Fabulae, quae ad theoriam coniurationis
mundanae spectant (ut olim Protocolla
senium peritorum montis Sion), sunt nobis odiosae, habemus eas pessimo sapore
esse, ethice horribiles etc. Sed... omnes fere eas interdum auscultamus, nam
adest nobis (mihi saltem) quaedam pars animae, quae mundum multo horribiliorem,
quam iam sit, sibi pingere velit (eodem instinctu ductos cinemata catastrophica
spectare multos nostrum iuvat). Huius generis duas fabulas
"coniurativas" modo audivi:
- exodum Syriorum in Europam adiutam,
necnon magna e parte ab initio machinatam, esse ab regimine USA, quod regimen speraret
se hoc modo Unionem Europaeam ut sui aemulatorem (oeconomicum, politicum) debiliorem
reddere; fons rumoris: M., psychotherapeuta
- Civitatem Islamicam creatam esse
machinationibus speculatorum US-Americanorum et Israelianorum, qui cuperent
mundum islamicum tam odiosum populis regiminibusque terrarum occidentalium
fieri, ut hi probarent usum "instrumentorum specialium", ut exempli
gratia necem etiam permagni numeri incolarum, si hoc modo terroristae nonnulli interficerentur;
metam Israelianorum hic quoque esse Arabes e regionibus sibi proximis (Autonomia
Palaestina et Syria) expellere, ut has regiones sui civitati adiungerent; fons rumoris: A., negotiator industriae
poligraphicae, qui linguae Arabicae rebusque islamicis studet
Ex his coniecturis illa quidem falsa videtur (nam Americani nullo modo debiliorem volunt Europam reddi, praecipue cum Europa possit Russorum audaciam refrenare), haec autem nonnihil veritatis in se continere. Speculatores nostri apud nos feruntur non minimam partem egisse in civitate Islamica fovenda, sed ob alias causas: primum, ut quibusdam regnis (ut ei Saudianorum) morigerentur; deinde, ut bellicosis factionibus armandis tyrannidem Assadianam (ut qui portum in mari interno situm Russis dederit) debilitent. Praecipue igitur animadvertenda haec videtur: primum quod et in Ucrainia, quae Crimeam habuit, et in Syria, quae alterum portum Russis obtulit, bella civilia geruntur; deinde quod et Turcae, qui Bosporum tenent, etiam contra Russos moventur.
OdpowiedzUsuń