poniedziałek, 9 maja 2016

Cum Italis mihi difficultas... (aut: Festina lente)

Italus quidam mihi stomachatur, nam... ad litteras eius non responderim. At litterae erant longissimae, blanditiarum plenae - doctorem me in epistulae initio appellavit, nesciens "doctorem" univesitatem complere neglexisse - sat iucundo stylo Ciceroniano scriptae. Quas citissime legendo omisi rei punctum: in linea 34. capituli VI rogavit, ut symbolam eius in "Ephemeride" divulgarem.
Cui epistulae non respondi, nam minime intellexi - nimis cito fortasse eam legens - quid auctor a me poposcisset. Putavi eum forsan decrevisse libellum blanditiarum mihi a se mittendum. Volui etiam hominem rogare, ut sui punctum, si adesset, Anglice explanaret, sed timui eum ob id se offensum sentire. At stomachatur utique.
Non primum mihi haec difficultas cum Italis evenit. Memini me olim respondisse ad unius litteras chiliometrales, dicendo: Bene, ita fac. Vale. Numquam denuo ab eo viro audivi.
Fortasse desunt mihi boni mores. Aut tempus, ut iis semper regar (amica me cursorem fastfoodianum nuncupat). Aut ambo.
Vitam post mortem esse spero, ut res a me (et aliis) factas cautius considerem.
Ceterum... amo Italos. Num quis tam depravatus esse potest, ut eos non amet?      

6 komentarzy:

  1. Gratias! Et ego Italus, etsi in Civitatibus Foederatis nunc habito. Vivant Poloni!

    OdpowiedzUsuń
  2. Sed ego amicaliter id scripsi! Dic pauca, quaeso, de te. Cur in USA migraveris? Europa magis magisque Musulmana tibi non placet?:-)

    OdpowiedzUsuń
  3. Profecto! Majores vero difficultates habui ego cum Italis quam tu! :-)
    Migravi autem huc abhinc undeviginti annos, investigator de natura solis, quia in Italia nemo me conduxit.
    Natura autem horret vacuum. Europa ergo non amplius Christiana fit Musulmana.

    OdpowiedzUsuń
  4. Naturam Solis, stellae nostrae almae, investigas???

    OdpowiedzUsuń
  5. Sic est. Praesertim coronam solarem, ventum solarem, ejectiones materiae coronalis etc. Nam collegae mei et ego habemus magnum programma quod solvit aequationes magnetohydrodynamicas ut cognoscamus coronam solarem. Esne tu autem magister linguae Latinae?

    OdpowiedzUsuń
  6. Minime. Nugator sum nullius rei peritus. Sed, ut mos est nostratum, de qualibet re conor peritissime loqui.

    OdpowiedzUsuń