Maximi ergodotae mundi

Multi putant ferroviam Indicam maximum ergodotam, id est operariorum conductorem, in toto orbe terrarum, sed... non est verum. Secundum modo divulgatum indicem World Economic Forum, maximum in mundo numerum operariorum habet US-Americanum Departamentum Defensionis – 3,2 miliones. Alterum in indice – cum 2,3 mln operariorum, sive rectius: militum – esse exercitum Sinensem, tertiam (2,1 mln) mercaturam Walmart. Quartum locum tenent cauponae MacDonaldiane (1,9 mln), quintum – ministerium sanitatis Britannorum (1,7 mln), sextum societas petrolearia Serica nomine Anglico nota China National Petroleum Corporation (1,6 mln). Deinde in indice esse alteram societatem Sinicam – Statale Systema Retis Energeticae (1,5 mln). Octavam copiam operariorum habet supradicta Ferrovia Indica, nonam exercitus huius terrae (1,3 mln militum). In fine decadis manet Formosana (Taiwanica) negotiatio Hon Hai (nota saepius nomine Foxconn), quae instrumenta electronica fabricatur et tenet 1,2 operariorum. 

De arte (linguistica) amandi apud Romanos et Slavos

In cyberdiario meo Polono (http://burdubasta.blogspot.com/) de differentia inter amare et diligere apud Romanos scripsi, licet ipse parum de his rebus scirem.

Nihilominus, adduxi duo exempla "non-hormontalis" usūs verbi amare: amabo te necnon Horatianum amat ianua limen.

Ceterum apud Slavos etymologice res multum incerta manet. Nam Polonorum 'amare' esse kochać, Ucrainorum šanuvaty, Russorum ljubit', Serbo-Croatarum (qui non porro exstant, licet eadem fere linqua adhuc utantur) voliti, Bohemorum milovat; sole clarius patet haec omnia ad varias cerebri regiones pertinere. Inde conclusio amorem (etymologice saltem apud Slavos) deesse.

Nuntii Iconoclastae plus minusve praeteritae septimanae

Tigris, qui e horto zoologico tempore illuviei evaserat et a tribus diebus per loca urbis capitalis Georgiae, Tbilisi, ambulat, hominem necavit – nuntiat ministerium rerum internarum Georgiae. Venari tigridem-homicidam conantur milites dilecti Georgienses.

Amstelodamie mox structum iri pontem chalybdaeum ambulantibus, omnino factum ope technologiae impressionis tridimensionalis (3D) – nuntiat societas aedificatoria MX3D, quae in ambabus ripis fluminis Amstelodamiensis duas machinas "imprimatorias" struet, quae producant dimidias partes pontis, in medio super flumine iungendas. Architectoris-pontis designatoris nomen esse Joris Laarman.

Londinum revocat speculatores agenturae MI6 e nonnullis terris, postquam "Sunday Times" nuntiaverat Russos et Sinenses notas arcanas Americanorum et Britannorum "frangere" scire, ergo posse legere documenta secreta regiminum occidentalium, quorum 1,7 miliones Eduardus Snowden anno 2013 diurnariis praebuit. Ab eodem tempore Snowden in asylo in quodam ignoto loco in Russia degit.

Eluvie inopinata, propter pluvia creberrima, laborat urbs caput Georgiae, Tbilisi, ubi nonnulli homines vitam amiserunt ac multi sine tecto remanent. Unda saevientis fluminis Vere destruxit hortum zoologicum – bestiae ut ursi, tigrides, leones, hippopotami, crocidilli et lupi per vias urbis ambulare nuntiantur.

Argentaria publica Zimbabwensis decrevit se non porro imprimaturam nummum nationalem – dolarium Zimbabwense – propter hyperinflationem, quae solo mense Novembri anni 2008 attigit passum 79,6 miliardorum centesimarum! Moneta officialis Zimbabwe abhinc fiet dolarium USA, quod nunc emi potest 35 bilionibus (35.000.000.000.000.000) dolariorum Zimbabwensium pro uno dolario US-Americano, nuntiat agentura Reuteriana. Multi putant rem fiscalem Zimbabwe pessum isse annos nonagenarios praeteriti saeculi, cum, mox postquam Zimbabwe (antea colonia Britannorum Rhodesia) sui iuris civitas facta erat, latifundia a possessoribus albis confiscare coepit. Tunc oeconomia huius terrae – quae ceterum permulta bona naturalia, ut platinum, adamantes, aurum, chromium, possidet – labi coepisse putatur et hodie 95% civium sine labore remanent (productum nationale annuale per caput aequat 600 USD). Anno 2009 incolae Zimbabwenses coperunt de more uti, potius quam ipsorum nummo, dolaribus USA aut randis Austroafricanorum.

Curia inferior (Camera Plebis) parlamenti Britannorum decrevit – proportione suffragiorum 544 contra 53 –plebis scitum habitum iri de exitu Britanniae ex Unione Europaea. Contra motum delegati imprimis Scotici sententiam tulerunt. Propositum approbari porro debet in curia superiori (Camera Dominorum) et a regina, sed rebus ita ut hodie stantibus iam pro certo haberi potest plebis scitum anno 2016 vel 2017 fore.

In Helvetia a biocolytis apprehensus est Naser Orić, qui tempore belli civilis in Bosnia &Hercegovina (1992-95), dux erat Musulmanorum in urbe-inclavi Srebrenica contra aggressores Serbas pugnantium. Licet Srebrenica nota sit imprimis caede 7 milium virorum et puerorum Musulmanorum, secundum Tribunal Hagense Orić quoque reum esse caedis nonnullorum hominum civilium (Serbarum), patratae in vico Zalazje anno 1992.

Mortuus est eques Christopher Lee, histrio Britannus, notus partibus "monstrorum", ut Draculae ("Horror Draculae"), Scaramangae ("Vir pistolio aureo armatus"), magi Saruman ("Dominus anulorum") necnon comitis Dooku ("Bella stellaria"). Partes egit in pelliculis plus quam 300 personarum, nemo alius histrio aliquid simile adhuc fecerat.

Mirum in modum evanuit in aeriportu Bagdadensi cadaver Tarik Aziz, olim, tempore dictaturae Saddam Husain, ministri rerum extranearum Iraquiae. Post cladem Husain anno 2003 Aziz se in manus Americanorum dedit et abhinc praesertim in carcere mansit. Mortuus est ob "causis naturalibus" in nosocomio. Sepeliendus erat in urbe Amman capitali Iordanorum.

De Bilderbergianis addendum

Breviter intuitus sum indicem participantium conventuum annorum 2014 et 2013 - res est eadem: solum Americani Septentrionales necnon Europei (cum Turchis), unus, ni fallor, tantum Australianus. Fortasse grex imprimis ad socios NATOenses spectat necnon alios (ut Australia) satellites USAe?

De Bilderbergianis, qui mundum regant

Praeteritis tribus diebus in Austriaco oppido Telfs-Buchen prope Aenipontem (Innsbruck) congressi sunt 140 viri politici (sed potius alterius aut tertius in hierarchia ordinis, nemo ex.gr. praeses terrae, qui hodie in munere adsit), repraesentatores organizationum internationalium necon negotiatiores magni momenti (ut praesides societatum: Axa, Ryanair, Goldman Sachs, Airbus) e 22 terris oriundi, ut, officialiter saltem, de dialogo inter Europa et America Septentrionali disputent. Quod re vera erat 63. annuale conventum Gregis Bilderberg, quem multi accusant coniurationem esse ad "mundum globalizatum" a se suique pecunia regendum.

Primum grex ille convenit anno 1954 in deversorio Bilderberg urbis Batavicae Oosterbeek; inde nomen. Societatem condidit tunc maritus reginae Batavorum Julianae, Bernhardus (pater hodiernae reginae Beatricis), ut iunctio inter Europam Occidentalem et USA firmiorem fieret. De facto tamen "machinatorem", qui gregem effecisset, fuisse politicum parum notum Polonum (ab anno 1939 in Britannia viventem) Josephum Retinger (qui usque mortem a. 1960 munere secretarii gregis fungebatur). [De hoc homine mysterioso fortasse mox scribam, nam etiam nonnullam "scientiam privatam" de eo possideo.]

Secundum ossores Bilderbergianorum, vera themata hornotini conventi sint (inter alia):

1. Isolatio diplomatica Russiae, propter aggressionem huius terrae contra Ucrainam.

2. Auxilia Hillariae Clinton danda, ut anno 2016 nova praeses USAe fiat.

3. Studia ad pecuniam praesentem renuntiandam, nummum electronicum in orbe terrarum adoptandum, necnon ad limitatiorum usum metallorum pretiosorum (ut mercatus derivativorum porro crescat).

4. Conamen criminari Britannos proponentes plebis scitu decernere, ut Britannia relinquat Unionem Europaeam.

5. Adoptatio Amicititiae Transpacificae (TPP), ut novae pilae "regiminis mundani".

6. Destructio oeconomiae Sinarum et ceterarum terrarum gregis BRIC (i.e. Brasiliae, Russiae, Indiae), quae periculo sint systemati "ordinis unipolaris".

7. Propagatio intelligentiae artificialis necnon aliorum systematum custodiae "Fratris Maioris".

8. Instrumenta ad alteram crisin fiscalem respondendi elaboranda, ut status belli civilis a regiminibus declarandus.  

De indice participantium – inter quos adhuc imprimis repraesentatores orbis occidentalis fuerunt - patere videatur Gregem Bilderberg iam Turchiam ut membrum UE tractare, nam sat multos (7) politicos Turchos conventui hornotino adesse (etiam si unus eorum, dominus Üzümcü, de facto repraesentet societatem internationalem). Ceterum maximum inter gentes numerum conventui adesse: US-Americanos (33, inter quos olim maximi momenti Kissinger, Zelig, Petraeus), Britannos (12), Gallos (10), Germanos (8), Italos (5), Canadianos (5), Graecos (3 – sine dubio, propter res turbatas huius terrae oeconomiae); unus tantum participator Russus advenit. Grex Bilderbergianus remanet ergo forum "alborum" Americanorum et Europaeorum (ita fortasse ob officiale thema hornotini conventūs necnon originalem "missioniem" principis Bernhardi); nemo advenit e terris Asiae (licet adesset Gallus peritus rerum Arabicarum, Gilles Kepel, et US-Americanus John Allen, qui de nomine Vasintonensium bellum contra Civitatem Islamicam gerit), Americae Latinae, Africae vel Australiae/Oceaniae. Nullo modo ita dici possit eos "veram faciem" globalizationis esse. Iam potius crederem coniurationem Christiano-Iudaeam, nisi... Turchi conventui adessent. 

Ad Vinnetuum addendum

Multi lectores epistulis rogaverunt Karl May de origine nominis ducis Apasiorum - ni fallor, in quodam libro Vinnetuano (nam adsunt tredecim: Vinnetuus I, Vinnetuus II, Filius Ursipetae sive Old Shatterhand, Phantom de Llano Estacado, Thesaurus Lacus Argentei, Mustang niger, Rex petrolei, Vallis mortis, Nativitas, Old Surehand, Satana et Iuda, Vinnetuus III, Heredes Vinnetui) mentionem fecit May nomen 'winnetou' significare aquam flagrantem (non aquam ardentem, id est temetum ut whisky, brandy etc., sed veram aquam – fluminis, lacus - quae flagrat).

Sed postea confessus est scriptor se id nomen mente invenisse.

Nuntii Iconoclastae praeteritae (plus minusve) septimanae

In electionibus modo habitis islamistica Factio Iustitiae et Progressūs (AKP) praesidis Turchiae Recep Tayyip Erdogan 40,7% suffragiorum cepit, multo minus ergo quam occasione trium praeteritarum electionum. Sperabat autem AKP maiorem partem in parlamento sellarum a se captum iri, ut constitutionem terrae mutaret, sc. Turchiam in rem publicam musulmanicam a praeside autocratico rectam mutando. Omnes tres ceterae partes novi parlamenti – democratae sociales, nationalistae, factio Curdarum – officialiter dicunt se nolle cum AKP collaborare, ut coalitionem et regimen faciant; periti rerum Turcharum putant tamen nationalistas post tempus quoddam id facturos. Victor inopinatus ("equus niger") electionum sunt Curdae, quorum factio HDP 13,1% sellarum nunc tenet, adhuc enim tantum 5,7%.

Tempore summitatis gregis G7 in castello Elmau Bavarorum habitae, praesides regiminum Germaniae – Angela Merkel – et USA – Barack Obama – consensi sunt sanctiones contra Russiam, propter huius terrae incursum in Ucrainam, porro pergendas fore. Ipsa Russia summitati non adest – adhuc Muscovitae solebant similibus conventibus adesse ut "hospes-observatrix".

Fundus Monetalis Internationalis (IMF) decrevit prognosin hornotini incrementi oeconomiae USA ex (adhuc aestimatis) 3,1 in 2,5 centesimas. Anno 2016 maxima oeconomia mundi cretura putatur passu 3%.

In flumine Jangtse Sinarum mersa est navis vectoria "Eastern Star". Plus quam 400 vectores timentur mortui esse. Secundum praefectum navis, qui vitam servavit, in navem subito incidisse ventum turbinosum. 

Sepp Blatter, denuo electus in munus praesidis Internationalis Foederationis Pedifolii (FIFA), inopinate munere hoc se abdicavit. Incertum esse utrum rebus ita stantibus campionatus mundi habendae sint anno 2018 in Russia et 2022 in Cataria.

Prostitutio facinus illegale facta est in Hibernia (Irlandia) Boreali. Qui Venerem ibi pecuniā quaerunt, multā mille librarum necnon carcere usque unum annum sunt abhinc puniendi.

Primum post memoriam gentium, praeterito die Iovis in bursa Sinensi (Shanghai+Shenzhen) plures tituli a negotiatoribus empti sunt quam Neoeboraci (NYSE). In foris Sinensibus enim tituli summā 380 miliardorum dolariorum venum iverunt, dum in USA tantum 229 mld $. Periti monent tamen hoc fieri posse "phaenomen temporale", nam capitalisatio bursarum Sinensium 63% minus pecuniosa est fora US-Americana. Optimismus negotiatorum regnat in Sinis ab initio huius anni – index SSE crevit hoc tempore 49% - licet data macroeconomica Serica non tam bona, quam prius fuerint, videantur. 

Sepp Blatter, quem multi putant reum corruptelae (inter alia, pecuniae magnae a Russis acceptae), denuo electus est in munus praesidis Internationalis Foederationis Pedifolii (FIFA). Rebus ita stantibus, Europaea Associatio Pedifolii (UEFA) de consiliis cogitat campionatui mundi anno 2018 habendo afore.

Praeses olim (2004-13) Georgiae, Micheil Saakashwili, nominatus est gubernator regionis Portūs Isrianorum (Odessae) in Ucraina. Simul donatus est Saakashvili, qui a mense Februario adiuvat praesidem Ucrainae Petrum Poroshenko, iure civitatis Ucrainensis.

Leonid Tibilov, qui, militibus Russis nitens, sibi nomen praesidis Ossetiae Meridionalis imposuit, declarivit sui terram velle adiungi Ossetiae Septentrionalis, quae pars est autonoma Russicae Foederationis. Ossetia Meridionalis de nomine regio est Georgiae, de facto ab incursu Russorum anni 2008 sub dicione Moscoviae manet.  

Ex libris: sues ventum vident!

Johnny [Cash] laborabat ingenti addictione amphetaminis et... cum re vera male se [propter harum usum] habebat, dicere solebat sues sola in orbe terrarum animalia esse, quae ventum conspicere possint.

Rick Bragg, Vita Jerry Lee Lewis ab ipso narrata (Jerry Lee Lewis: His Own Story)

Tecto carentes, qui non foetent

Agnes, amica mea, quae multos annos in Urbe Sancti Pauli (Sao Paulo) Brasilianorum degebat, dicit ibi omnes incolas plus minusve sui vita felices esse, risu pleno per vias spatiantes – praeter fortasse divites, qui, item felices, numquam fere autocineta relinquunt (e stabulo domūs suae recte in stabulum graphei aut stabulum pantopolii currentes). In numero felicum sint quoque – secundum Agnetem - pauperrimi tecto carentes, habitantes aut in casulis fortuitis in suburbiis (tuguriopolesin, vulgo favelas) aut sub Iove in viis mediae urbis. Corpora in scatebris fontaneis aut alio quodam loco lavant, vestimentis puris induuntur ac minime foetent. Hoc sine dubio mirissimum mihi videtur, qui cotidie fere per urbem meam laophoris aut traminibus viariis cum vehar, olfacere debeo nostrates "filios viarum", urinam excrementaque redolentes. 

Vinnetuus mortuus est!

In nosocomio sub-Lutetiensi pneumoniā mortuus est 86 annorum histrio Francogallus Pierre Brice (natus nomine Louis Le Bris), quem tota fere Europa meminit ex undecim pelliculis (a Germanis Occidentalibus inter annos 1962 et 1998 factis, dispositore scaenarum Harald Reinl), in quibus partem agebat Vinnetui (Winnetou), ducis Apasiorum Mescalero, gentis praeclarae Indianorum contra "facies albas" bella fortiter gerentium. Ita saltem nos, Europaei, relationes inter colonos US-Americanos et Indianos nobis pingimus, gratiā librorum scriptoris Germani Caroli (Karl) May (vixit 1842-1912), necnon gratiā ipsius Brice. Quis Europaeorum hodiernorum non audivit de iustissimi Vinnetuo, quis non admirabat amicos eius, rarissimos inter "albos" viros probos – Old Shatterhand et Old Surehand? Omnino autem ignoti remanent et Karl May et Winnetou in USA – nimirum: hi veros Apasios habent, nos tantum fabulas. Ceterum, scitu dignum esse loca Americana in pelliculis de Vinnetuo regiones ex-Iugoslaviae simulabant, praesertim Mons Niger – litus fiordicum (Adriaticum) Boka Kotorska ni fallor partem vallis Colorado agebat.   

Ipse Brice, anno 1929 natus, tempore alterius belli mundani in motu clandestino resistantiae Gallorum militabat, deinde in Legione Extranea, falsis documentis utens, in Algeria et Indosinis usque annum 1951 pugnabat.

Requiescas in terra venationis sempiternae, dux meae pueritiae!

Inaequalitas in distributione divitiarum crescit

Multum in Polonia nunc disputatur de professore Thoma Piketty, oeconomiae perito Gallo 44 annos nato, qui studet inaequalitati lucri inter varia strata hominum distributi. Modo in Polonicam translatus est 800 paginarum liber Piketty maximi momenti, inscriptus: Caput pecuniae saeculi XXI. Piketty monet inaequalitatem in distributione lucri crescere citius quam ipsum incrementum oeconomiae. Rebus ita stantibus, exspectare possumus tumultus sociales, id est motum pauperorum in locupletissimos impetum facentium.

Sententiis Pikettyanis perterriti sint oeconomiae periti maximi momenti in orbe terrarum. "Capite pecuniae..." a se perlecto, anno 2014 rectrix Internationalis Fundi Monetalis (IMF) Christine Lagarde Londini, tempore cuiusdam summitatis oeconomicae, dixit [aliquantulum, mea sententia, exaggerando] ad sui collegas: 85 locupletissimos homines mundi, qui omnes scilicet uno laophoro Londinensi vehi possint, divitias manu tenere maiores quam opes dimidiae (sc. pauperioris) partis incolarum Terrae. Ita porro fieri non potest! Consentire cum ea videtur ductrix argentariae statalis US-Americanorum (FED) Janet Yellen, quae citat Piketty docentem annos sexagenarios praeteriti saeculi unam centesimam (1%) locupletissimorum Americanorum habuisse 10% productūs domestici (GDP) USAe, dum hodie possident iidem 24% GDP.

Ut remedium, quod impediat, quin inaequalitas lucri porro crescat, Piketty proponit internationale vectigal applicans ad depositiones pecuniarum. Mihi sonat id nimis "sinistrorsum" – quasi omnium calamitatum rei sint viri divites. Sed non sum oeconomiae peritus. 

Oneirocritica Goldbergiana (2)

Hodie nonnulla somnia aliquantulum horrificantia:

Aedem societatis argentariae (tabernae bancariae) si vides, difficultatibus fiscalibus mox laborabis. Peius, si ipsum rectorem argentariae inspicias – decoctionem rei tuae time!

In caupona nocturna (thermopolio, biberna) sedes pocula nova a caupone poscens? Speras vitam meliorem fieri, sed non satis sui fidens es, ut res magnas agas.

Mulier, quae de phasiano somnit, in viris quaerit potius vim physicam quam intellectum.   

Biblia sacra in somnio visa significat "parvas voluptates" (teneres amores?). Si tamen contemnis in somnio verba Bibliae, subibis temptationi improbae, qua illicere te conatur unus amicorum.

Diarrhoea laboras? Unus tuorum mox morbo lethali afficietur.

Bigamia frueris, id est duas simul uxores habes? Impotentia sexuali laboras et sensim mente laberis (insanus fis).

Qui somnit unum consanguineorum episcopum factum esse, munus (labor) gravissimum ei erit perficiendum. Simul refrigescet et febri laborabit.