De hypochondriaa

Amica cum me ad iter Posnaniense (ad seminarium unius septimanae vivae Latinitatis) fortasse nimis caute comparantem conspexisset, rogavit:
- At cur numeros telephonorum, quos telephonulo tuo omnes bene servatos habes, chartis nunc inscribis?
Cui ego:
- Si... calamitate quadam laborabunt Posnanienses? Electricitate privata urbs erit? Ex. gr. ob aestum incredibilem? Radiophonia docet 36 gradus Celsianos in terra esse expsectandos....
Respondet amica:
- Tunc autem neminem telephonabis Posnaniaa, sive telephonuli memoriaa sive chartis uteris.
Recte dicit. Sed ego re vera magis furtum timeo, quo et marsupio et simul telephonulo privatus essem.
----
Deinde eadem amica me vidit, cum, domo iam iam egressurus, latrinam breve repetivi, ut sellam pertusam clausius clauderem. Oculis amicae stupefactis respondeo:
- Praemunitio contra pythones.
- Pythones???
- Nonnulli homines eas oblectamenti causa domi tenent. At, domino absente, pytho pertaesus loca viconorum interdum petit, cuniculis hydraulicis utens.
Deinde ponderoso "Lexico Graeco-Latino" Eustratii Tzakalotii (Athenis 1926) sellam insuper oneravi, ne bestia facile in domum meam perreptaret.