wtorek, 30 sierpnia 2016

Caffea matutina: hypermnesia

Hypermnesia - id est nimia memoria rerum praeteritarum - laborat inter alios Rebecca Sharroc, adulescentula Australiana. Ita, misera Rebecca memoria tenere debet quoque recordationes minime sibi iucundas, quae apud "normales" viros mulieresve amnesia (oblivio) delet. Pugnans autem contra recursionem commemorationum malorum Rebecca onerat memoriam fabulis Harrio-Potterianis. E memoria recitare potest totos septem libros a J.K. Rowling scriptas ac, si de quodamlibet loco eam rogas, librum paginamque tibi dabit.
Conveni olim Indum gloriantem se totum poema "Ramaiana" memoratim Sanscritice didicisse. Homo aliquantulum mirus, asociabilis erat. Nunc puto eum hypermnesia aegrotasse.

poniedziałek, 29 sierpnia 2016

Vita fit melior. Citissime quidem.

https://ourworldindata.org/grapher/world-population-in-extreme-poverty-absolute
Nolite ergo tristes esse!
Bonam noctem!

Caffea matutina: de divortiis necnon communi cum Arabibus tauro

Sociologiae perita profes(s)trix Julie Brines Universitatis Vasintonensis - statisticis iuridicis annorum 2001-2015 civitatum Washington, Minnesota, Florida, Ohio et Arizona a se caute investigatis - animadvertit maximam copiam hominum divortium petere mensibus Martio atque Augusto. In opinionem ergo prof. Brines adducta est divortia iungi feriis, aut aestivis aut hiemalibus. Causam rei videt talem: homines ad divortium iam imo in corde parati nolunt id petere tempore feriarum, nam feriae quasi sanctum tempus familiis deditum sunt. Ergo procrastinent petitionem divortii apud iudices usque primum post ferias mensem; nonnulli coniuges credunt ferias "ultimam spem" fore matrimonii salutis.
Mihi autem, nullis investigationibus statisticis peractis, res multo simplicius videri patet: tempore feriarum novos fututores fututricesve convenimus, veteres - ut vestes contritas - abicimus.
xxx
Frater meus maior me natu, qui pseudonymo Burdubasta symbolas in interreti Polonice scribit, nuntiat Arabicum 'tauron' in Graeco 'tauros' originem habuisse. Sed, ut ipse dicit, praeclarum polyglottam rabbim Ernestum David Klein aliter putare: importationem vocabuli scilicet altera e directione fuisse: e Semiticis linguis (ut Arameicum 'tora') in Indo-Europaeas. Ego magis confido Klein quam fratri, sed, ut recte notat frater, utcumque res sese habent, communem cum Arabibus taurum habemus.

Nuntii Iconoclastae praeteritae septimanae

300 tarandri occisi sunt fulminibus tempore procellae ingentis, quae die Veneris Norvegiam vastabat.

Ob immigrationem 1,14 mln hominum numerus incolarum Germaniae crevit anno 2015 passu 1,2%, usque 82,2 mln. Alienigenae constituunt nunc 10,5% omnium incolarum, dum anno 2014 constituerunt 9,3%.

Plus ducentos homines mortuos esse et quadringentos vulneratos, duo triave oppida paene funditus deleta - esse computum novissimum victimarum ac damnorum terrae motus qui Umbriam vastavit.

Saltem 21 incolae oppidi Amatrice mortui sunt in tremore terrae magnitudine 6,2 graduum Richterianorum.
Currus loricati Turcici Syriam intraverunt, ut agmina Civitatis Islamicae adorirentur prope urbem Tarabulus.
Primis quattuor diebus cum civibus Norvegiae apostasin electronice perfcere liceretur, 15 milia hominum ecclesiam Lutheranam reliquerunt. Iisdem diebus usu computatri nomina sua ecclesiae dederunt 1.300 homines.

Primo dimidio huius anni fines USA cum Mexico conati sunt contra legem transgredi 26 milia puerorum parentium aut tutorum carentium. Eodem tempore praeteriti anni – 18.500.

Saltem 51 convivae nunptiarum mortui sunt propter displosionem suicidiariam tromocraticam in urbe Turcica Gaziantep; ipse neosponsus sauciatus est. Magistratus Turicici putant Civitatem Islamicam ream ictus esse. Suicida fuit puer inter 12 et 14 annos natus.

piątek, 26 sierpnia 2016

De scientia regiminis Moscoviensis rerum futurarum

Nuper multas analyses, ut dicuntur, politicas propter munus meum lego atque in Polonicam linguam verto. Modo in quadam symbola legi praesidem Turciae Recep Tayyip Erdogan, nonnullis horis ante coniurationem in se militum, de ipsa coniuratione (necnon summo periculo eiusdem nocte sibi imminente) tacite certiorem factum esse a quodam collaboratore praesidis Russiae Vladimiri Putin, qui - bonos mores, rebus ita stantibus, minime respectans - ad Erdoganem hora nocturna telephonavit.
Quod in mentem mihi adducit iocum vetus de "omniscientia" Kremlinis.
Ut saltem pars nostrum memoria tenet, anno 1981 praeses Aegyptii Anwar as-Sadat occisus est a militibus in eum sclopetandis tempore pompae celebris Cairo Magnae habitae. Nonnulli tunc dicebant secretarium generalem factionis communisticae Unionis Sovieticae, Leonidum Brezhnev [qui de facto dictator Sovieticus necnon imperator tertiae fere partis mundi erat], condoluisse uxori viduae tribus minutis... ante sclopetationem.
Si tunc telephonia mobilia nobis adfuissent, Sadat fortasse porro diu vixisset.    

środa, 24 sierpnia 2016

De convergentia civilisationum, utrum probabilis sit an non

In quadam symbola analytica ad periculum tromocratiae spectante lego verba: Convergentionem civilisationis Europaeae cum islamica, quae sc. crearet mixturam quandam ambarum, non esse probabilem propter tam a se distantes utriusque valores culturales.
At memini anthropologos docere post 2.000 abhinc annos ne civilisationes quidem hodiernas sospites mixturae globalis fore, sed ipsas phylas: ne porro exstent tunc homines albi, nigri, flavi etc. coloris. Nam "a se distantes valores culturales" Deo gratia non prohibent nos a mutua fututione.

Progressu oeconomico & technico citius citiusque evolvente fit ut largius (ad remotissima etiam loca) saepiusque nos omnes itineremur. Itinera ipsa autem copulationi crebriori prosunt: in unoquoque loco advenae in summa intermedia magis in se fututores fututricesve attrahunt quam (taediosi) locales (vicinumque pecus grandius uber habet). 

Bill Gates denuo locupletissimus

Bill Gates, conditor societatis computatralis Microsoft, denuo factus est divitissimus civis mundi, aestimata re familiari 90 miliardorum dolarium. Novum indicem locupletissimorum hominum mundi publicavit modo agentura Bloomberg.
Hoc anno in indice Bloombergiano Gates superavit Amancionem Ortegam (Hispanum, possessorem negotiationis vestiariae Zara) necnon concivem suum Warrenem Buffet (Berkshire Hathaway), qui varia ex industria lucrum obtinet.
Causam reditus Gates in primum locum indicis non esse activitatem in re computatrali (nam ante 16 abhinc annos abdicavit e munere praesidis Microsoft) sed collocationes pecuniae in alias industrias, negotiationes scilicet Ecolab ac Canadian National Railway Company (Ferrovia Canadiana); quae dederunt ei 31 nova miliarda dol.
Multi autem magis confidunt indici miliardariorum, quem divulgat ephemeris negotiatoria "Forbes". Ubi iam primum Gates divitissimus homo mundi denuo nuncupatus est, sed antea spatio quattuor annorum (2010-13) principatum amisit, superatus a Carlo Slim, Mexicano "barone" telecommunicationis.
In ambobus indicibus 5./6. locum tenet Mark Zuckerberg, conditor societatis Facebook, qui – propter inopinatam Prosopobiblii evolutionem – citissime per scalas indicis escendit ut verus "equus niger" (ut Angli dicunt) curriculi.

wtorek, 23 sierpnia 2016

Avia minime foeda

Adest nobis (mihi sc. cum uxore) amica nomine Monica. 54 annos nata, sed... corpore valde ut ita dicam illecebroso, putares eam 20 annis iuveniorem. Divorta, duos filios iam adultos habet necnon duos nepotes. Magis tamen quam parvulos curare amat... birotam motralem generis Harley Davidson per vias inviaque gubernare. In societate sibi similium fautorum artis autobirotariae - Angeli Orci etc. - saepe convenit Monica se multo iuveniores viros ad Venerem colendam semper paratos. Cui rei ipsa non est inimica. Sed, ut nobis dixit, habet regulam sacrosanctam:
- Primo in conventu, cum in cauponam me vir ire secum poscit, dico ei me matrem duorum filiorum esse. Altero conventu, nonnullis diebus postea, veritatem crudelem aperio: me iam aviam esse. Si nihilominus vir ille pergit rem pergere, in lectum una imus. Si non pergit, saltem duas cenas gratis habeo.
O beata societas autobirotariorum! Quam pulchre apud vos vivitur!

poniedziałek, 22 sierpnia 2016

Gemma fulget ecclesiae...

Si de Hedvige Silesiaca dicimus, volo lectoribus praebere primos versus cantilenae vesperorum vitam huius sanctae depingentem, poema scilicet anonymum, mediis aevis a quodam monacho scriptum. De memoria cito (deest textus interreti), cum locis incertis, quas signo rogationis monstro:
Gemma fulget ecclesiae,
Hedvigis, ductrix Slesiae,
in summis[?] data gratiae
decorique[?] Poloniae.
Est haec ceterum una duarum (tantum) cantilenarum quas scio tibia canere. (Alteram esse melodiam cinematis "Bella stellaria", a John Williams scriptam.)

Sancta Hedvigis, ora pro nobis, peccatoribus maximis!

Ecce sancta Hedvigis...
... principissa Silesiae, quae vixit annis 1178[80]-1243, uxor Henrici Barbati, mater Henrici Pii, qui in pugna contra Tartaros vitam amisit a. 1241, matre adhuc viva. Sculpturam ad usum unius ecclesiarum Masoviae fecit amicus meus Thoma. Ecce caput sanctae, oculis vero... amore carnali plenis:
Quem Thomam heri hospitem cum uxore apud nos ad cenam habuimus. Tunc, photographemata spectans, rogavi eum:
- Tu vero sanctam Hedvigem sculpsi? Nonne potius Mariam Magdalenam?
- Quid vis? - respondit, paululum indignatus. - Mulier debet esse pulchra. Etiam sancta mulier.
Et narravit historiam sculptoris Germanici Tilman(is) Riemenschneider (AD 1460-1531), qui ab episcopis castigatus erat propter "mammulas sanctarum, quas nimis alte in corpore portabant", quasi puellae 15 annos natae. Ut certe eius sancta Barbara:
Bene, concedo Thomae. Ceterum, "officialis" imago Hedvigis quoque mulierem haud impulchram reddit, licet facie ornetur haec sancta subpingui (ut mos erat stylo Silesiaco feminas monstrandi), oculis simul et tristitia et hilaritate affectis. De mammis difficilest iudicare:



Amoenitas studiorum Arabicorum

Ecce, media in nocte, primum a sex mensibus, auscultabam heri disco compacto continenti lectiones linguae Arabicae. Quae amoenitas: sonus tam suaves, sint paululum hispidi, magna e parte gutturales - sed mihi tales placent. (Si mulier essem aut cinaedus, maritum inter viros Arabes propter sonorum pulchritudinem mihi quaererem.)
Uno autem momento lector vocabula recitans dicit:
- Barq. Fulmen.
In memoria fodio. Barq, barq... Habeo: Barkas! Magna gens Poenorum: Hamilcar, Hannibal, Magon, omnes eo cognomine (Barcas), significante 'fulmen'.
At hodie filius meus Iudaeophilus, cui de "repertione" nocturna narro, dicit fulmen Hebraeos barak nuncupare.
Di boni! Suntne omnes linguae Semiticae fere eaedem?

niedziela, 21 sierpnia 2016

De pugna inter ursos

Inspicias, lector care, perpulchram paginam etymologicam Imgurianam, monstrantem ursulum nostrum Latinum sive arcton Graecorum magnam Europae partem cepisse, ubi tamen ei imprimis cum Slavorum gustatore melis necnon Germanorum fusco-nitentem bestiam pugnandum de dominio est. Occupavit quoque veterem Mezopotamiam (linguam Curdicam?), nomine ursi hic multo lapsu temporis mutato.
Pagina autem Imguriana plena hic monstratur: http://imgur.com/a/iVK8a
Ceterum, si quis mihi etymologiam ursi Balticam (Lituano-Lettonicam, lokys/lacis) explanaverit, gratus in sempiternum ei ero.

Nuntii Iconoclastae eventus describentes plus minusve praeteritae septimanae

Ob vulnera bellica mortuus est 10 annorum Ali Daqneesh, frater 5 annos nati Omranis Daqneesh, cuius cruore obductae faciei corporisque imago monstratur per orbem terrarum. Mater puerorum in nosocomio urbis Aleppo contra mortem pugnat. Omnes in ictu aerio sauciati sunt.

Illuvie US-civitatem Ludovicianam vastante mortui sunt 13 homines, 30 milia aliorum domum relinquere coacti. Aquis deletae sunt 40 milia aedium.

Oeconomia Sinarum crevit 6,7% secundo trimestri huius anni, eodem passu ut primis tribus mensibus a. 2016.

Materia flammosa ac cultro armatus vir 27 annorum, verisimiliter mente captus, necavit mulierem & sauciavit sex alios homines tramine vectos in Helvetia.

Vetustissima argentaria mundi, Banca Monte dei Paschi di Siena, laborat 50 miliardis euronum "pecuniae male creditae", nuntiaverunt magistratus Itali.

Primo mense in mercatu ludus Pokemon Go collegit 200 miliones dolariorum lucri, quod numquam adhuc in historia applicationum sophophonalium evenit: Clash Royale generaverat 100 mln dol., Candy Crash Soda Saga - 25 mln dol.

13 convivae cenae natalis mortui sunt Rotomagi (Rouen) Gallorum in incendio, quo caupona corrrepta est. Fontem ignis fuerant candelae nataliciae.

Filius Fortunae sive gallinae...?

Nuper hic scripsi filium Fortunae me esse (aut saltem fuisse). Nunc video melius fortasse esset dicere 'gallinae albae filius'. Ut apud Iuvenalem (13, 141):
ten, o delicias, extra communia censes               
ponendum, quia tu gallinae filius albae,
nos uiles pulli nati infelicibus ouis?
'Infelicibus ovis nati' quoque memoratu dignum.

sobota, 20 sierpnia 2016

De pueritia mea in orbe communistico acta

Saepe de pueritia mea hic scribo, quam in Polonia nolens volens degebam a communistis dictatorie recta, ubi adulti homines salaria menstrua 20 dolariorum merebantur. Certe, nemo sanus communistas regentes in terra mea amabat, cuius rei tamen non omnes peregrini certiores erant. Anno 1987 ut studens linguae Sinicae Pecchinum ad spatium unius anni missus iussu Universitatis Varsoviensis sum. Ubi quisdam peregrinator US-Americanus subridens me coram aliis rogavit:
- Estne verum vos unam tantum factionem politicam in terra vestra habere? (Quasi ego reus essem potestatis in Polonia communistarum!)
Nescivi primum quid responderem. Deinde respondi:
- Estne verum vos habere duas?
Certe, plus quam quadraginta dolaria per mensem civis USA merebatur, ergo systema horum bifactionale superius communistico monofactionali erat.

Punctum referentiae lapsu temporis mutatum

Nuper uxor amicis photographemata a se collectorum fungorum silvestrium misit atque, ut magnitudinem fungorum monstraret, prope eos bananam* posuit. Nunc enim bananam esse "punctum referentiae", sicut in pueritia mea erat... capsella sulphuratorum (Angl. matchbox). Omnis enim tunc homo scivit magnitudo capsellae sulphuratorum quae esset, dum bananae rarissimus hospes in tabernis nostris adfuit (plus minusve bis per annum) propter intricationes oeconomiae communisticae (habuimus in familia Cubam & Vietnamiam, ubi bananae nascuntur, sed videlicet non satis, ut omnem mundum communisticum alerent). Nunc autem bananas ad libitum habemus, capsellae autem sulphuratorum evanuerunt.
* Malo bananam quam arienam bis a Plinio adhibitam; neque minimam quidem certitudinem habemus eum de (hodiernis) bananis dicere.

piątek, 19 sierpnia 2016

Poema haiku Latine...

... olim aliquantulum pompatice scripsi, tempore - quod hic esse momenti - serae hiemis:
Birota mea defuncta,
Quomodo ver fieri potest?
Nam re vera birota mea pessime tunc se habebat. Ver nihilominus quoddam modo eo anno (sicut et ceteris) factum est.
Nunc refixa est birota, sed propter canis meae pedes breves ea omnino non utor (nam sine cane domo exire minime mihi placet).

De Baltico (porro) et alia talia

I. Nomen Balticum quoque sonat (mihi saltem) sat exotice, quasi incantatio Psyllorum angues effascinantium. Non habet etymologiam certam. Primum adhibitum esse saec. XI ab Adamo Bremensi et originem habere aut in Latino 'balteus' (quasi a Fretis Danicis in huius maris ostio), aut in lingua olim communi gentium Balticarum Slavicarumque, ubi *balt/bolt 'coenum', 'lutum', 'paludem' ac 'stagnum' significasse creditur.
II. Diem hodie perdidi, nam putavi Iovis diem adhuc esse, dum, ut video in computatro, Veneris iam diem habemus.
III. Maria ergo exotica non tam sapiunt quam puero sapiebat mare nostrum frigidum (=Balticum). Nihil porro sapit ut sapere solebat: cibi potionesque (potionibus gravibus uti non porro mihi licet), feminae, itinera... At animus gaudet, nescio qua re. Proximitate mortis?

De lapsu temporis cogitatio nugatoria

Hodie de lapsu temporis pauca dicere volo. De senescente animo, licet et corpus meum recenter non tam bene se habeat ut habere solebat. De animo autem...
Memini me puero cum matre unoquoque anno aestate litus maris petisse ad ferias duarum septimanarum ibi agendas. Certe, de Mari Baltico dico, tunc alias (peregrinas) regiones petere non facile nobis erat. Sed puero Balticum videbatur ut paradisus - memoria usque hodie teneo imagines huius paradisi permultas. Deinde, iam adulescens, nova maria visi: Nigrum (Euxinum), Adriaticum, multum frigido Baltico exoticiora, quorum insularum oppidorumque litoralium ipsa nomina quasi magica sonarent: Mamaia, Mangalia, Sozopol, Ropotamo, Hvar, Korcula, Mljet... Deinde porro, ut adultus provectioris iam aliquantulum aetatis (47 a. n.), artem navigandi didici atque adii sub velis haud paucas insulas Graecas. Paradisus paradisorum putares, sed... Non gustabant haec loca ut "vetus" Balticum, sapor iam non idem, peior.
Num lapsu temporis omnis pulchritudo hebescit?

czwartek, 18 sierpnia 2016

Miseri Luxemburgenses!

E demoscopia Nationum Unitarum patet 45,9% incolarum Prinicipatus Luxemburgi homines esse alibi natos. Nihilominus, non audimus magistratus Luxemburgenses continuo querentes de calamitate nationali. At Poloni, quibus tantum 1,6% alienigenarum adesse, magna voce ululant de "periculo migrantium", "imminente morte identitatis ethnicae" etc. Sumus vero gens nimia anathymiasi laborans.
Ceterum, ut video, concives mei iniurias a Vikingis acceptas demographice ulcisci conantur. Maximam autem "iniuriam" fuisse quod Poloniam (ut Russiam et Hungariam) Vikingi condiderunt.

De citato modo dormiendi

Amator meae olim K.[not hodiernae, sed quae mihi adfuerat ante 27 abhinc annos], negotiator Helvetus (Francophonus) valde libidinosus, nuncupemus eum G., saepe Varsoviae sat mane e lecto K. [ego post eum K. lectumque sui occupavi] consurgere solebat, nam volatum Turicum habuit hora sexta (aut quid simile) matutina. Tunc, vespere ante volatum, rebus Veneriis transactis, dicere ad K. solebat:
- Il faut vite dormir! (Debemus dormire citissime!)
Quam ob rem postea una cum K. ridere solebamus, quasi posset quis sua sponte aut citius, aut lentius dormire.
At nunc, cum hora nocturna altera aut tertia interdum in lectum venio, de verbis G. cogito. Ipse G. aut mortuus nunc, aut octogenarius fere vir est. De sorte K. quoque nescio, sed si mortua esset, verisimiliter aliquis amicorum nobis mutuorum me certiorem fecisset.  
---
In caupona "Relax" nimis magna turba hipsterorum hodie adfuit - nolui 20 minutis ad caffeam expressam mihi adportandam exspectare.
Caelum Varsoviae dimidia parte serenum, dimidia nimbosum.
Bonum tibi diem, lector!

środa, 17 sierpnia 2016

De caelo aestivo nautis, aeronautis atque alcoholicis grato

Mensem Augustum habemus hoc anno sub-frigidum, meridie plus minusve 18-20 gradibus Celsianis, quod plerisque nostratum calamitas, mihi autem satis est, praesertim cum, ut hodie, caelum maneat serenum, nonnullis hic et illic nubibus (cumulis humilibus, minime nimbosis) haud parvo Cauro in regna Euri pulsis.
Interdum nuncupamus statum caeli hodiernum: tempestas nautica, nam nautis optima est - ventorum vis magna, dies autem Solis plenus. Moscoviae ante XX annos audivi senes Russos nuncupare similes dies tempestatem aeroviariam, bonam scilicet ad volandum - id puto esse (fortasse) hereditatem sermonis militaris temporis belli mundani. Eosdem dies aestate AD 1996 Anglophones redactores "Moscow Times" nominaverunt phrasi spyglass weather (caelum telescopicum). Nonnullos annos post nomen privatum inveni ad similem, non vero torrentem aestatem nuncupandam: tempestas alcoholica. Hominibus enim multum bibentibus frigora aestiva grata sunt, quia minus eo tempore sudant.  
Caffea hodie in taberna "Relax" datur Aethiopica, generis autem nominis iam (15 minutis post) oblitus sum.
Bonum diem tibi, lector care, exopto!

wtorek, 16 sierpnia 2016

De prima facie visionibus fallacibus

Omnes qui peregrinando visimus urbes portuenses Bataviae aut Belgicae, mirabundi intuemur parvas (tenues) domus, parvaque in iis habitacula. Clare patet hic iam ante saecula plus hominum adfuisse quam spatii ad habitandum dati. Quam rem monstrare videntur quoque - fortasse magis quam alia res - tollenones aedibus adfixi, quibus usque hodie utuntur ad supellectilem in habitacula advehendam (propter parvum locum scalis relictum). His tollenonibus utuntur quoque - ut confessus est mihi amicus Amstelodamensis - ad mortuos domo evehendos, licet faciant id tacite, imprimis noctu.
Putares Batavos Belgasve paucitate habitaculorum laborare. At, non est verum. E statstica enim agenturae Eurostat patet civem Batavum habitaculum possidere spacie in summa intermedia 49,2 metrorum quadratorum, dum civem Belgam - 42,6 m2. Maius ergo quam domus ex. gr. civis Britanni (41,1 m2), paululum autem minus quam Germanorum statistica habitatio (52 m2). Maximum in Europa spatium habitandi Dani habent (60,9 m2), minimum (non spectamus ad terrae extra Unionem Europaeam) Dacoromani (17 m2 per caput).
Nolite ita semper credere rebus prima facie inspectis. Batavia certe urbes pulchras habet, quibus in viis prope portum domus veteres re vera parvae saepe adsunt. Sed non omnes Batavi, natio sat pecuniosa, ibi vivunt.
Nos, Poloni, in summa intermedia habitaculis 27,6 m2 fruimur. Ego autem cum uxore (et cane nostra) in spatio 30m2 habitamus. Pauperrimi ita sumus, pauperiores Dacoromanorum (30:2=15, duobus metris minus quam eorum 17), sed... felices mihi videamur (certe ego saltem et canis). Praesertim quod hortum communem aedibus nostris additum habemus, quo horto nemo fere praeter me et canem utitur.
Bonus sit hodiernus dies tibi, lector care, sive in magna, sive parva habitatione habitas!  

poniedziałek, 15 sierpnia 2016

Oeconomia Sinarum: nuntii maiore ex parte boni

Oeconomia Sinarum crevit 6,7% secundo trimestri huius anni, eodem passu ut primis tribus mensibus a. 2016, secundum modo divulgatam statisticam officialem. Periti Reuteriani exspectaverunt incrementum solum 6,6%.
Gaudere possumus quoque – nam totus orbis terrarum de statu oeconomiae Sericae pendet – nuntio menstruo m. Maii: consumptio civium Sinensium crevit tunc passu 10.6%, multo celerius quam excpectatum erat (10%), citissime a mense Decembrio praeteriti anni.
Lentius autem fit incrementum collocationum pecuniae, quae collocationes creverunt 9% primo dimidio anni, dum in calculatione pro primis quinque eiusdem anni mensibus (Ian.-Maius) creverant passu 9,6%.

niedziela, 14 sierpnia 2016

De nuptiis

Amicus meus, qui in Britannia cum amica sua (non sunt maritus et uxor, nam ambo, quoad scio, matrimonio abhorrent) ac eorum filia (5 annos nata) vitam degit, narrat cotidie in pagina sui Facebookiana de variis rogatis parvulae. Ut hodie, in colloquio cum matre:
- Mamma, cur nondum papae nupsisti?
- At cur ei nubere debeam?
- Quomodo aliter papa sciat te eum amare?
Adest, puto, multum sapientiae huic puellae.

Circulus vitiosus argentariarum Italiae

Ut nuntiant administratores fiscali Italiani, vetustissima argentaria mundi, Banca Monte dei Paschi di Siena, laborat 50 miliardis euronum "pecuniae male creditae".
Argentariam hanc, conditam AD 1472 Sienae ab huius urbis magistratibus, non esse solam hac difficultate tactam – omnino pecuniae mutuae, quam reposcere argentariae nequirent, adessse mensis bancariis Italicis 350 miliarda euronum. Quid aequat 20 pro centum partibus omnis pecuniae Italis in fidem datae, dum ultimo ante crisin hypotecariam anno 2008 numerus hic aequabat 5% - quod iam putatur a peritis esse limitem decoctionis. At non dicimus hic de quadam parvula mensa regionali, sed de gigantibus, ut UniCredit, Intesa Sanpaolo atque UBI Banca.
Sed maius periculum esse argentariis Italorum permagnam copiam obligationum statalium, quos possideant. Quae obligationes multo viliores fieri possunt, nisi regimen mutet systema fiscale huius terrae, in quo nunc nimis politica at non satis oeconomia valet. Talis autem reformatio verisimiliter populo grata non esset, regimen autem nullo modo odium publicum subire vult. Ita circulus vitiosus fit – iam nunc periti putant solam causam stabilitatis systematis pecuniariae Italorum esse spem negotiatorum, si res re vera ad triarios pervenerint, Europaeam Argentariam Centralem (ECB) cum subsidiis Italis adfuturam (ut nuper fecit ECB erga Hispaniam et Lusitaniam). Alii autem rogant: Quem ad finem Germani solvere pro erroribus aliorum passuri sunt?

środa, 10 sierpnia 2016

De parvulorum sorte miserrima

In honorem Eduardi Gorey (1925-2000).
A stat pro Annula, puteo immersa;
B autem pro Berta, in lupam conversa.
C quasi Caelia, aratro dissecta;
Dareus fulminis est tactus vi recta.
Elviram ederunt, sinape addita;
Felicem in mortem fodit Sybarita.
Gregorius diem obiit in stagnis;
Hugonem perditum speluncis in magnis.
Isaiam mortuum antequam propheta*;
Klio? Tu ne dura stangulata-s beta?
Leonem confectum mentis cruciatu;
Martham vero nimis pressam sui natu.
Neronem efflantem nominis omine;
Otho fatis datus causa ulla sine.
Petrus ore hausit clavem - pax sit Petro;
Quintum tramen tudit ambulantem retro.
Rosam nimis alte irrumabat frater;
Syrus cum aspide lusit. Dolet mater.
Timonem amissum esse in bascauda;
Ursulam noluerunt – natast cum cauda.
Victor haud vincere vim morbi valuit;
Xena in media se via posuit.
Ypsipyle solis radiis combusta;
Zeno conabatur volitare. Frustra.

* factus sit

De duobus nominibus Arabicae originis

Burdubasta, qui blogographos est alter ego meus Polonice scribens de variis rebus, imprimis etymologicis, nuntiat hodie de duobus verbis maximi in astronomia momenti: zenith et nadir. Utrumque originem Arabicam habet: zenith (caeli fastigium, polus horizontis) e samt, quod Arabice viam significat [secundum Douglas Harper, proximitas sonica semitae seris Latinophonis hic placere potuit], ac nadir (nadirus) e nazir, 'adversus, oppositus' – nazir as-samt significabat ita oppositam directionem.
Tantopere velim studiis Arabicis denuo adesse! Sed... otium deest.

wtorek, 9 sierpnia 2016

De Iudaeis novis ex Argentina oriundis

In litore maris Adalbertum conveni, diurnarium investigatorium, qui sc. de criminibus scandalisque maximi in patria momenti scribit, interdum se capitis periculum subeunte.
- De qua re nunc scribis? - rogavi. - Si scire mihi licet...
Putavi eum aliquid in novum Poloniae regimen conservatistarum [cuius fautores ambo minime sumus] scribendo coniurare. Econtra, symbolam, nisi seriem symbolarum, parat, magistratus Varsovienses [qui plerumque adhuc factionis sunt nostrae, i.e. liberalis] adorientem. Agitur de hominibus reposcentibus rem familiarem, id est aedes habitaculave, quae aut ipsi (rarissime) aut potius patres avique eorum ante annum 1945 possidebant. Anno enim 1945, postquam Varsovia, i.e. maxima eius pars in ripa sinistra fl. Vistulae iacens, 80-90% deleta in bello fuerat, decreto regiminis communisticae nationalizata est, in manus sc. civitatis data. Cum hoc decretum sine ullo dubio criminosum omnibus hodie videatur, libertate plena a. 1989 a Polonis reperta, possessores aedium Varsoviensium veteres nepotesque eorum sibi rem olim suam familiarem restituere lege conabantur. Quae res tamen apud iudices longissime aguntur minimeque sunt haud raro clarae, praecipue cum vetera documenta praeberi non possint.
- Scisne - rogat Adalbertus - quae res nunc maximi sit in Polonia pretii? Charta ante bellum mundanum fabricata, in qua scilicet scribendo facere denuo possis documenta vetera.
Adulteratio documentorum, ut explanat Adalbertus, spectat praesertim ad aedes olim possessas ab Iudaeis, qui maxima e parte necati sunt annis 1942-43 a Hitlerianis (interdum cum spontanea collaboratione nostratum), saepissime sine ullo mortis vestigio in documentis relicto. Adulteratores tamen se ut transactores holocausti sospitum hodie peregre viventium agere asseverant monstrantque documenta, quibus potestas agendi ab ipsis Iudaeis sibi data firmetur - talia, inquit Adalbertus, facilius in Argentina pecunia non tam magna obtinere potes. Nemo scit, quot aedes habitaculave a talibus "Iudaeis" cum successu reperta sunt; agi hic potest de miliardis dolariorum. Crimen coram monstratum est, cum aliquis diurnarius animadverterit "Iudaeum", qui per transactorem restitutionem rei familiaris sibi petivt, debere esse virum 140 annos natum. Cuius facti, id est Matuzalemicae aetatis nonnullorum, qui rem familiarem sibi reposcebant, iudices documenta legentes multis in casibus certiores erant. Sed tacebant, simulantes se nihil mali animadvertisse - sine dubio donis sibi largiter a transactoribus datis.  

poniedziałek, 8 sierpnia 2016

De elephantibus

Symbolam legi Emmanuelis Martin ad sortem elephantium ac rhinocerotum Africanorum spectantem, quae animalia multis in locis crudeliter necantur propter ebur (elephantis) et cornu (rhinocerotis). Res tamen non est tam simplex ut prima facie esse videatur, ut patet e facto quod solae regiones Africae ubi numerus harum bestiarum ultima quattuor decennia creverit, esse civitates Africae Meridionalis (Respublica Austroafricana, Zimbabwe, Namibia), ubi venari (modice) elephantos licet; minime autem crevit - saepe immo valde decrevit - eodem tempore numerus elephantium in terris, ubi venatio omnino prohibetur (ut Kenia).
In terris enim Austroafricanis greges elephantium rhinocerotumque localibus tribubus in possessionem a regiminibus dati sunt; ipsi ergo incolae curent, ut grex - qui fontem pecuniae ipsis praebet - quam melius se habeat. Ceterum, cornu - quod, ut substantia e ceratina facta, recrescit, sicut ungues -  rhinoceroti chemice sopito partim desecari sine magno animali damno posse. Cum ebore res est difficilior, sed imprimis e naturaliter mortuis elephantibus ebur colligitur - in supradictis sc. civitatibus Africae Meridionalis; deinde venari licet debiliora animalia (quasi ecologice); in locis autem, ubi numerus elephantium supra modum crescat, venatio crebrior interdum permittitur (fontem hunc pecuniae esse permagnum: pro uno lege necato elephante obtinent locales 25 milia dolariorum).  

Frigora aestivalia

I. Non memini tam frigidi mensis Augusti! Noctu, antequam somno rapiar, totus tremo (uxor instat, ut fenestra aperta maneant - si umquam veneno eam interficiam, ob hanc verisimiliter causam); interdiu, plena in luce, ossium in medullis "dolores" sentio. Fortasse, puto, non cum Augusto sed mecum difficultas? Senectus adoritur... Memor quoque esse debeo facti quod hic annus primus est cum omnino nihil alcoholis bibam.
II. Abchasicae linguae paululum studere iam diu volui, ut sciam, quomodo polysyntheticus sermo se "habeat", sed cum didici eos ipsos (Abchasos) nescire quot vocales habeant - opiniones dissentiunt inter... unam et sex - timore captus sum me numquam ordinem in hoc chao inventurum. Fortasse Vasconicae potius studeam, vetustissimae Europae linguarum?    

niedziela, 7 sierpnia 2016

"Venus pelleata"...

... esset, mea sententia, optimus titulus comoediae Aristophanis [Graecam formam, ignoscite, fingere non valeo], non necesse de masochismo loquentis. Nomen tamen videtur esse inventum demum a Leopoldo de Sacher-Masoch, viro tantopere scriptori Brunoni Schulz grato [qui, sua vice, mihi valde gratus]. Cuius [i.e. Sacher-Masochis] verba e "Venere pelleata" sumpta, paululum a me redacta/mutata, hic citare velim:
Femina... est viro hostis: fit aut eius servum aut dominum, numquam tamen amicum. 
Ceterum, caelum Varsoviae hodie serenum, nonnullis nubibus cumulis praetervolantibus Solem (ergo verisimiliter non pluet). Caffea, coniecto parapsychice, in capona mihi vicina "Relax" datur Aethiopica.
Bonum diem, lector care, habe!

sobota, 6 sierpnia 2016

Fabula vera Robinsonis Cruzoe

Omnes nos, puto, fabulam Danielis Defoe ut pueri legimus, non omnes autem scimus verum Robinsonem, i.e. nautam-piratam Caledonicum Alexandrum Selkirk, anno 1704 relictum esse in insula solitaria Más a Tierra (400 miliaribus a litore Chiliano) – ubi deinde quattuor annos solus degebat – ob ipsius voluntatem! Tantopere enim Selkirk diffidebat navi Cinque Ports* ("Quinque Portus"), qua vehebatur, praesertim postquam in pugna cum Hispanis navis haec graviter vulnerata est. At... recte fecit, nam mox Cinque Ports mersa est, solo praefecto navis ac septem nautis sospitibus, quos in mari fluitantes Hispani servaverunt ac statim in carcerem miserunt.
Ita saltem docet Nic Compton in libro c.t. Cur nautae natare nesciant et alia miscellanea maritima ("Why Sailors Can't Swim. And other marvellous maritime curiosities").

*Cinque Ports erat saeculo XI et post nomen coetūs commercialis quinque portuum Anglicorum ad Fretum Gallicum spectantium. 

Ex libris: cavete in portubus!

Casu enchiridion nautarum legens c.t. "Motus navis in portu ab initio explanati" (Hafenmanoever. Schritt fuer Schritt.) auctoribus Lars Bolle & Klaus Andrews, inveni hanc sententiam: Propter maiorem maioremque luxuriam epibatarum unoquoque decennio omnis in summa intermedia navis voluptaria (=chartered yacht) fit uno metro longior. Cum eodem tempore dimensiones portuum manent immutatae (i.e. non crescunt), inde patet locum ad motus navi in portu exercendos fit paulatim minorem.
Mirum in modum, eadem regula non valet, mea saltem sententia, ad autoraedas per vias nostras currentes - autocineta nostra maiora non fiunt (nisi fortasse in America). Uxor mea, quae est omnium rerum perita, explanat id phaenomenon ita: Autocineto uteris, inquit, spatio dicamus unius horae cum triginta minutis per diem, officium scilicet aut scholam aut domum aut pantopolium petendo; in navi autem vivere continuo debes spatio unius septimanae (nisi longius), omnes activitates cotidianas ad vitam sustentandam perficiendo.
Deus mihi dedit uxorem omniscientem! Quid si Arabs essem ac duas tales (aut tres, aut quattuor) haberem?    

Nuntii "Iconoclastae" +/- ultimae praeteritae septimanae

Duces Persarum prohibuerunt Pokemon Go ludere in Irania.

Secundum novissimam demoscopiam stationis televisificae CBS, candidata Democratarum in munus praesidis USA Hilaria Clinton grata est 46% civium, candidatus autem Republicanorum Donaldus Trump - 39%.

Flammis rapto aerostato super Texiam fluitante 16 peregrinatores vitam amiserunt.

Coniuratione militum a regimine praesidis Erdogan cohibita, in Turcia a vigilibus publicis apprehensi sunt 18 milia hominum, quorum 9.677 in vincula dati sunt. 50 milibus non licet patriam relinquere.

Papa Franciscus Poloniam advenit ad conventum cum iuventute mundi Cracoviae necnon ergastulum Auschwitz-Birkenau visendum.

Cultro armatus Iapo occidit 19 homines & 26 vulneravit in nosocomio debilium praefecturae Kanagawa.


Donald Trump, candidatus factionis Republicanorum ad munus praesidis USA, possu 1-7% vincit super candidatricem Democratarum Hilariam Clinton in demoscopiis. Periti monent tamen praestantia Trump effectum esse posse primum finiti conventus Republicanorum (Democratarum autem conventus modo habitus nondum effecisse civium opiniones putatut).

piątek, 5 sierpnia 2016

Archaeologia memoriae (correctio)

Scripsi:
At volo longissime vivere. Tam longe saltem ut videam omnes mihi odiosos ante me mortuos. Deo gratias, maxima eorum pars sunt maiores me natu...
Sed oblitus sum unius "uxorum", novem annos me minoris natu. Fumat tamen (sc. nicotiana*) ut machina vaporaria, spes ergo est eam non longe victuram. Quod et mundo et ipsi erit melius.
* nicotianum videatur optimum nomen esse pro Anglico cigarette, nisi dominus Linnaeus voce nicotiana (f. sing.) usus iam est ad genera plantarum nuncupanda, quae substantiam nicotianam producunt: Nicotiana tabacum[sic!], Nicotiana silvestris, Nicotiana tomentosiformis. Omnia haec originem trahere putantur a domino Jean Nicot (c. 1530-1600), legato Gallico ad regem Lusitanorum, qui hanc substantiam primum chemice obtinuerit.

czwartek, 4 sierpnia 2016

Theorema generationis X et Y (porro)

Aetate fortasse specto ad generationem X (assidue laborantium), sed re vera potius "filius Fortunae" fui. Haec sunt argumenta: 1) nullo modo examen maturitatis (in Polonia res maximi momenti) superassem, nisi eo tempore (a. 1984) ministerium educationis subito decrevisset discipulos "lycaeorum humanisticorum" non cruciandos in ea examinatione arte mathematica [quod iussum - ad formationem societatis sine dubio stupidissimum - revocatum esse nonnullis annis postea]; 2) tempore maximae inopiae mercium in Polonia crisi oeconomico-systemica correpta (1980-81), cum nihil cibi in tabernis emi potuit praeter panem, acetum et holera, fautor vegetarianismi fui; 3) tempore belli domestici (1981-83), cum nonnulli mei amici in motu clandestino actuosi carcere a regimine communistico puniebantur, ego idea Gandhismi captus loco luctae amorem hostis collegis praedicabam [eheu, heros nationalis eo modo factus non sum]. Insuper, proxime praeterito anno in Mari Aegaeo, tempore maximae in vita mea procellae marinae, ebriosissimus in diaeta navis dormivi, ne singulum quidem venti ictum sentiens.
Ita pergo, magis exemplo Sisyphi quam monachorum benedictinorum ductus. Num post mortem opus quoque Sisyphi mihi erit patiendum?      

Theorema generationis X et Y

Quod nuper in symbola viri periti de societate Iaponiae Sinarumve scribentis legi [ambas sc. cito senescere atque in dies maiori segnitia laborare, vide scriptum diei 26 Iul. "De civitatibus senescentibus"], nunc modo inveni ut theorema generale generationis X et Y. Ita, generationem X esse generationem assidue laborantium ad opes familiares quam plurimas sibi comparandas [ut in Iaponia decennis 50-, 60- et 70-is aut apud Seres usque nuper], generationem Y tamen, id est filios parentium generationis X, in labore pigerrimos, ad ipsorum filios procreandis numquam paratos, in sempiternum apud parentes habitantes etc.

Quod theorema etiam spectare dicitur ad Poloniam post-communisticam. Ex quo theoremate pateat me, pigerrimam rerum, ad generationem X (laboriosorum) pertinere. Di boni!

środa, 3 sierpnia 2016

De gente Pirahã (porro)

De gente Pirahã dicunt quoque eos nullum sensum "historiae", id est temporis lapsūs habere. Ita, ne sui proavorum quidem, nisi etiam avorum, memoriam teneant. Periucunda videtur mihi fabella de sacerdote-missionario catholico apud eos primum bene recepto, deinde ab iratis expulso, cum scilicet confessus sit se numquam Iesum Christum in persona convenisse. 

Pirahã ipsorum lingua nuncupantur  Híaitíihí, id est 'recti, simplices'; alienigenae autem sint 'curvi'.

Archaeologia memoriae sive nugae cotidianae

Cum diuturna ebrietate olim saepe laborarem, ob tremorem manuum stilo scribere vix interdum quivi*. At hic et illic debes (ex. gr. in officina cursuali) manu aliquas res scribere, documenta firmare etc. Ter aut quater necesse mihi erat alios rogare, ut pro me scriberent, quod iis dictitarem – semel ita rogavi rectorem instituti ubi munus mihi erat, eodem facto certiorem eum faciens morbi mei. Maxime autem difficiles scriptu erant, ut memini, numeri '4' et' 5'.
* Me sapientior (quod ceterum non tam difficile) amicus-alcoholicus monebat: Semper cibum copiosum tempore bibendi sumas! Sed non semper monito parui.
xxx xxx
Cotidie conor aliquid facere mihi ipsi inopinatum. Neque iisdem semitis cotidie ambulare. Neque iisdem locis - sinibus ex. gr. braccarum vestiumque – pecuniam, documenta personalia ac clavem habitaculi teneri. Timeo assiduitatem, nam redolet senectutem mortemque. At volo longissime vivere. Tam longe saltem ut videam omnes mihi odiosos ante me mortuos. Deo gratias, maxima eorum pars sunt maiores me natu, ergo probabilitate statistica fieri posse ut eos mortuos videam. Sed probabilitas statistica una re est, consilia Parcarum alia.
xxx xxx
Eadem mente – i.e. timore senectutis – ductus ante circiter 10 abhinc annos, ergo aetate 40 annorum, didici "sine oculis adhibitis" computatro scribere. Qui mos inter mihi coaetaneos rarissimus est – nonnulli amici mei diurnarii duobus tantum digitis scribunt. Ceterum non erat haec res tam difficilis. Sed postea omnino frustra conatus sum arte potiri manu sinistra scribere (ut ambidexter fiam). Neque quantitatem syllabarum Latinarum ediscere umquam valui. Lingua Arabica (ceterum perpulchra!), cui praeterito anno studebam, quoque multo difficilius in cerebrum perveniebat, quam exspectarem. Nimis senex iam mens, odit assiduum laborem.

wtorek, 2 sierpnia 2016

Professio paradisiaca

Amasne itinerari ac cervisiam simul tempore itineris bibere? Si ita, munus apud Institutum Smithsonianum tibi fortasse adest, salario annuali 64.650 dolariorum [non vero multum, sed...]. Institutum enim hominem quaerit qui spatio trium annorum omnes regiones USA adeat, ubique cervisiam localem copiose bibens (omnia expensa itinerandi ac bibendi certe Smithsonian pro te solvet, opibus fultum Americanae Societatis Bracinatorum*). Sola obligatio - praeter ubique bibere - erit tibi opus studiosum scribere de cervisiis localibus ut parte cultus civilis Americanorum. Ut id munus accipias, debes gradum magistri et historiae et mercaturae possidere.
*American Brewers Association

poniedziałek, 1 sierpnia 2016

De puellis cum multo se natu maioribus viris "rem" habere cupientibus

Tales olim noveram - pro dolor, non tam prope quam fieri potuisset - tres et nunc de quarta audio: A., filia amicorum meorum, ipsaque bona mea amica (tam bona, ut de sui cordis problematis interdum mihi per interrete narret). Semper habuit amatores 10-15 annos natu se maiores. Et ne dico hic de "rebus momentaneis", sed de duobus tribusve conatibus una cum viro vivere. Parentes ei libertatem magnam (fortasse nimis?) in hac disciplina dederunt, nunc autem paululum stomachantur, nam novum "puerum" sibi filia invenit se seniorem... 27 annis, uno sc. anno maiorem patre puellae!
Putabam tales in pueritia filias fuisse habentes nullum aut parvum contactum cum sui (naturali) patre. Sed non esse id 100% verum, nam supradicta A. cum patre - quoad scio - optimam relationem habuit habetque (cum matre autem interdum rixatur; parentess adhuc una vivunt - quod rarissimum Varsoviae est - invicem se valde amantes).
Unde ergo insania Lolitarum? Si Freud bonam explanationem non praebet, fortasse praebebit Hellinger? Fortasse in vita alicuius  maiorum harum puellarum res originem habet? Sed haec mea est "thesis", seu potius rogatiuncula. Hellinger ipse de his rebus - deinde: quoad scio - nil dixit ac amicae meae veteri, quae apud eum queri conaretur de "amore impossibili", respondit curte: Amorem non esse morbum ("Love is not a disease").

Num re vera nos Poloni antisemitismum cum lacte matris bibimus?

De hac re semper me rogo, cum in aedibus quibusdam inveniam manu facta scripta parietalia (graffiti), a fautoribus localis gregis pedifolii relicta & dicentia alius urbis gregem (ergo hostem maximum gregis huius urbis) esse aut CANES aut IUDAEOS, saepe cum adiecitvis aliisve verbis contumeliosis. Qua re fit, meipsum tunc rogo, ut hi pueri, quorum ne avus aviaque quidem saepissime imagines Iudeaorum vivorum memoria tenet, tanto odio insaniant in gentem, de qua nihil prorsunt sciant?
Ceterum scire velim, utrum talia scripta facile inveniantur in aliis terris, ubi olim magna pars Iudaeorum habitabat, ut Dacoromania aut Lithuania. Dubito.
At amicus meus, quocum una lycaeum catholicum Varsoviense (nomine sancti Augustini) ut pueri petebamus, mihi nuper dixit se tempore iurgii maximi cum uxore (nunc iam divorti sunt) in eam, omnino inopinate, exclamasse:
- Scortum Iudaicum! (Ty kurwo żydowska!)
- Hem... Estne illa Iudaea? - rogavi.
- Minime, lutherana - confessus est amicus. Explanans, "scortum Iudaicum" quasi sua sponte, contra voluntatem eius, e pectore faucibusque profectum esse...
- Nam aliter... philosemita sum - addidit.