In nosocomio sub-Lutetiensi pneumoniā mortuus est 86
annorum histrio Francogallus Pierre Brice (natus nomine Louis Le Bris), quem
tota fere Europa meminit ex undecim pelliculis (a Germanis Occidentalibus inter
annos 1962 et 1998 factis, dispositore scaenarum Harald Reinl), in quibus partem
agebat Vinnetui (Winnetou), ducis
Apasiorum Mescalero, gentis praeclarae Indianorum contra "facies
albas" bella fortiter gerentium. Ita saltem nos, Europaei, relationes
inter colonos US-Americanos et Indianos nobis pingimus, gratiā librorum
scriptoris Germani Caroli (Karl) May
(vixit 1842-1912), necnon gratiā ipsius Brice. Quis Europaeorum hodiernorum non
audivit de iustissimi Vinnetuo, quis non admirabat amicos eius, rarissimos
inter "albos" viros probos – Old Shatterhand et Old Surehand? Omnino
autem ignoti remanent et Karl May et Winnetou in USA – nimirum: hi veros
Apasios habent, nos tantum fabulas. Ceterum, scitu dignum esse loca Americana
in pelliculis de Vinnetuo regiones ex-Iugoslaviae simulabant, praesertim Mons
Niger – litus fiordicum (Adriaticum) Boka Kotorska ni fallor partem vallis
Colorado agebat.
Ipse Brice, anno 1929 natus, tempore alterius belli
mundani in motu clandestino resistantiae Gallorum militabat, deinde in Legione
Extranea, falsis documentis utens, in Algeria et Indosinis usque annum 1951 pugnabat.
Requiescas in terra venationis sempiternae, dux meae pueritiae!
Doleo propter histrionem mortuum… sed confiteor, ut dixisti, me numquam audivisse de Vinnetu nisi per Europaeos.
OdpowiedzUsuńQuoad sciam, Carolus May satis caute investigabat vitam moresque Indianorum atque ipse per Fera Occidentalia Americae Septentrionalis non semel itinerabatur. Ergo fieri potest, ut et Indianos et "facies albas" recte in libris suis pinxerit.
OdpowiedzUsuńMagis miror tamen arte alius scriptoris - Francisci (Franz) Kafka - qui licet numquam regiones Americanas visitasset, librum "America" scripsit, in quo recte, mea saltem sententia, reddidit spiritum in USA XX. saeculo ineunte praevalentem.