Nuntii Iconoclastae plus minusve praeteritae septimanae

Quattuor fossores Sinenses servati sunt postquam per 36 dies sub terra in fodina gypsi provinciae Shandong propter calamitatem (motum terrae) degerant.

Iaponicus minister oeconomiae Akira Amari munere se abdicavit propter accusationes corruptelae. Amari, unus proximorum sociorum ministri primarii Shinzo Abe, accusatus est pecuniam clam accepisse e negotiatione aedificatoria pro mandatis aedes publicas struendi.

Miliardarius George Soros dixit oeconomiam Siniensem sine dubio calamitatem petere atque addidit seipsum nummum yuan arcere. Soros notus est suis transactionis efecisse anno 1992 debilitationem librae Britannorum necnon bhat Malaesiorum anno 1997.

Irania nuntiavit se velle importatoribus Europeis vendere petroleum pretio 17 dolariorum per dolium; qua re maxime dolebunt aliae terrae-exportatrices, praesertim Russia et Arabia Saudiana.

Iudices Britanni sententiam pronuntiaverunt praesidem Russiae Vladimirum Putin verisimillime iusisse anno 2006 speculatorem olim Russum Alexandrum Litvinenko veneno necatum Londinii iri.

Mortuus est 84 annos natus dispositor scaenarum Italus Ettore Scola.

Petroleum generis Brent minus quam 28 dolariis per dolium die Mercurii Londinii venum praebebatur. 

Scholia in Martialem

Hodie mane animo languido laborans aperui Martialis Librum de spectaculis (editionis Loeb) in eo loco, ubi eum ante duos plus minusve menses reliqueram, in initio sc. epigrammatis 86. Legi nonnullas paginas et legendo hilaritatem quadamtenus recuperavi. Tres quattuorve notatiunculas feci:

1) pastilli Cosmi (87: Ne gravis hesterno fragres, Fescennia, vino / pastillos Cosmi luxuriosa voras). Ergo aderant iam tunc pastilli ad halitum post vinum purificandum? Ex qua materie facti? Mihi noti sunt solum pastilli e foliolis petroselini, quibus ante viginti trigintave annos in Belorussia (Ruthenia Alba) autoraedarii utebantur postquam biberant, ne biocolytae temetum sentirent. Ego cum ipsis petroselini foliolis experimentum olim feci bono cum effectu: K. spiritum vini me basiando minime sensivit.

2) mentiturque virum prodigiosa Venus (90), id est, clitoris maximae magnitudinis pro membro virili habebatur. Item in lexico quoddam nominum Graecorum Latinorumque ad sexualitatem spectantium (edito in Germania saeculo XIX) olim legi, de puellis scilicet Syriacis clitoridibus tantae magnitudinis instructis, ut more virorum cum aliis puellis luderent [sed de puellis Syriacis permulti aderant mythi]. In notis meis erraticiis inveni quoque pro clitoridi nomina 'myrtos' et 'landica', sed sine fontibus. Secundum Douglas Harper (Online Etymology Dictionary), Matthaeum Renaldum Colombo (1516-59), auctorem tractatus "De re anatomica", nuncupasse clitoridin 'amor Veneris' aut 'dulcedo Veneris'.

3) conclusio epigrammatis 92: denique pedica, Mamuriane, satur, cum nota translatoris D. R. Shackleton Bailey: Fortasse quia insalubris talis pedicatio erat [sc. pedicatori] (Supposedly dangerous to health). Mea tamen sententia significationem esse hic omnino aliam: Aut dives, Mamuriane, fieri (et pro stupro solve?), aut, cum pauper sis, noli quaerere pueros. Haec significatio ex toto epigrammate mihi patere videtur.

De popinis... (responsum Eduardi)

Ita respondit Eduardus (spero eum non stomachaturum, quod cito epistulam):
Eduardus Stanislao et fautoribus cibi istius Filii Donaldi (non Trump sed illius cui est sannio nomine Ronaldo). s.d.:
Pro certo non scio, Stanislai. Fortasse natura tibi insita est valetudo robusta, tum fieri potest ut nondum senis sis quippe qui facilius convalescere soles ab iniuriis corporalibus omnigenus. Nuper (id est ante paucos annos) solummodo cuppedias perfectas (parfaits), gallinam gallinaceam embammate capsico condito (buffalo ranch mcchicken), scriblitam ex malis factam, et aquam a glacie algidam comedi. Suspicor solam hanc aquam esse rite castimonialem (kosher).
Quae quum ita sint, opto ut vos omnes bene cenent.
valete

De popinis insalubribus

Ad Gregem Latine Loquentium scripsit Eduardus Casey inter alia:

Ceterum, partim recte iudicat Aloisius de verbis Latinis novandis: Latine dicere debemus pro 'Coca Cola' cocacola et pro 'McDonalds' mcdonalds. Certe autem nobis quoque licet de potionibus saccharatis disserere necnon de talibus popinis ubi cibus insalubris venum datur.

Cui ego respondi:

Si in his popinis, Eduarde, cibus, ut scribis, insalubris venum datur, cur ego adhuc vivo? 

Nam saepissime adyta fastfoodiana peto. His septimanis maxime delector MacDonaldiano paniculo McRoyal, versio duplex, sapore acuto. Qui cibus, nisi saepius quam semel per diem sumptus, semper fere in orgasmum me adducit!  

De pseudo-Ciceroniana quadam dictione

Iam hic de pseudo-Tacitiano Frisia non cantat (sed bibit) scripsimus, quoque fortasse de dictione Iesu, quae re vera ullis evangeliis, modo "veris", modo "apocryphicis", testatur: Si quis in te lapidem, tu in eum panem remitte (in nonnullis regionibuis mundi, ut Polonia aut Indonesia, multi putant Iesum ita "aliquo in loco" dixisse).  

Certe audivi quoque de "brevissima epistula mundi", quasi Cicerone auctore scripta: I! (sc. imperativus verbi 'ire', respondendo ad item falsam quaestionem Attici: Oporteat mihi ire an non?). Hodie autem incucurri in totam quasi Ciceronianam sententiam: Mala tempora sunt. Liberi parentibus porro non parent at nemo est qui librum non scribat, quam amica mea, diurnaria Polona, cum versionem Anglicam legisset, putabat verissimam esse. In interreti inveni quoque aliquem nugatorem, qui fontem huius dicti dabat: tractatum Ciceronis "De pessimo genere oratorum".

Nuntii Iconoclastae plus minusve praeteritae septimanae

Saltem 21 homines vitam amiserunt ob ictus tromocraticos Talibanorum in tribum universitariam Pachistaniensis urbis Charsadda.

Tsai Ing-wen, fautrix sui iuris status Formosae (insulae Taiwan) comitiis facta est nova praeses huius terrae, superans praesidem Ma Ying-jeu factionis Kuomintang, qui proximitatem cum Sinis continentalibus petebat. Illa 44 % suffragiorum colligit, hic 26,9 %.

In fine mercatus die Veneris petroleum Londiniense generis Brent venundabatur 28,94 USD per dolium.

20 homines mortui sunt ob ictum tromocraticum in deversorium urbis capitalis Burkina Faso Wagadugu, patratum ab al-Kaidistis Maghrebi Islamici. 63 obsides liberati sunt a militibus regiminis, 33 horum sauciati in nosocomia adducti statim sunt.

Anno 2018 Sinae missurae sunt percontatrum cosmicum cum vehiculo ad invisibilem hemisphaeram Lunae explorandam – decrevit regimen Pechinense.

Agentura aestimatoria Standard & Poor's deminuit aestimationem Poloniae de nota "A-" in "BBB+", cum prospectu negativo, propter curas de sui iuris statu institutionum principalium civitatis. Agentura Fitch autem eodem tempore reliquit aestimationem Poloniae in adhuc valentibus notis "A-/A".

Carcinomate mortuus est 69 annorum Alan Rickman, populo gratus histrio Britannus, notus talibus partibus cinematographicis ut Hans Gruber in "Plaga vitrea" et prof. Severus Snape in fabulis Harrio-Potterianis.

Propter vilescens petroleum Britannica societas petrolearia BP dimissura est spatio duorum proximorum annorum quattuor milia operariorum. Dolium naphthae generis Brent die Martis 31 dolariis Londinii venum dabatur, quater minus quam anno 2014.

Mortuus est David Bowie, praeclarus musicus rockianus Britannus.

De nomine Canariorum

Permulta scripta sunt de etymologia nominis Insularum Fortunatarum, at praesertim maximae harum Insulae Canariae (hodierna Gran Canaria), quae dedit toti archipelago nomen Hispanicum (Islas Canarias). Plinius (6, 205) putabat id nomen a multitudine canum ingentis magnitudinis provenisse, sed nullae huius generis bestiae inventae sunt a Hispanis, qui saeculo XIV has insulas denuo (post lacunam a tempore Romanorum durantem) visitare coeperunt. Alii putant nomen a canibus marinis, id est quasi phocis, venisse (sed incertum esse quod apud Romanus ipse 'canis marinus' significaret, fortasse non phocam sed piscem mordacissimum ab Anglophonis hodie shark nuncupatum).

Plinium (5,15) tamen quoque nomine Canariorum nominasse gentem quandam verisimillime Berbericam in Mauretania habitantem: qui proximos inhabitent saltus, refertos elephantorum ferarumque et serpentium omni genere, Canarios appellari, quippe victum eius animalis promiscuum iis esse et dividua ferarum viscera. Sine dubio ergo, mea saltem sententia, utramque gentem, et continentalem et insularem, eiusdem geneticae farinae fuisse.

Caninam provenientiam nominis erroneam puto, potius credens Canarios Latine redditum corruptumque nomen fuisse quoddam Berbericum, quo aut ipsi se nominaverint, aut ita appellati sint a sibi vicinis.

Nugae de inauribus nautarum

Cur nautae inaurem auream in auricula laeva portant? At non omnes, sed hi imprimis, quibus contigit Promunturium Hornianum circumnavigare. In laeva auricula, nam Solem orientem – ut mos plerisque est – petentes, Promunturium a sui laeva navigando habebant.

Alii dicunt aurum in aure nautae pretium esse funeris inopinati: si quis cadaver nautae in oram undis missum inveniat ac de funere curet, inauri venum data pecuniam ad sepulturam solutam recuperabit. Aliam causam inaures a nautis portandi esse superstitionem has facultatem videndi adiuvare – quae res superstitio putatur, nisi animadvertamus in arte acupuncturae auriculis adesse punctum ad visionem spectans.

Talia dat in sui libro "Cur nautae natare nesciunt. Atque aliae mirandae curiositates maritimae (Why Sailors Can't Swim. And other marvellous maritime curiosities) Nic Compton.

Via (Venti)molinaria

Supra urbis meae Via Molinaria (Młynarska), photographemate anni 1916 capta. Tunc erat haec via potius suburbana quam urbana. Sine dubio nomen a ventimolinis, non a molinis fluviatilibus provenit.
Infra hodierna Młynarska, via tribus Wola, ubi saepius saepiusque societates forenses suas sedes condunt; Wola, olim patria plebis, ita fit tribus, ut Americani dicunt, "collaris albi".
Homines (imprimis mulieres) in photographemate ante centum annos capta, a laeva, versimiliter Poloni/Polonae sunt, licet proxime adesset tribus Iudaica necnon parvus "vicus" evangelicorum, origine Germanorum.

Nuntii Iconoclastae plus minusve praeteritae septimanae

In fine mercatus diei Veneris petroleum Brent vendebatur 33,55 USD per dolium.

A biocolytis Mexicanis apprehensus est infamosus "baro narcoticorum" Joaquin "El Chapo" Guzman. Abhinc ante sex menses Guzman e custodia effugit.

Petroleum generis Brent Londinii venundatur pretio minori quam 35 $ per dolium. Ita petroleum e fundo Maris Septentrionalis sumptum vilissimum esse praeteritorum 11 annorum.

Sicut die Lunae, etiam Iovis die post cladem indicis plus quam 7% stitus est mercatus titulorum in foris bursalibus Sinarum. Vilescit simul moneta Serica, yuan, nunc vilissima praeteritorum 5 annorum erga dollarium USA.

Ob solidaritatem cum Arabia Saudiana regimen Cuvaiti relationes diplomaticas cum Irania rupit.

Internationalis Unio Chimiae Purae Adhibitaeque agnovit reperta nuper a studiosis Russis, Americanis et Iaponicis quattuor nova elementa, numeris tabulae periodicae Mendeleievianae 113, 115, 117 et 118. Rebus ita stantibus septimus ordo tabulae (nunc 32 elementorum, una cum actinoidis) usque finem perfectus est.

Post cladem valoris 7% in prima sessione novi anni mercatus titulorum in foro Shanghaiensi et Shenzhensi Sinarum sistitur.

Commisarius UE Guenther Oettinger, qui curat oeconomiam digitalem necnon res sociales, proposuit, ut Polonia in custodiam directam Unionis daretur ob nimiam censuram diurnariorum. Mechanismus "custiodiae directae" numquam adhuc in historia UE adhibitus est.

Regimen Persarum vehementer reclamat suplicio in Arabia Saudiana sumpto praeclari sacerdotis siitarum Nimr al-Nimr. Qui erat unus 47 hominum in mortem a iudicibus Saudianis condemnatorum propter activitatem tromocraticam.

63-tabulatorum caeliscalpium Dubaiense – deversorium "The Address Downtown" – incendio captum est. Causam incendii fieri posse displosionem ignium festivorum.

Celebratio publica sollemnis novi anni Bruxellis hoc anno non fiet propter timorem tromocratiae, decreverunt magistratus. 

Petroleum Iraquiense iam in antiquitate notum...

... monstrat Plinius in II, 235: similis est natura naphthae. ita appellatur circa Babylonem et in Austacenis Parthiae profluens bituminis liquidi modo. huic magna cognatio ignium, transiliuntque in eam protinus undecumque visam.
Sed deerant tunc hominibus autocineta...

Eamus Lyncestas in Paphlagoniamve!

Apud Plinium enim lego (II, 230):
Lyncestis aqua quae vocatur acidula vini modo temulentos facit; item in Paphlagonia et in agro Caleno.
Seu Andros nobis petenda, sed tantum nonis Ianuariis (II, 231):
Andro in insula templo Liberi patris fontem nonis Ianuariis semper vini saporem fundere Mucianus ter consul credit.

Opinio Ludovici Wittgenstein ad linguam Esperanticam spectans

Bene notum esse odium "monstri Zamenhofiani" inter philologos classicos [deo gratia, neque ego philologus, nec osor cuiuslibet linguae, sit ipsa artificialis]. At non solum horum. Sodalis GLL Eduardus modo ceteris sodalibus misit a se Latine redditam opinionem de hac re Ludovici Wittgenstein (e libro eius Vermischte Bemerkungen [Miscellaneae Animadversiones] anno 1946 Theodisce in lucem edito):
Lingua Esperantica: Sensus fastidii quem percipimus si vocabulum commenticium effabimur una cum syllabis pariter commenticiis.Verbum inde factum frigidissimum, expers ullius nexus notionum adfinium, quod tantum fingit se esse 'linguam.'  Systema signorum sensu purgatorum nos minore taedio afficeret.
Ego autem rogare audeo: si re vera tam mala est haec lingua, unde esperantistis tanta vis res agendi, milies, puto, maior quam apud latinistas?

De mundo cepa condito

Visitavit nos heri Iohannes, Varsoviae natus professor disciplinae mathematicae apud Arizonianos. Narrabat, ut ei mos est, permulta mira et de America, et de Polonia nostra, quam novit fortasse melius quam maior part nostrum, qui in patria adhuc habitamus.

Nunc tamen de America oculis Iohannis spectata. Est ille enim vir rerum cupidus studiosusque, observator cautus. Qui experimento "exsistentiali" nuper fructus est: spatio trium mensium nihil televisionis spectabat, nihil radiophoniae auscultabat, nihil actorum diurnorum (etiam per interrete) legebat, praeter... "Cepam", id est "The Onion", sive acta satyrica interretialia, quae nuntios de America et toto orbe terrarum dant quasi veros, sed satyrice/hilariter redactos. Et dicit Iohannes se, cum post talem trium mensium vitae modum nuntios veros primum legisset, invenisse... nihil ei praetermissum fuisse! 

De titulis semper crescentibus descrescentibusque

Bert Hellinger, psychotherapeuta controversia plenus, cum consilia ad res omnes (et nonnullas alias) spectantia dare coepisset, sententiam protulit de re bursaria, his plus minusve verbis: Nonnulli tituli (=sortes) mihi videntur semper in valore crescere, nonnulli autem decrescere. Qua re alegorice, ut puto, de hominibus dicere voluit: nonnulli semper sunt et erunt hilares, alii semper tristes. Quasi contra stigma geneticum (carmicum?) pugnare non potes.

Si tamen solum ad rem bursariam sententiam Hellingerianam adhibeamus, dici potest eam aliquantulum fortasse valuisse ante crisin 2010 anni, nam hodie nihil fere certum in foris nummariis, mea saltem sententia, remanet.

Maxime doleo sorte amici mei, Christophori, ceterum sat clari scriptoris Poloni, qui, cum titulos magnae ephemeridis, ubi munus sibi aderat adestque, obtinuerat, at tituli hi mox postea vilescere coepissent, dixit mihi se velle diutius exspectare, nam sapientis minime esset titulos divendere dum vilescunt. – Post cladem incrementum venit, sicut post imbres sol – memini dictionis Christophori.

Prospicere tamen non potuit amicus meus rem diurnariam omnino, praecipue autem ephemerides chartaceas, quasi in mortem damnatos fuisse. Sors una ephemeridis Christiphori, quae annis nonagenariis praeteriti saeculi stabat fere 150 aureis, hodie 12 aureis venundatur. Num exspectat porro amicus meus meliora sibi tempora?

Has cogitationes scribo enchiridio rei bursariae, quod Nemo Oudeis modo scripsit (vide, lector care, aut blogum ipsius aut "Ephemeriden": De Davo et ejus sacculo pleno nummorum), a me cum magno animi motu lecto. 

Santeros vident rem migratoriam graviorem fieri

Santeros sive babalao, id est sacerdotes cultus syncretici santeriae Afrocubanorum, his diebus, ut mos iis est unoquoque anno ineunte, praesagia rerum in orbe terrarum mox futurarum annuntiaverunt.

Dicunt ita sacerdotes Cubani anno 2016 problemata socialia graviora in mundo fieri, praeteritis annis comparata. Praesertim immigratio illegalis Syrorum Europam et Cubanorum USAm dolenter affliget.

Hoc anno ergo non providerunt animo santeros aliquid miraculi, nam nemo mente sanus exspectaret crisin migratoriam, in Europa saltem, mox finitum iri. Sed habent sacerdotes Cubani – qui ab anno 1986 unoquoque anno primis diebus Ianuarii vaticinationes dant in conferentia diurnaria Havanae – famam res futuras bene prospicere.

Officialiter catholici, re vera colunt santeristae deos priscos gentis Africanae Ioruba – ita ex. gr. deus belli eorum Ogun (quasi Mars Iorubensis) mutatus est in figuram sancti Petri, dea Chango in sanctam Barbaram, at deus Orunla (Hermes? sed magis Sysipho similis), solus, cui contigit Mortem fallere, ceterum patronus vaticinationis, colitur ut sanctus Franciscus.

Funera Coreanorum probativa

In Corea Meridionali magis magisque apud populum grata esse "funera probativa". Quae funera pars sint therapiae suicidarum, aut rectius hominum, qui mania suicidali laborent. "Funus" esse culmen therapiae, cum, "litteris valedictoriis" ad falimiares sciptis (missisque?), patient in capulum corpus suum ponit at psychotherapeuta, notus nomine Angelus Mortis, operculum capuli clavibus claudit. Tunc remanet "suicida" in tenebris, quasi in coemeterii tumulo, ad tempus quoddam, cum de iucunditate vitae meditari possit.

Secundum commentarium BBC, multi huius therapiae alumni re vera incipiunt in "copulo" vitam aestimare necnon consilia capiunt abhinc aliter se cotidie gesturos. Corea Meridionalis nota est maximo per capita numero suicidarum inter terras OECD.