niedziela, 6 marca 2016

Rogationes in Plinium (2)

Num de poppyzantibus linguis Africae Plinius dicit, narrans (V, 1): Africam Graeci Libyam appellavere et mare ante eam Libycum; Aegyptio finitur... populorum eius oppidorumque nomina vel maxime sunt ineffabilia praeterquam ipsorum linguis...?
xxx
De flumine Nigre cum scribit Plinius (multis in locis partium V-VI), puto eum re vera de hodierno flumine eiusdem nominis dicere, sit illud remotissimum ab oris Libycis/Mediterraneis videaturque non posse a Romanis Graecisve attingi (memores simus tamen fabulae de circumnavigatione Africae a Poenis quasi facta!). Dictionarium Lewis & Short de eo fluvio caute: a river in Africa. Me tamen aliter sentire cogunt talia ut: ...et tota Gaetulia ad flumen Nigrim, qui Africam ab Aethiopia dirimit...; Nigri fluvio eadem natura quae Nilo. Calamum ac papyrum et easdem gignit animantes isdemque temporibus augescit [num inveniemus in Africae parte septentrionali alterum amnem qui Nilo similis nominari auderet? ceterum miscet fontes amborum Plinius, Nilo enim originem, auctoritate regis Iubae, in monte inferioris Mauretaniae non procul oceano adesse dicit; aliio in loco autem correctius (fortasse?): Quidem et Pygmaeorum gentem prodiderunt inter paludes ex quibus Nilus oriretur...]. Iuxta ripam Nigris nuntiat habitare fabulosos Aegipanas semiferos et Blemmyas et Gamphasantas et Satyros et Himantopodas, quos etiam brevissime examinare nimis est, ut nunc id faciam.
xxx
Quomodo fit ut cum montes Ripaeos (hodie Ural) nonnulla vice nuntiet, numquam memoret rivum ingentem Rha (Volham), qui in his montibus fontem habet, Caspianumque mare abinde petit? Nulla est quoque mentio rha barbarum (nomen indeclinabile?), quae planta, nota quoque ut radix Pontica, in ripis Rha/Volhae cresci putabatur.

4 komentarze:

  1. De quaestionibus Plinianis geographicis scripsit Alfredus Klotz, cuius liber Berolini anno 1906 editus forsitan et usui et cordi sit tibi.

    OdpowiedzUsuń
  2. Recentior est symbola Nicolai Sallmann c.t. "De Pomponio Mela et Plinio Maiore in Africa describenda discrepantibus", in: Acta Omnium Gentium ac Nationum Conventus Latinis Litteris Linguaeque Fovendis : a die XIII ad diem XVI mensis aprilis a. MDCCCCLXXVII Dacariae habiti [uolumen edendum curauit Iuliana Farenga Ussani]. Romae : in aedibus "L'Erma" di Bretschneider, 1979, pp. 164-173.
    Sed doleo quod huius symbolae exemplum lucis ope descriptum in rete omnium gentium inuenire non fieri potest.

    OdpowiedzUsuń
  3. Quiquis sis, care CaS Fidelis, permagnum gaudium mihi attulisti! Gratias tibi ago.

    OdpowiedzUsuń