piątek, 31 lipca 2015

Credat, qui credere vult - morbi percrebrescunt!

Occasione festi sanctae Annae (26 die m. Iulii in ecclesia catholica) convenimus una domi Annae minime sanctae, uxoris Adalberti, qui munere decurionis in navi fungebatur tempore primi mei itineris marini (Aprili/Maio 2013, iuxta litus prope Massiliam), viri valde iocosi, sicut et ipsa est Anna uxor eius (optime quoque ambo coquuntur!).
Rem valde miram dixit mihi Anna, rumorum collectrix. Nempe, morbos "manuum sordidarum" - ut sunt dysenteria, enterobiosis, giardiosis, icterus (generis A), toxocariosis aut taeniasis - denuo crebriores fieri in orbe occidentali (etiam in nostra Polonia) propter... usum machinarum elutoriarum. Nam antea, cum manibus catillos, pocula etc. lavare soleremus, nolentes volentes saepius et manus ipsas aqua saponeque elutorio lavabamus. Hodie autem, machina id faciente, rarius manus aquae imponamus.

niedziela, 26 lipca 2015

De Bulgaris programmata linguā Bosniacā audientibus

Munere fungens "fixeris" (id est auxiliatoris) diurnariorum stationis televisificae Al Jazeera Balkans collocutus sum cum Harun (diuirnario Saraieviensi) de huius stationis spectatoribus. Dicit Harun hos adesse, praeter cives musulmanicae fidei Bosniae & Herzegovinae, incolas aliarum rerum publicarum pristinae Iugoslaviae – etiam Albanos Kosovienses – necnon Bulgaros, licet hi (aliter quam Kosovienses) numquam in terra a Serbis dominata vixerint, ergo – rogo – unde iis scientia linguae, quā programmata emittuntur? Respondet Harun eos propter similitudinem linguarum (inter scilicet Serbicam/Croaticam/Bosniacam/Montenegrinam et Bulgaricam) programmata stationis Al Jazeera Balkans intellegere. Ceterum, dicit, mirum esse "illos (=Bulgaros) plus nos (Bosniacos, Serbos etc.) intellegere quam nos eorum linguam".
Simile phaenomenon (inaequalis communicationis duarum nationum) iam observavi inter Bohemos/Slovacos, Russos/Ucrainos ac Suetes/Norvegos. Id est, Bohemos/Russos/Suetos difficilius intellegere sermonem Slovacorum/Ucrainorum/Norvegorum, quam isti (Slovaci/Ucraini/Norvegi) linguam Russorum/Bohemorum/Suetorum. Mea sententia de "pigritudine culturali" hic agitur. Nempe, nationes "maioris momenti" (re politica, oeconomica aut culturali) minus aptas esse ad intellegendum linguas sui vicinorum "minoris momenti", licet hi saepe sat bene intellegant, etiam sine ulla scientia scholari, linguam "magis cultu imbutorum" vicinorum.

Sed hoc in casu? Num Bulgari vero "rusticiores" Serborum se putent? Fortasse phaenomenon tempore communismi evenerit, cum quasi-communistica Iugoslavia terra multo proximior Occidenti fuit quam aliae civitates communisticae (ut Bulgaria aut Polonia) sub iugo Moscoviae manentes; illis (=civibus Iugoslaviae) licuit verbi gratia in Occidentem itinera ad libitum facere, nobis non vero. 

wtorek, 21 lipca 2015

nuntii Iconoclastae plus minusve praeteritae septimanae

Saltem 31 homines necati sunt ictu tromocratico in participantes conferentiae diurnariae, ad res Syriacas spectantis. Biocolytae putant pyrobolum displosum esse a muliere-suicida 18 annorum, quae pro Civitate Islamica militaverat.

Effractores interretiales furati sunt nomina usitatorum necnon, ut asseverant, epistulas ab iis missas in situ amatoria AshleyMadison.com. Secundum acta "The Independent", effractores minantur: aut situs deleatur, aut "imaginationes sexuales" 40 milionum hominum palam monstrentur.

Summa 9 miliardorum dolariorum negotiatio Lockheed Martin, quae arma (imprimis aeroplana militaria) fabricatur, emit apud societatem aemulam United Technologies negotiationem Sikorsky, maximam in mundo fabricatricem helicopterorum.

Post tres septimanas cum clausae manebant, Graecia denuo portas argentariarum aperit civibus. Quibus nihilominus non licebit plus quam 60 eurones uno die computo detrahere.

Post 54 annos "belli frigidi" USA et Cuba mutuas relationes diplomaticas restaurant. Vasintoniam hodie visitat Bruno Rodriguez, minister rerum externarum Cubae, qui conveniet sui collegam US-Americanum John Kerry necnon aperiet novas aedes legationis Cubani in hac urbe.

Saltem 115 Iraquienses vitam amiserunt in displosione pyroboli in hominum pleno foro oppidi Chan Bani Saad ad Bagdatiam. Pyrobolus in autocineto quodam latebat. Civitas Islamica admisit se hunc ictum tromocraticum patravisse. 

Anders Behring Breivik, qui anno 2011 sclopetando et pyrobolo necavit 77 Norvegos, admissus est ut studens in Universitatem Osloensem, ubi politologiae studeret. Rector universitatis dixit se non posse Breivik studere prohibere, nam id contra legem esset. Nihilominus, adesse lectionibus in persona Breivik non licebit, per litteras solum e carcere missas cum magistris communicaturus est. Breivik ad 21 annos in vinculis damnatus est, quod est maxima poena apud Norvegos, quae tamen produci usque mortem eius poterit, si Breivik porro putabitur homo societati imminens.

E primis photographematis percontatro New Horizons transmissis planetae Plutonis necnon satellitis eius, Charontis, patet Plutonem adhuc ignotas sat altos montes possidere (licet verisimiliter gelu tantum structi hi montes sint), dum Charontem valles fauciformes. Modo repertam aream obscuram in septentrionali Charontis parte studiosi NASA nuncupaverunt Mordor – in honorem scriptoris J. R. R. Tolkien.

Fures coementarii furati sunt ad Berolinam caput cadaveris Fredericis Gullielmi (Friedrich Wilhelm) Murnau, praeclari dispositoris scaenarum Germanici, noti imprimis pellicula "Nosferatu – symphonia horroris" (a. 1922 facta). Biocolytae suspiciuntur calvariam ad usum occultistarum adhibitum iri. Murnau, tunc 42 annos natus, mortuus est anno 1931 in infortunio viario Sanctae Monicae Californiensium.

 

Distantia tantum 12.550 chm praetervolabit hodie percontatrum cosmicum New Horizons planetam Plutonis, cui numquam adhuc ulla navis cosmica se appropinquavit. Percontatrum portat portionem cadaveris repertoris Plutonis (anni 1930), US-Americani astronomi Clyde Tombaugh, licet ab anno 2006 Pluton non porro numeretur inter planetas veros, sed potius planetas nanos et putatur esse maximum corporum caelestium Zonae Kuiperi.

 

Post novem annos negotiationum pactum est inter Iraniam et USA, Britanniam, Galliam, Sinas, Russiam et Germaniam de futuro statu programmatis nuclearis Persarum. Iraniae licebit plutonium tantum in electrificinis uti et non ad arma nuclearia facienda; hac condicione observata sanctiones commerciales contra Persas deletum iri.

 

Tauros currentes tempore festi fugiendo mortuus est in Hispanico oppido Pedreguer prope Alicantium peregrinator 44 annorum. Simili festo ante paucos dies Pampeiopoli (Pamplona) habito plus quam 40 homines cornubus taurorum petiti sauciati sunt. 

 

Auxilia Graecis ad stabilitatem fiscalem necessaria multo maiora esse quam haec, quae Eurozona modo decrevit regimini Atheniensi praebere (quorum esse 82-86 mld $, secundum novissimas aestimationes) – patet e secreta analysi Internationalis Fundi Monetalis (IMF), qua potiti sunt diurnarii agenturae Reuterianae. Praeteritis autem duabus septimanis, cum argentariae et aliae instituriones fiscales huius terrae claudebantur, res multo pessimae factae sint.

 


Altero trimestri huius anni oeconomia Serica crevit gradu 7,0 centesimarum, dum analytici exspectabant incrementum 6,9%. Nihilominus, tituli negotiationum Sinensium in bursis huius terrae vilescunt – a medio Iunio eorum pretia viliora facta sunt triginta centesimis.

poniedziałek, 20 lipca 2015

Praeconia temporis interbelli

Praeconiis commercialibus Polonorum temporis interbelli (1918-39) aderant nonnulla alicuius momenti, ut Saccharum recreat (Polonice: Cukier krzepi), inventum a scriptore Melchiore Wańkowicz in certamine annuntiato a directore consociationis statalis fabricatorum sacchari, nam per tempus quoddam (verisimiliter ob crisin mundanam paupertatemque) saccharum in Polonia male venum isset. Satis tamen erat duorum horum verborum, ut cito multo maior copia sacchari a Polonis emeretur (ita saltem dicunt veteres).

Sed mihi iucundissum huius temporis videtur dictum praeconicum adhortans viros, ut condomia sive cummes praeservativas (pro dolor, non memini nominis fabricatoris praeconiive auctoris) emerent: Citius tibi cor rumpat! (Prędzej ci serce pęknie!).

niedziela, 19 lipca 2015

De calceis de vita aut morte iudicandis

Biocolytae, sive vigiles publici, quoque sui superstitionibus laborant, saltem in Polonia. Ita exempli gratia, cum inspiciant victimas infortunii viarii, si homines sauciati in tali infortunio tempore collisionis – cum e.gr. autocinetum e via in agrum proiectum sit – calceos pedibus amiserint, sine dubio morituri sunt, etiam si vulnus non videatur grave. Si autem calcei eorum in pedibus manent, victimae, sint licet sanguilentissimi, vitam superabunt.

sobota, 18 lipca 2015

Seres nuntiant copiam auri, quam in thesauro publico teneant


1.658 tonnae auri habentur in Serico thesauro statali – primum a sex annis nuntiavit Popularis Argentaria Sinarum (PBC). Analytici putant tamen veritatem non dici a Sinensibus, qui habeant saltem dimidiam alteram talem copiam huius metalli pretiosi.
Regimen Pecchinense esse hic in difficili situ: ex una parte volunt monstrare mundo se sat magnam copiam auri habere, ut citius nummus Sericus – yuan – ut quinta moneta fisci SDR accipiatur, quem fiscum esse quasi nummum ficticium, quo utuntur in negotiationibus inter se civitates necnon magnae institutiones monetariae; ceterum SDR basim esse in aestimatione cotidiana pretiorum monetarum omnium terrarum. Nam in futuro tempore volunt magistratus Sinenses yuan fore nummum-aemulum dollarii US-Americanorum. Nunc fisco SDR adsunt nummi: euro, dollarium, yen et libra Britannorum; nonnulli putant etiam hoc anno yuan fieri quintam huius fisci monetam.
Sed eodem momento declarans veram – maiorem quam officialiter declarata – copiam auri, quae in thesauro PBC teneatur, Seres efficere possunt vehementes fluctuationes pretiorum et maiorum nummorum mundi et ipsius auri (cuius pretium deminuit una centesima statim post nuntium PBC de 1.658 tonnis; ita aurum vilissimum factum esse quinque proximorum annorum – venum praebetur nunc 1.131 dollariis per unciam).
Ut putant maior pars analyticorum, veram copiam auri a se habiti dicent Seres aut cum yuan iam nummus fisci SDR fiat, aut numquam. 

czwartek, 16 lipca 2015

De miraculoso vico Garnek

Poloni dicunt deesse apud se unum quidem vicum, qui non deploraret filos filiasve tempore alterius belli mundani necatos. Re vera sex miliones civium (quorum, meminerimus, dimidia pars Iudaei) perierunt in hac terra triginta quinque milionum (a. 1939), sextus ergo quisque mortuus.
Sed adesse unum solum vicum (seu potius oppidulum), nomine Garnek (quod ceterum lingua Polonorum 'olla' significat), sat quidem populosum - 7 milia incolarum parochiae catholicis, una cum parvis vicis colonisve proximis. Quorum septem milium nemo vitam amiserit spatio sex annorum (1939-45) calamitatis cosmicae! Licet multi incolarum oppidi ut milites pugnarent in pervariis huius belli pugnis, luctantes et contra Germanos et Exercitum Rubrum, nonnulli etiam in ergastula Sibiriaca missi sunt ad poenam multorum annorum, sed omnes postea miraculose sospites domum redierunt.
Incolae oppidi putant se omnes servatos esse vi... rosarii. Primo enim die belli porochus Garncensis tempore missae sacrae appelavit ad incolas, ut usque finem belli cotidie in fine diei ecclasiam peterent, ut una preces rosarii dicunt coram hierotheca cum carne Christi (ut dicitur) in altari exposita. Quod per sex fere annos fideles incolae faciebant.
Utrum haec omnia vera sint an non, non possum dicere. Sucpicor tamen non totam veritatem hic esse dictam. Regio, ubi Garnek ponitur, prope urbem Siedlce ad solem orientem Varsoviā euntibus, re vera non fuisse notam pugnarum clandestinarum, fieri ergo potest ut nemo incolarum iram Germanorum excitaverit. Sed eadem regio patria erat permultorum Iudaeorum, quorum omnes fere vitam amiserunt in proxima infamosa Treblinka – ut ex. gr. incolae vicinorum oppidorum Sokołów et Węgrów, quorum plus quam dimidia pars Iudaei fuerunt. Num fuit Garnek solum oppidum in regione omnino Iudaeis carens? Dubito. Iam potius, puto, victimae Iudaei omnino in hac "miraculosa calculatione" non inclusi sunt. Qui certe ante altare Christi preces rosarii non dicebant...

Nihilominus, etiam si solum ad ethnicos Polonos historia haec spectet, mirabilis videtur.

środa, 15 lipca 2015

Oneirocritica – pars nova explanationis imaginum nocturnarum Eili Goldberg

Te in somnio vides ad mensam scriptoriam sedentem? Cave, nam periculum tibi imminet. Si tamen in mensa pecuniam iacentem conspicias, difficultates superabis.

 

Infantes gemini significant somniantem in compito stare viam sibi propriam quam eligat nesciens. Sed veram difficultatem esse qualemcumque viam eligat, erit haec ei via dolorosa: nullam solutionem sibi in praesenti esse bonam.

 

Contra communem opionionem, somnium de fame et paupertate esse omen bonae fortunae.  

 

Si uxor dormit de alio viro barbato, re vera vult maritum relinquere. Si autem teipsum vides, barba cana praeditum, significat te opiniones firmas de rerum omnium possidere.

 

Lagoenam vini fractam esse signum magnae libidinis ("voracitatis sexualis").

 

Si mulier taurum in somniis videt, verisimiliter non satis voluptatis sexualis ei in vita cotidiana adesse atque cupit novas technas Venereas gustare.

 

Baptisma teipsius cum vides, significat te facturum omnia, etiam impia, ut plausum populi tibi vincas.

 

Contra opinionem vulgi, coemeterium in somno visum esse praeconem bonorum nuntiorum – e.gr. amicus tuus, qui aegrotare solebat, mox sanus erit.

 

Cyclamen (plantam Cyclamen persicum) fere semper nuntiat somnianti eum impotentia sexuali laborare.

 

Foetorem autem pedum esse signum difficultatum in sexualitate, quarum certior es sed eas neglegis.

 


Scalas descendere nuntium bonum esse, si scalae sunt veteres atque infrirmae – quod cupis, habebis, licet post multum laborem sudoremque. Si tamen scalae novae et firmae sint, consilia tua omnia vana se esse praebebunt.  

poniedziałek, 13 lipca 2015

De caseo mortifero

Ut me certiorem fecit Michael (Michał) Cichy, amator polyethnicae regionis Slovacorum nomine Latino Sepusius sive Alba Sepusia notae, in chronica unius huius terrae urbium – Leutsoviae (Slovacice Levoča) – adesse mentionem incredibilis modi pugnandi: sphaeris caseinis e tormentis in hostem proiectis! Talibus enim telis usi sunt in summa rerum desperatione defensores proximae urbis nomine Kesmarkium (Kežmarok) anno 1531, in fine belli centum annorum, quod inter sese incolae ambarum urbium gerebant de iure stapulae, id est obligatione, qua mercatores urbem transeuntes deberent per 15 dies omnes merces suos in hac urbe venum praebere (ex quo lege, paucis tantum urbibus ab imperatore data, urbes magnum lucrum sibi comparabant; secundum Leutsovienses, Kesmarkium potitum esse simili privilegio fraude, postquam archiva urbis incendio deleta essent tempore bellorum Hussitarum, incolis Kesmarkienibus clamantibus se simile ius ab imperatore Austriaco iam quondam accepisse).
Ita saltem vult Gasparus Hain (1632-87), Theodiscae gentis civis Leutsoviensis, auctor supradicti chronici (Die Lentschauer Chronik). Nam dicit Hain, hoc 1531 anno quinquagintos pedites Leutsovienses et equites domini Scheredi [videlicet baronis cuiusdam Hungari] ad oppugnationem Kesmarkii venisse, urbem oppugnasse sed sine effectu. Uno die oppugnationis defensores Kesmarkenses, missilibus metallicis iam carentes, in nostros spaeros e caseo formatos projecerunt.
Nihil hic mirabile fortasse si ad etymologiam nominis urbis spectemus. Kesmarkium enim e Theodisco Käsmark (Forum Casearium) provenit – caseis ergo iis etiam in oppugnatione suppeditasse reor.
Ceterum scribit Hain de dracone sedenti per totam diem in tecto ecclesiae cuiusdam in pedibus montium Tatrensium (Tatry), tempore procellae saevissimiae quinto die Augusti anni 1662 (ergo Hahn iam vivo!). Quem draconem permulti testes oculati vidissent, licet nemo ausus sit bestiam appropinquare. Ob illuviem magnam post eam procellam plus quam centum monticolae peierunt, docet Hain.

nuntii Iconoclastae plus minusve praeteritae septimanae

Regimina civitatum Eurozonae consensi sunt cum Graecis de condicionibus 53,5 mld EUR auxiliorum huic terrae dandorum.

23 milites delecti Russi vitam in urbe Omsk amiserunt postquam corruerant aedes castrorum. Causam calamitatis verisimiliter esse errorem structuralem aedium.

83 annos natus, recens morbo Alzheimeriano laborans, mortuus est Omar Sharif, histrio praeclarus cinematographicus Aegyptius, notus imprimis partibus Laurentii Arabis et Doctoris Zhivago.

89% Russorum favent suo praesidi Vladimiro Putin – patet e demoscopia liberae agenturae aestimatoriae "Levada". Praeterito (2014) anno 86% civium Russiae se praesidi favere declaraverunt. Terram regens ab anno 2000, Putin adhuc numquam tam gratus populo fuit.

Regimen Tunesiae statum extraordinale introduxit, postquam praeterita septimana civis Tunesianus sclopetando necaverat 38 homines in ora maris otio fruentes – in quorum numero 30 peregrinatores Britannos.

36. certaminis pedifolii "Copa America" victores discesserunt sphaeristae Chilienses, in ludo finali superantes Argentinianos effectu 4:1 (in poenariis). 

Incolae insulae Pacificae Pitcairn plebis scitu decreverunt apud se matrimonia homosexualia abhinc lege habenda. Insula habet 48 incolas, quorum fere omnes nepotes sunt infamorum rebellatorum navis "Bounty" necnon horum captivarum Tahitanarum. Qui omnes 48 se heterosexuales esse declarant. Solus autem ibi sacerdos, fide Adventistarum, nuptiis homosexualium reclamitat.

Mexicum et Indoniesiam anno 2050 haberi inter maximas decem oeconomias mundi docet prognosis agenturae Bloombergianae; relinquere autem hoc forum debebunt Russi et Itali. Maxima vis oeconomica mundi sint a. 2050 Sinae, deinde USA et India. Si tamen ad productum per caput spectamus, locupletissima terra mundi post abhinc 35 annos adhuc sint USA, deinde Iaponia et Sinae – harum GDP per caput fore 50% productūs per caput US-Americani (hodie 14%).

Plus quam 60% civium Graeciae plebis scitu dixerunt se nolle condiciones UE auxiliorum fiscalium probare. 

piątek, 10 lipca 2015

Ludibrium horribile

Gustavolus, filius Catherinae (ergo meus privignus), dixit se in quadam taberna vidisse ursulum lusorium sive textilem (Anglice teddy bear) loqui scientem. Id est dicit bestia voce dulcissima unam solam sententiam: Necabo te in somno!

Horribilia nautica

Gedaniae Minori heri collocutus sum cum capitaneo Adalberto M., qui quadraginta annos naves mercatorias per maria totius mundi ducere solebat. Confirmavit quod ante annum dixerat mihi alter capitaneus classis mercatoriae, Matthaeus P., nempe nautas Russos et Iaponicos necare (in mare proiciendo) illegales migrantes Africanos, qui in portibus clam eorum naves penetrant, deinde in pleno mari reperti sunt. Est hoc quasi secretum Pulcinellae inter nautas.
Seipse dixit testem fuisse relinquendi in mari annos septuagenarios praeteriti saeculi circiter quinquaginta immigrantes Vietnamenses Hongkongiam duobus parvis lintris petentes. Qui se navi Polonicae appropinquaverunt auxilia petendo. Poloni dederunt iis petroleum et aquam, sed nihil porro, at mox mox eundem locum ventus typhonicus fuit aggresurus. Propter "rationes politicas" (nam amicitia ideologica iungebantur communistica Polonia et Vietnamia) praefectus navis (ipse Adalbertus munere alterius pronavarchi tunc fungebatur) recusavit ut navem profugi Vietnamenses ascenderent. Adalbertus scit pro certo eos ictum typhonis in lintris vivos non sustinuisse. At adfuisse solutionem: eos in navim una cum lintris accipere, deinde, vento iam absente, prope litus e.g. Indonesiae (quam Poloni petebant) in lintris relinquere. Sed capitaneus id facere timuit, vivit ergo (si adhuc vivit) conscientia morte 50 onerata. Non rogavi apud Adalbertum nomen viri. 

niedziela, 5 lipca 2015

De nautarum sententia cur Delos tam magni momenti insula fuerit

Ignoscat mihi lector taciturnitatem: per insulas Cyclades navi lintea praeterita septimana vehabar, ubi aut ebrius vespero fui aut non facile mihi erat accessum interreti invenire (aut ambo).
Inter alias insulas, etiam Delo prope navigabamus – ad hanc tamen cum sine permissione speciali (quae in proxima Mycono est apud magistratus quaerenda) appellere non liceat, aspectu ergo tantum eius delectabamus. Tunc, ut mos mihi est, aliquid de insula quaesivi in biblia nautarum Maris Aegaei, id est in libro "Greek Waters Pilot" scriptorum Rod & Lucinda Heikell (Neozelandensium). Ubi tale citatum Bradfordianum (Ernie Bradford, The Greek Islands) inveni:
Cur tam parva insula, sine ullis bonis naturalibus, facta sit quod facta est, explanabit vobis quisque nauta: Delum esse ultimum ac optimum locum nautis ex Europa Asiam petentibus, ubi ancoram iaciant. Ab oriente tutata Mycono, a septentrione Tinos eam protegit, in Occidente murum ventis dat vicina Rheneia. Chartam cartographicam inspiciendo facile invenimus viam nauticam Argo in magnas insulas prope litus Asiaticum – ut Patmos et Samos - transire prope Delum, at simul est ibi via Cretibus Bosphorum (aut vice versa) euntibus... Tunc, generaliter docet Bradford: Sanctuaria religiosa, ut Roma aut Lapurdum (Lourdes), attrahunt certe in se commercium et negotia, sed saepius etiam invenies ubi negotia iam sunt, structum mox iri deorum templa. Negotiatores enim, et veteres et hodierni, securitatem sibi tutari conantur tam in terra, quam in caelo.
Cui respondet Rod Heikell: Bene dictum, sed... non possum quin addem in proximitate adesse nonnullos alios portus naturales, meliores quam Delos, ut Naussa in Paro aut Portus Despoticus in Mycono – ambo melius tutati et facilius accessibiles e mari.

Incertum ergo porro manet, quis creaverit Delum portum tam potentem – di aut mercatores?