niedziela, 24 maja 2015

Oneirocritica Goldbergiana (1)

Semper placebat mihi oneirocritica sive libros somnia explicantes legere, licet ipse nescirem utrum credere his explicationibus deberem an non (potius non quam ita). Nonnullae tamen somniorum interpretationes periucundae mihi videntur. Qua re decrevi lectoribus praebere nonnulla ex "Encyclopaedia Interpretationum Somniorum" (The Encyclopedia of Dream Interpretation), auctore Eili Goldberg, quae meum animum in se maxime adverterunt. Libro Goldbergiano inter omnia oneirocritica maxime credo propter eius "naturam statisticam". Goldberg enim nihil a se (ut scio) de somniis interpretandis addidit, praeter citationes fere 80 librorum imagines nocturnas explicantium, librorum scilicet e tempore veteris Romae, Graecae atque Aegypti usque nostrae (fere) aetatis opera Freudiana vel Jungiana. Ex quibus omnibus quasi compillationem fecit.
Ecce tibi, care lector, imagines mea sententia speciales; pars prima:
Adamum et Evam cum in somnio videas, significat collaboratores furari ideas tuas. Si teipsum in corpore Adami vides, fruiturus es voluptatibus sexualibus, quas ne pingere quidem mente tibi adhuc potueris.
Agens assecuratorius omen est futurae prosperitatis tui negotiationis. Si tamen agens hic homo mancus (debilis) est, res tuae male se habebunt.
Contra incendium pugnare significat difficultates fiscales.
De alchimico somnium semper fere malum.
Cum magistratus (vir officialis) quidam de America Septentrionali somniat, mox in periculo erit.
US-Americanam (tam speciali formā) capsam cursualem (quam ante domos omnes tenent) cum oculis soporis inspicias, mox initurus es negotiationes semi-legales. Si ipse epistulam tali capsae imponis, reus putaberis sceleris ab alio homine patrati.
Ananassa sive malum pineum – signum prosperitatis nummariae. Bananam (=arienam, musam) econtra effectum esse parvae delectationis sui – scimus nos plura facere posse quam facimus.
Anglos in somnio non-Anglo videre signum malum esse: victima fiet alicuius "machinationis egoisticae".
Angelos cum aegrotus spectet, mox sanus erit, etiam si morbus gravis omnibus videtur.  
Apparatum photographicum soporatus vidisti? Mox in loco minime amoeno te invenies.
Cucurbita significat somniantem inaequilibrio animi laborare ac saepe superstiotiosum esse.
Saltare cum amatore cum puella se intueatur, caveat de valetudine: fieri potest, ut morbo sibi adhuc ignoto laboret. Si tamen inter saltationes nemo te (si puella vel femina es) rogat, ut cum eo saltes, gaudere vero potes, nam id significat te amatorem optimum mox inventuram, qui semper te amabit. Cum autem in somnio spectas saltationem ubi... nemo saltat, exspecta mox hereditatem inopinatam.  
Cum te mortuum balsamo perungui inspicias, mox in circulo malorum hominum vagaberis. 

3 komentarze:

  1. Carissima quaedam amica mea dixit se, cum somniaret, vidisse pediculum. Librum Somniorum, dum inspicerem, haec inveni: «Qui videt pediculum, bona valetudine commoditateque gaudebit. Si autem pediculus est in capite somniantis, inopitata pecunia adveniet. Qui vero occidit pediculum, caveat ne quem imprudenter iudicet per speciem». Ita res se habet? Quid asserit Golberg?

    OdpowiedzUsuń
    Odpowiedzi
    1. Goldberg dicit pediculos qui somniat, alienum se inter suos sentit, complexu inferioritatis laborat, de valetudine timet. Si in suo corpore pediculos vides, significat tibi morbum quendam imminere teque mortem timere.

      Usuń
  2. Maximas gratias. Miror quod eiusdem rei interpretationes ita inter se discrepent. Non possumus, reor, de somniis eorumque interpretationibus nimis laborare.

    OdpowiedzUsuń