in vitrea bibliopolae (libros veteres vendentis) librum inscriptum (Rumanice): De origine linguae Latinae e lingua Dacoromanica. Hunc emi volui, sed dies Solis erat, taberna clausa, at postero die mane proficiscendum mihi erat.
Sed postea collegam Rumanicum de hac re rogavi. Adesse, explanavit, studiosis huius terrae hypothesin populos Indoeuropaeos, cum Europam Meridionalem ex Oriente venientes petebant, magnum amnem Danubium** tranare potuisse facilius in delta eius, in hodierna scilicet Rumania. Ibi primum populus deinde Latinus sedem habuerat, ibi linguam suam evolverat, quae in ripa Danubiana in forma proxima originali usque hodie mansit. Pars autem populi porro iter perrexit, in Italiam migrantes, ubi iam lingua pristina (=Rumanica) aliquantulum degenerata utebantur, qui sermo factus est Latinus. Tantae molis erat Romanam (ex Rumana) condere gentem. Mementote ergo Galli, Hispani Italive, unde origo vestra! Secundum saltem nonnullos philologos Rumanos.
* ego Rumania/Ruman(ic)us dico; ipsi Rumani saepius Dacoromania; Hungari autem - qui Rumanos propter Transilvaniam a se captam detestant - de Vlachoromanis dicunt, eodem modo quasi minus nobilem originem (Vlachicam, non Dacicam) iis tribuentes
** qui ceterum hic, in inferiori cursu, potius Graeco nomine Ister etiam a Romanis nuncupabatur

De masturbatione (porro)

Ante plus quam viginti abhinc annos Berolinae in quadam taberna libraria vidi librum intitulatum plus minusve: Onanismus ut via sui cognitionis veterum Aegyptiorum, auctoris nominis certe non memini. Librum non emi (etiam propter malam scientiam linguae Theodiscae), qua re hodie doleo.
At interreti inveni quid simile, feminis imprimis artis praecepta destinata:
http://omooni.com/blog/masturbation-a-sexual-spiritual-journey-with-your-self/

czwartek, 9 czerwca 2016

De conscientia apud Hellinger (porro)

Denuo scripta Berti Hellinger legens, cogito multum de notione ab eo adhibita 'conscientiae' (cuius permagnam significationem, ut in percontatione diurnaria fatetur, primum non suspicatus est). Conscientia enim  dicit nobis, quod recte (i.e. secundum normas "familiae" sive "gentis"), quod autem non recte facimus.
Memini muneris mei, quo pro Museo Holocausti Vasintoniensi spatio octo annorum (1998-2006) fungebar, quaerendo in Polonia testes oculatos minorum episodum holocausti. Memini saltem ter aut quater (aut fortasse quinquies) narratum mihi esse a testibus Polonis, Germanos, cum sclopetando necaturi essent multos homines (=Iudaeos), semper primum se in statum maximae ebriositatis induxisse. Ut vocem conscientiae non audirent.

"Scholia" in Patricium Owens

Institutum Brooklyniense Paideia praebet in situ suo Facebookiano acroases clarorum Latinistarum, in numero quorum etiam "De verborum delectu" professoris Patrick Owens (e Collegio Catholica Wyomingiana):
https://www.facebook.com/the.paideia.institute/videos/1073173779416688/
Acroasi modo a me audita, duas habeo adnotatiunculas:
1. Non necesse est in Hungariam iter facere ut linguam inveniamus, ubi 'universitas (studiorum)' aliis semanticis partibus reddatur (sicut Hungarice egyetem); Neograeci enim habent panepistimio.
2. 'Plantam' (sensu fruticis, arboris, graminis etc.) adesse iam antiquis - in dictionario Lewis&Short nonnulla exempla - sed non sensu generali omnium "animantium immobilium". Fortasse deerat Romanis necessitas talem (generalem) categoriam haberi/videri (ut deerat iis ex. gr. notio mystacium, nam, puto, nemo vir solos mystaces, i.e. sine barba, eo tempore tenebat; si necesse esset hanc barbae partem separatim nominare, fortasse dicerent Romani periphrastice 'barba labri superioris' [hodiernae Latinae certe mystaces adesse, mea quidem sententia, debent; 'barba labri superioris' nimis longum est pro re tam in vita hodierna communi]).

In saltu uno duos capros capere...

Aut, ut frater meus dicere solebat, cum duabus mulieribus una nocte dormire (sc. cum una post alteram, ne utraque de altera sciret).
Quod... modo mihi accidit: proxime praeterita enim nocte, in deversorio urbis Siedlce (in Poloniae parte orientali), primum cum una muliere Venerem colui in conclavi numero 41, deinde cum altera uno tabulato supra, in conclavi 167.
Certe, in somnio tantum nocturno haec omnia acciderunt - Siedlcis non aderam iam per multos annos.
Mane experrectus diu de numeris conclavium cogitavi. Numerus 41 scriptus fuit in ianua duobus stylis coloribusque cretae (rubro et albo), quasi separatim: 4...1 sive 4 +1. Quod ad uxorem meam fortasse spectat, nam possidemus in domo nostra dua habitacula, numeris 1 et 4.
167 tamen esse numerum laophorii (=autoraeda publica) Varsoviensis, quo - inter alia laophora, aliis numeris signata - interdum ad matrem vehor. Ducit postea laophorum 167 in ecclesiam suburbanam, eo loco positam, ubi, ut creditur, BVM pueris in arbore cerasi apparebat spatio annorum 1943-48.
Erat quoque in hoc deversorio concentus musicus uxoris meae. Quae uxor in vita diurna nullo instrumento canit. (Interdum in balneo nostro, lavacro pluvio utens, cantat.)
Potavi quoque ibi maxime, quod in mundo reali mihi non licet.    

środa, 8 czerwca 2016

Fabula Hellingeriana

Medicus quidam cum Morte pactum contraxit: pro anima sua Morti promissa obtinuit facultatem videndi, utrum quisque sui aegrotorum sanus fieret, an moriturus esset. Nam si ad sanitatem patiens destinatus erat, Mors (a medico tantum visa) stare solebat prope aegroti caput, si ad mortem - in pedibus.
Uno die medicus venit curatum puellam perpulchram. Videns autem Mortem ad pedes eius stantem subitoque amore puellae raptus cito lectum cum puella circumvolvit, ita ut Mors nunc ad caput puellae spectabat.
Puella re vera convaluit. Medicus tamen mortuus est.  

Caffea matutina: computatra odoraria

Non satis esse computatris oculos nostros atque aures fatigare, non satis quoque digitorum tactum ad suos fructus (impressione tri-dimensionali productos) allicere - tempus est, ut nasus petatur!
Ecce negotiatio US-Americana Vapor Communications nuntiat se mox venum daturam applicationem computatris sophophonisque, qua, more solito computatro utenstes (ex. gr. symbolas ephemerideas legendo), poterimus simul pervariam fragrantiam naribus sentire, ut odor menthae, citroni, mali Persici, sed quoque fragrantia puri aeris montium aut orae maritimae. Odores iis apti modi musici sequentur (si tantum id usor velet).
Pretium applicationis - 150 dolaria (USD).
[Commentarium:] Proximus, puto, consequens in evolutione motus erit odores (ut iam interdum est casus sonorum) in computatris automatice ad scripta etc. ab usore lecta adcribi: si ex. gr. de silva symbolam legimus, fragrantiam arborum, fruticum, graminis cum baccis fungisque sentiemus (una cum sonitu ventorum sive ululatu noctuae). Tunc loco itineris silvestris malemus ante computatrum sedentes domi manere et hinc, tuti, "itinera" nostra facere. Animalia in silvis hac re - paucitate visitantium - valde gaudebunt. Ita prodebit technologia homini bestiisque.  
[Commentarium 2:] Iam diu de simili re, ni fallor, industria cinematographica somniabat: ut scilicet cinematographeum, tempore pelliculae spectatoribus monstratae, plenum odoribus, singulis scaenis aptatis, fieret.

wtorek, 7 czerwca 2016

Pueri sempiterni

De matre filii mei (minoris) modo cogitabam necnon de aliis mihi notis hominibus, qui faciunt omnia, ne aliquid laboris in vita sua faciant, i.e. auxiliis aliorum vivunt. Quorum nonnulli quidem sat bene vivunt - spero saltem eos in tumulo frigore ac madore laboraturos.
In mentem tunc venit memoria veteris Bohemi professoris biologiae (nominis pro dolor oblitus sum), cuius acroasim ante plus minusve 12 abhinc annos per radiophoniam Bohemicam auscultavi, cum linguae Czechicae studebam. Dixit de similibus hominum moribus apud animalia cultis. Ecce, aiebat professor, apud Corvidas aves interdum evenit, ut pulli, cum inspiciant parentes nimis de se curare, incipiant amore parentum per tempus longissimum abuti, sibi scilicet escam ab iis petentes usque ad (sui) aetatem sat provectam (at scimus Corvidas longissime vivere, corvos e.gr. spatio 40 et plus annorum*). Interdum fit, ut ipsi iam liberos habentes, porro ad eos alendos escam a sui matribus patribusque poscant - avi ergo nepotes alunt, parentibus nolentibus!
Quam humanum vero esse mundum bestiarum!
* fabulae plebis dicunt de corvis etiam 120 annos natis, sed... fabulae sunt (multi tamen e.gr. venatores, ergo quasi rerum silvestrium periti, iis credunt); notus erat corvus in Turri Londinensi nidificans, qui aetatem attigit 44 annorum  

Caffea matutina: ecclesiam statim petas!

Professor artium medicinalium Tyler VanderWeele Universitatis Harvardensis anno 1996 coepit investigare condicionem sanitatis Americanarum nosocomarum. Omnino 74.534 nosocomas variae aetatis perscrutatus est, quarum 13 milia pro dolor ante finem investigationis mortuae sunt; mortuae tamen fortasse ad bonum investigationis eventum. Effectus enim investigandi monstrare videntur... credere in Deum (Latinius fortasse: credere Deum adesse) vitam nostram longiorem reddere!
Inter nosocomas a prof. VanderWeele investigatas, apud has, quae ecclesiam (aut catholicam, aut protestanticam) semel aut  pluries per septimanam intrabant, morbi lethales cardiaci eveniebant 27%, carcinomata autem 21% RARIVS quam apud alias nosocomas, sive atheas, sive agnosticas, quae sc. sacris religiosis in ecclesia habitis deessent.
Effectus investigationis VanderWeelianae congruere videntur thesi neurologi US-Americani Andrew Newberg, qui studiis suis 16 annorum nitens asseverat preces dicere corroborare cerebrum.
- Personae spirituales minus quam non-spirituales timent mortem neque tantopere dubitant significationem vitae adesse - ait Newberg.

poniedziałek, 6 czerwca 2016

De 'anima familiae' Hellingeriana

Mentionem feci 'animae familiae', de qua Bert Hellinger tantopere loquitur. Aut potius locutus est, nam ipse nunc alio nomine utitur: wissendes Feld, ergo quasi '(omni)sciens spatium'. Mihi vetus nomen magis placet, praeter fortasse quod Latine difficile redditur propter aliam significationem verbi 'familia' apud Romanos et apud nos; apud illos enim primum servos 'familia' significabat, deinde demum omnes - et liberos, et servos - qui sub dicione domini manebant.
Non erat certe familia Romana eadem ut est hodie nostra (mater, pater, soror, avus, frater etc.), largior et numero, et sensu oeconomico (familia ut societas/negotiatio patris familias).
Sed 'anima familiae' Hellingeriana quoque non solum ad familiam sensu stricto pertinet, sed etiam ad familiae peripheria: homines, qui per crimen nobis iuncti sint (sive criminis victimae, sive patratores, ut ex. gr. stuprator, qui 'familiam' puellae a se stupratae ipso facto intrat), animae infantium abortivorum etc.
Rebus ita stantibus fieri potest, ut aliquis homo sub dicione nonnullarum 'familiae animarum' maneat, sicut et multi nostrum in vita reali, qui in familiis ut ita dicam mixticiis (Anglice, ni fallor, patchwork families) degunt. In talibus largioribus familiis saepe primo visu deesse hierarchiam (patrem matremve totius familiae), neque eius fines clare definiri possint. Mirum tamen in modum canis tali familiae ad cum iis una vivendum introductus statim dominum sui principalem cognoscit. Fieri ita potest, ut in 'spatio psychico' - quod canes magis nobis sentiunt - condicio familiae melius se habeat quam in vita reali.
Aut fortasse plura et Hellinger et ego videmus, quam re vera adsunt.  

niedziela, 5 czerwca 2016

De confessione negativa Aegyptiorum (porro)

Alterum in indice - praeter 'masturbationem in ecclesia' - peccatum iucunde sonans esse: Numquam cor meum degluttivi. Significans: Numquam contra conscientiam (meam) luctatus sum.
Cor hieroglypho monstratur ollam/caccabum depingente. Nam est cor quasi vas, ubi omnium bonorum et malorum ab homine factorum notationes tenentur (sicut informationes, quae in capsa nigra aeronavis servantur).
Ceterum de verbo 'conscientia' paululum meditatus sum. Douglas Harper putat id esse translationem nominis Graeci syneidesis. Ambo cum+scientiam significant, ergo quasi 'scientiam communem (quod malum sit, quod bonum)', mea saltem interpretatione (notio similis omniscienti 'animae familiae' [Hellingerianae]).
Harper recte monstrat Russos quoque habere pro conscientia verbum so-vest, quod item significat (cum+scientia). Sed Poloni aliter! Nostrum sumienie vetere Slavico sensu significabat 'dubitationem'. Conscientia ita apud nos etymologice esse quasi vocem in homine (daimonion), quae dubitat eum verum dicere, cum dicit: Haec et illa bene feci..., nam scit vox hominem re vera id male fecisse.  
Conscientia ergo apud Graecos, Romanos (etiam Anglos, Gallos etc.) necnon Russos notio ethice neutralis est, apud Polonos autem negativa = suspicatur nos mentiri.
Rebus ita stantibus, quomodo sani esse possumus?

Pauca de superstitionibus nostratum

In percontatione diurnaria doctoris Lucae Mauritii Stanaszek, anthropologiae & archaeologiae periti, multa legi de superstitionibus paganae originis, quibus vita nostra plena sit, ut omnes (aut fere omnes) dies festi ecclesiae catholicae, praesertim in terris Slavicis. Sed quoque in moribus nostris cotidianis etc. pagana fides servatur, licet non sempera eam recte "legere" sciamus.
Mentionem dr Stanaszek facit morum ad exsequias spectantium: quod humi pugnus a quoque luctatore super arcam funebrem in sepulchro depositam proici debet; quod domi modo mortui specula pannis velantur; quod cadaver domo effertur semper pedibus in fronte, capite pone... Adderem huic indici mos domi matris mei, ac multis domibus rusticis usque fortasse hodie servatus, id est ad lectum mortui candelam ardentem specialem ponere, quae candela die Purificationis Beatae Virginis Mariae (2 Feb.) in ecclesia consecrari debet. Tunc enim (2 Feb.) re vera festum Fulminis celabramus - apus Polonos dies hic nuncupatur festum Matris Dei Fulminosae (Matki Bożej Gromnicznej, nemo praeter sacerdotes de Purificatione BVM etc. loquitur, ipsa candela dicitur 'fulminea', vulgo gromnica). Ceterum putabatur candela illa fulminea fulmina a domo depellere; domi pueritiae matris mei semper tempore procellae in fenestra gromnica ardebat (nescio, utrum habuerint quoque alexikeraunon sive apogogum fulminis [Franklinianum]). Scio quoque matrem et hodie Varsoviae in sui habitaculo talem candelam in armario conditam tenere. 
    

sobota, 4 czerwca 2016

De Trinitate Aegyptiorum (porro)

In hypothesi Trinitatem Christianorum originem in religione Aegyptia habuisse (Atum/Ra ut Deus Pater, Pharao ut Filius, Maat ut Spiritus Sanctus) certe minimam vim persuasionis habere videtur Pharao Iesu comparatus. Re tamen a me aliquantulum comminus investigata, invenio ambos... sibi invicem similes esse. Quisque enim rex Aegyptiorum, dum vivus esset, putabatur incarnationem dei Hori, filium dei Osiridis necnon deae Hathor/Isidae [huius postea similitudines ad Mariam, matrem Iesu, permultae sunt, sicut et ipsa imago matris puerulum in sinu tenentem]; fuit ita Horus (necnon eius nomine quisque pharao) Filius Dei.
Sed - negabit quispiam - cur non erat potius Horus/pharao filius Atum/Ra, id est Creatoris Mundi - tunc enim symmetria cum Iesu esset plena? At - respondebo - fuit Osiris quasi complementum nocturnum Ra. Nonne Ra ipse cotidie per dimidiam diei partem (i.e. noctem) mutatur in Osiridem - Solem Alterius Mundi, qui navi solari per alteram, nobis viventibus invisam, partem mundi noctu vehitur?
Omnis dies habet suum complementum in nocte, omnis vita in morte.
[Ita saltem in syncretica forma religionis Aegyptiorum, nam fieri potest, ut in initiis et Atum, et Ra, et Osiris tres locales dei principales fuissent, in tribus regionibus separatim regnantes, nihil communis secum habentes; de his rebus tamen, propter nulla testimonia in scriptis, nihil fere iudicare possumus.]
<Fortasse interdum erro in his meditationibus, nam tiro sum studiorum Aegyptiorum. Vix possum tamen me cohibere, quin de talibus rebus lectoribus narrem.>

piątek, 3 czerwca 2016

De aliis rebus immundis... (2)

Videlicet iam veteribus id phaenomenon notum erat. Scribit enim Quintilianus in Institutione Oratoria (3, 6, 41): Pars qualitatis quae est de summo genere raro in iudicium venit, quale est "idne sit honestum quod vulgo laudatur". succedentium autem aliae de communi appellatione, ut "sitne sacrilegus qui pecuniam privatam ex templo furatus est", aut de re denominata, ubi et factum esse certum est nec dubitatur quid sit quod factum est. cui subiacent omnes de honestis iustis utilibus quaestiones.

De aliis rebus immundis clam in ecclesia factis

T., amicus meus, ceterum vir magno animo moribusque bonis praeditus, ut puer adulescens per vicos Macedoniae iter longius pedestre, pera dorsuali oneratus, faciebat, "diem perditum" (=sensum rerum praeteritarum) quaerens ac dormiens saepe sub Iove. Non multum pecuniae, ut mos est iuvenum, secum portabat - ceterum, Polonia tunc communistica non multam pecuniam incolis praebebat - ergo uno die fere sine nummis collega meus media in Macedonia mansit. Tunc, ecclesiam quandam  vicanam, semper fere horis diurnis apertam, intravit, ut pro salute ad Deum preces diceret (atheus est T., sed rebus in arduis etiam athei interdum precantur, ego ex. gr.). Solus ita in templo, genubus ante iconostasion flectis, aliqua verba murmurabat, cum obiter conspexit in quodam templi angulo adesse mensam cum lance... pecuniae sat plena. Piis rusticis enim mos erat nummos - saepius asses parvos, sed quoque interdum nummos chartaceos - ibi ad usum sacerdotis parochialis relinquere. Nemo hos nummos custodiebat, nam nemo mente sibi depingeret hominem tam depravatum esse posse, ut sacrilegium simile faceret. Sed amicus meus, iam fame fere laborans, nolens volens aliquam partem huius pecuniae furatus est.
Deum puto iam ei veniam dedisse, nam aliter homo bonus T. est.  

środa, 1 czerwca 2016

Nuntii Iconoclastae praeteritae septimanae (plus minusve)

Indagatio opinionum peracta a diurnariis ABC News/Washington Post monstrat 46% civium USA faventes republicano Donald Trump ut futuro praesidi civitatis; 44% malunt democratarum canidatam Hilariam Clinton. Adhuc omnia demoscopia monstrabant superioritatem Clinton.

Ex indagatione telephonica a diurnariis ephemeridis "The Guardian" peracta patet 45% Britannorum velle sui terram Unionem Europaeam relinquere, dum manere in UE cupere 42%; 13% nesciunt, quid velint.

In incendio gerontocomii ad Kieviam 17 senes vitam amiserunt.

Secundum nuntios UNHCR, in tribus naufragiis modo factis inter Libyam et Italiam meridionalem usque 700 migratores illegales oras Europaeas petentes vitam amiserunt. Sospites in portus adducti sunt Taranto et Pozzallo.


Haybatullah Ahunjadeh nominatus est novus dux talibanorum Afganistaniae, qui locum tenebit modo necati aeroplanis automaticis US-Americanorum Akhtar Mohammed Mansur. Ahunjadeh osor est consiliis cum regimine Cabulensi negotiandi.

Primum in hoc anno pretium petrolei Brent superavit limen 50$ per dolium.

Monsanto, US-Americana gigantea negotiatio biotechnologica, reiecit oblationem aemulatricis Germanae Bayer se ab ea emptum iri 62 milliardis dolariorum.

Ob paucitatem sacchari suspensa est fabricatio Coca-Colae in Venetiola. Porro Venetiolanis praebetur Coca-Cola Light.

Incursu aeroplanorum automaticorum (Anglice dron) necatum verisimiliter esse ducem talibanorum Afganistaniae Akhtar Mohammed Mansur – nuntiavit locutor Pentagonii.

De masturbatione in ecclesia (2) et similibus rebus

Cur autem mos aderat viris Aegyptiis immo in ecclesia membrum suum turbare? Apud nos enim id phaenomenon putamus rarissimum ac peccatores gravissimi ut amicus meus Florentinae campanillae visendi cupidus non ubique inveniuntur. In Aegypto autem aliter, quod index peccatuum "confessionis negativae" monstrare videatur.
Causae possunt esse hic nonnullae:
1. Subita vis libidinis (ut in casu amici mei peregrinatoris iuvenis per regiones Italorum).
2. Nulla occasio domi solum esse: uxor, liberi, familia etc.
3. Fortasse templa in Aegypto aperta per totum diem remanebant precari cupientibus (ut hodie saepe in vicis Serbicis, interdum etiam in Polonia).
4. Templum locus fuit amoenus protectionem contra Solem praebens.
5. Fortasse in parietibus ecclesiarum imagines Venerem excitantes aderant, ut ex. gr. filiae dei Ra (Hathor?) se ante oculos patris denudantem, cum hic valde fessus noluisset porro navem cum Sole per caelum munere sui diurno trahere (intuens autem corpus iuvenis filiae, vires ad laborem pergendum statim recuperavit*).
* thema amoris filiae cum patre valde me delectat; Deo gratia, solos filios habeo
xxx
Nihil, ut puto, scimus de mulieribus Aegyptiacis in ecclesiis (aut alibi) masturbantibus. Ipsatio feminarum usque hodie secretum esse secretorum.
xxx
Ego, cum munus sat psychice difficile (ad neurastheniam pronum) mihi aderat in agentura Reuteriana Varsoviae, solebam vicinam ecclesiam sancti Andreae - quae nonnullis horis diurnis aperta manebat - intrare, ubi, si solus essem, temetum (vodka) de lagoena bibebam; si solus non essem, non bibi. Sed postea, in asylo alcoholicorum, conveni virum, qui eodem more (= in ecclesia bibendi) utebatur etiam in conspectu aliorum (piorum preces dicentium).
- Quomodo id fecisti? - rogavi virum audacissimum.
- In confessionale me primum contuleram, deinde bibi ad libitum.
- Quid??? In confessionali bibisti?
- Ita. Sacerdos sum.

Caffea matutina

Negotiatio US-Americana Bell-Phillip Television, quae producit seriem televisificam "Audaces & Pulchri" (The Bold and the Beautiful), in periculo est: in ius eos vocant fabricatores Itali casei Grana Padano. Quid culpae Americanis? Ecce in una ultimarum seriei partium Charlie Webber, unus agonistarum, dixit: Deus meus! Emi Grana Padano loco Parmigiano Reggiano!, valde hac re dolens. Fabricatores autem Padani non putant caseum suum peius gustare quam caseum vicinae Regiae Aemiliae, ubique in orbe terrarum notum nomine (casei) Parmesani.
"Audaces & Pulchri" esse seriem televisificam (melodrama saponarium) valde plebi gratam; specta(ba)tur ab anno 1987 in paene centenis terris mundi.